Read TAITA BIBLE – Biblia Ilagho Jiboie Kwa Wandu Wose ISAYA 36 Bible Online

ISAYA 36 - TAITA BIBLE – Biblia Ilagho Jiboie Kwa Wandu Wose bible

ISAYA 36

¹Mwaka ghwa ikumi na inya ghwa kubonya nguma kwa Mzuri Hezekia, Senakeribu mzuri wa Ashuru ukangia kuikaba mizi ya ngome ra Juda na kuiwada.

²Mzuri wa Waashuru ukamduma Rabshake kufuma Lakishi kwa Mzuri Hezekia aho Jerusalemu, na ijeshi ibaa. Ukacha na kubonya kambi aho mkuonyi ghwa iyo ndiwa iko chienyi mbaa eghenda Mbuwa ya Dobi.

³Nao Eliakimu mwana wa Hilkia, uo orekoghe m'baa wa nyumba ya mzuri, na Shebna uo orekoghe muandiki, na Joa mwana wa Asafu uo orekoghe karani, wikamchea Rabshake.

⁴Uja Rabshake ukawizera, “Mzerenyi Hezekia wakotelwa huwu ni uja mzuri m'baa wa Waashuru, ‘Welee, ijo isuwirio jako kuko najo kwawuyakusaghika naki?

⁵Kuaghesha madedo maduu ghadima kukuneka wuya na ndighi relwa wuda? Kwawuyakusaghika kwani ekunileghie?

⁶Ola kwaawuyakusaghika na Misri iko sa mzata ghwa mrangi ghuchikie, ugho ghuchaamdunga mundu uo ose ughutumiagha. Niko iko huwo kula mundu ukusaghikagha na mzuri wa Misri.’

⁷“Nako mkanizera wei mwaawuyakusaghika na BWANA onyu, welee, suo moni andu kwake kotasira mghondinyi na madhabahu rake rerechikanyiroghe ni Hezekia ukiwizera wandu wa Juda na wa Jerusalemu, kukaia wichatasa kwa madhabahu ihi?

⁸Choonyi idana m'bonye mapatano na bwana wapo mzuri wa Waashuru, nani nichamneka farasi elfu iwi iji mdimagha kupata wandu werijoka.

⁹Mchadima wada kummbinga hata uo m'baa wa agho majeshi ghedu gha ndonyi, ikakaia muakusaghika na Wamisri wimneke magare na wajoki farasi?

¹⁰Kukakoni si BWANA moni wanireda nipate kujikaba iji isanga na kujinona? Nechi ni BWANA unizerie, nijoke nijikabe na kujinona iji isanga.”

¹¹Niko Eliakimu, Shebna, na Joa wikamzera Rabshake, “Dakulomba kudedanye na isi wadumiki wako kwa kiteto cha Kiarami, kwa kukaia dachiichi; kusedede nesi kwa kiteto cha Kiebrania awandu wiko wurighenyi wichesikira.”

¹²Ela uja Rabshake ukawitumbulia, “Kwani M'baa wapo waaniduma nicheghora agha malagho konyu na kwa mzuri onyu muekeri? Nechi waaniduma kwa awa wandu wiko wurighenyi witanyiro wipate kuja mavi ghawo na kunywa maghocho ghawo.”

¹³Niko uja jemadari ukawuka kimusi na kughora kwa kiteto cha Kiebrania kwa lwaka lubaa, “Sikirenyi malagho gha mzuri, uo mzuri m'baa wa Waashuru!

¹⁴Mzuri waghamba welee, ‘Msekalilo ni Hezekia, kwa kukaia ndechaadima kumkira.

¹⁵Msekalilo ni Hezekia ukimzera wei, “BWANA uchadikira loli, hata muzi ughu ndeghuwadwagha ni mzuri wa Waashuru kungi.”

¹⁶Msemsikire Hezekia, kwa kukaia mzuri wa Waashuru waghamba: Bonyenyi mapatano na ini, mkufunye; niko kula umu onyu uchaaja mzabibu ghwake, na mtini ghwake, na kunywa machi kufuma kwa kisima chake cheni;

¹⁷hata niche kumdwa kwa isanga jifwanane na jenyu, isanga ja viro na divei, isanga ja vindo na mizabibu.

¹⁸Lindienyi Hezekia usemlaghashe ukimzera wei, “BWANA uchadikira.” Welee, eko milungu ya mbari ingi ikirie isanga jawo na mzuri wa Waashuru?

¹⁹Eko hao milungu ya Hamathi na Arpadi? Eko hao milungu ya Sefavaimu? Welee, yakirie Samaria kufuma mikonunyi kwapo?

²⁰Mwawonie ni milungu iao ya agha masanga ikirie masanga ghawo kufuma mikonunyi kwapo; nao wei BWANA uchaikira Jerusalemu kufuma mikonunyi kwapo?’”

²¹Ela awo wandu wikanyama kima sa iji koni werezereloghe ni Hezekia; ndeweremtumbulieghe hata ilagho jeni.

²²Niko Eliakimu mwana wa Hilkia, uo orekoghe m'baa wa nyumba ya mzuri na Shebna uo orekoghe muandiki, na Joa mwana wa Asafu, uo orekoghe karani, wikamchea Hezekia na nguwo rawo wameria kurirashua kwa wasi; wikamghoria malagho ghereghoreloghe ni uja Rabshake.