Read TAITA BIBLE – Biblia Ilagho Jiboie Kwa Wandu Wose ISAYA 39 Bible Online

ISAYA 39 - TAITA BIBLE – Biblia Ilagho Jiboie Kwa Wandu Wose bible

ISAYA 39

¹Ngelo iyo, Merodaki-baladani mwana wa Baladani, mzuri wa Babuloni, oredumieghe wandu na barua, chiaimweri na manosi wirede kwa Hezekia; angu oresikireghe kukaia orekoghe mkongo, nao ukaboa.

²Hezekia ukawikaribisha na kuwiwonyera nyumba ya mali rake; feza, dhahabu, vilungo, mavuda gha zoghori mbaa, maswagha ghake ghose, na ivo vose verekoghe andenyi ya iyo nyumba. Ndekorekoghe na kilambo chingi andenyi ya nyumba yake na andenyi ya wuzuri ghwake ghose userewiwonyereghe.

³Niko mlodi Isaya ukamchea Mzuri Hezekia ukamzera, “Awandu wafumie hao, nawo waghorie wada?” Hezekia ukaghamba, “Weenichea kufuma isanga ja kula ja Babuloni.”

⁴Isaya ukamkotia, “Wawona kii nyumbenyi kwako?” Hezekia ukaghamba, “Wawona kula kilambo chiko nyumbenyi kwapo; sisighie kilambo chingi nisewiwonyere chiko andenyi ya nyumba ra mali rapo.”

⁵Nao Isaya ukamzera Hezekia, “Sikira seji BWANA wa majeshi waghora:

⁶Ola matuku ghichacha na vilambo vose viko nyumbenyi kwako, na ivo verewikiloghe ni weke ndeyo hata ituku iji vichadukwa noko cha Babuloni, hata ndechichaasigharika kilambo chingi.

⁷Na wana wamu wako kuwivae kumoni, wichadwalwa wunyika, nawo wichawuya weke kolowi nyumbenyi kwa mzuri wa Babuloni.”

⁸Niko Hezekia ukamzera Isaya, “Ilagho ja BWANA kwajighora jaboie.” Angu oregheshereghe matuku ghake, “Kuchakaia sere na walindiri.”