Read TAITA BIBLE – Biblia Ilagho Jiboie Kwa Wandu Wose ISAYA 33 Bible Online

ISAYA 33 - TAITA BIBLE – Biblia Ilagho Jiboie Kwa Wandu Wose bible

ISAYA 33

¹Ni bugha kwako oho kunonagha kusenonelo; oho kukaliagha, kusekalilo. Kukameria kunona, kuchanonwa. Kukameria kukalia, kuchakalilwa.

²Kudifue wughoma ee BWANA, isi dikusuwiriagha oho kukaie mlindiri odu kula nakesho; kukaie kukia kodu ngelo ya wasi.

³Wandu wakimbia kwa kusikira ndoghoi mbaa; kukawuka kimusi, mbari ra wandu rasaghisika.

⁴Mali rawo rawadwa seji shimandu riwadwagha, wandu wichariwada seji zighe riwadwagha.

⁵BWANA wachua wubaa, kwa kukaia andu kwake kokaia ni kwa ighu. Uchaichura Jerusalemu na maza ra hachi na loli.

⁶BWANA uchakaia kumanga konyu ngelo renyu rose; uchakaia kukia konyu kwa wungi, hikima na kumanya; mali renyu richakaia ni uko kumuobua BWANA.

⁷Olenyi awo wiko na ndighi wiakema chienyi, wadumwa wenyu wereda sere wialila kwa kuwawa.

⁸Chia mbaa reesighwa nduu, awo wadambi wamerie kusia. Mapatano ghaawuyachikanywa na washahidi kumenywa; ndekuwadie kutala wandu kungi anduangi.

⁹Isanga jeewuya ja wasi, jiasia; msidu ghwa Lebanoni ghoonyaya na kunoneka, Sharoni eeka sa ikara; hata aho Bashani na Mghondi ghwa Karmeli midi eewadwa ni pambari na kupotua malemba.

¹⁰BWANA waghamba, “Idana nichawuka, nichajoswa na kunekwa wubaa ghwapo.

¹¹Mipango enyu ni ya duu, eeka sa kuwa makozi na kukuwida matasa; miruke enyu yawuya modo ghommeria mmbeni.

¹²Wandu wichawuya seji weekorwa na kuwuya chokaa; wichawuya sa minjwa idemelo na kukorwa modonyi.

¹³Kula mundu ndesikire! Ukaiagha kula angu ukaiagha kaavui, usikire seji nibonyere, nao ughore seji ndighi ra wubaa ghwapo riko.”

¹⁴Wakaung'a wikaiagha Sioni wiasughusika kwa wowa, awo wandu wisemuobuagha Mlungu wakaia na wowa wikighamba, “Nani udimagha kukaia kimusi kwa kutanya kwa Mlungu kuko sa modo ghubirie? Nani aghadi kodu udimagha kukaianya na modo ghwa kala na kala?”

¹⁵Ni uja ubonyagha hachi, na kudeda agho ghiko gha loli; umenyagha mapato ghiseko gha hachi, na kughiria mikonu yake isewade matuwo; uo ughiriagha madu ghake ghisesikire njama rebwagha, na kuleghazighana wuwiwi.

¹⁶Uo mundu uchakaia banana, andu kuko na wulindiri ghukate sa ngome ya magho; uchanekwa vindo vake na machi ghake ghimkate.

¹⁷Meso ghako ghichammbona mzuri ukasikie, uko na wubaa mungi; na kuzighana isanga ibaa.

¹⁸Kuchakumbuka agho gherekuoboshagha na kukotia, “Weko hao waja weredilawiagha kodi? Weko hao waja werekoghe wikilawua minara yedu ya wulindiri?”

¹⁹Wang'eti ndekuchaawiwona, wandu wa madedo gha kighenyi ghisekueliagha; widedagha seji wiaghughumia.

²⁰Zighana muzi ghwa Sioni, ugho ghoresaghuloghe ghukaie andu kobonyera ndima redu ra dini. Kuchawona Jerusalemu muzi ghwa sere ghumange. Wandu waro wichakaia kwa sere, na vigingi va hema rawo ndevichaakulwa, hata kamba raro nderichaadumbulwa anduangi.

²¹Aho BWANA uchakaia ukiditesia; kuchakaia na meda mibaa na mitini, andu meli ra wamaiza risedimagha kughenda, hata meli ra wabaa risedimagha kuida.

²²Angu BWANA nuo mtanyi odu, BWANA nuo udibonyeragha nguma; BWANA nuo mzuri odu, nao uchadikira.

²³Kamba rawo ra meli nderimange; nderidimagha kuwadia mlingoti ghwa meli nicha. Aho niko dichadwa wunyika na kuwagha mali nyingi, hata mkelemeri ndechaasowa.

²⁴Ndekuchaakaia na mndungi isangenyi ughoragha wei, “Neeka mkongo”; kwa kukaia wandu wichaakaia aho, wichalekelwa mawiwi ghawo.