Read TAITA BIBLE – Biblia Ilagho Jiboie Kwa Wandu Wose ISAYA 40 Bible Online

ISAYA 40 - TAITA BIBLE – Biblia Ilagho Jiboie Kwa Wandu Wose bible

ISAYA 40

¹Wihoreshe! Wihoreshe wandu wapo, waghamba Mlungu onyu.

²Kudede malagho gha wuhoreshi kwa Jerusalemu, wighorienyi kukaia wuda ghwawo ghwasirie; mawiwi ghawo ghamerie kulekwa, kwa kukaia BWANA wawikabie mando awi, kwa wundu ghwa kaung'a rawo.

³Lwaka lwa mndumu lwasikirika: “Boisenyi chia ya BWANA aho kireti, ghoruonyi chia mbaa ikarenyi, kwa wundu ghwa Mlungu odu.

⁴Kula vololo ichachurwa, na mighondi mibaa na mitini ichaserwa andu kunonekie kuchadendereshwa, na aho kuzamie kuchaghokeshwa.

⁵Niko wubaa ghwa BWANA ghuchafunukulwa, na kula mdamu uchaghuwona; kwa kukaia BWANA waghorie.”

⁶Lwaka lwa mndumu lwaghamba, “Ghora malagho!” Nani ngakotia, “Nighora malaghoki?” “Ghora kukaia wadamu wose ni karakara na nyasi, na kuboa kwaro ni sa mboi ra mlambenyi.

⁷Nyasi radanyaya na mboi radapotoka; ingelo BWANA uweteshagha mbeo. Loli wandu wose ni karakara na nyasi.

⁸Nyasi radanyaya, na mboi radapotoka; ela ilagho ja Mlungu odu jadadua kwa kala.”

⁹Wuka ee Jerusalemu, kujoke mghondinyi mlacha, kuchile malagho mecha. Wusira lwaka lwako kuchile malagho mecha ee Jerusalemu; wusira lwaka kuchile kuseko na wowa; izerenyi mizi ya Juda, “Wonenyi MLUNGU onyu.”

¹⁰Wonenyi Bwana MLUNGU uacha kubonya nguma kwa ndighi, na mafungu ghake waghiwadie kwa wundu ghwa wandu wake.

¹¹Uchachilisha chagha chake sa mlisha, uchawikwanya wana wa ng'ondi, na kuwidwa mkonunyi kwake; uchawidwa laghenyi kwake; na weke mae uchawighenja kwa wumboa.

¹²Mndungi wadima kupima machi na ngonde ya lui lwake? Angu kupima mawingu kwa mkonu ghwake? Nani udimagha kudungiria ndoe ra wurumwengu andenyi ya kikombe, angu kupima wulemeri ghwa mighondi mibaa na mitini?

¹³Nani udimagha kumlongoza Roho wa BWANA, angu nani orekoghe mnjama wake omfundisha?

¹⁴Mlungu walombie njama kwani ingelo orebonyagha maza rake, angu nani umfundishire chia ra hachi? Nani umfundishire kumanya, na chia retambua maza?

¹⁵Olenyi iro mbari ra wandu ni karakara na itanda ja machi jatonya andenyi ya ndoo, na wandu watalwa sa teri yakakadia sahani ya ratili; na visiwa ni sa teri mkonunyi kwake.

¹⁶Midi yose ya Lebanoni ndeikatagha kwa mbande, hata nyamandu raro nderikatagha kwa kufunya kizongona chekora.

¹⁷Mbari rose ra wandu si kindo chingi imbiri kwake, kwake ratalwa kukaia wuduu putu.

¹⁸Idana, Mlungu kuchamfwananisha nani? Angu kwadima kughora wafwane wada?

¹⁹Ndedimagha kufwananishwa na mlimu ghubonywagha ni wandu, ugho ghushingwa dhahabu ni mafundi; na kuwikwa aighu ya kilambo cha feza.

²⁰Mundu mkiwa usedimagha kuchana mlimu ghwa feza angu dhahabu, wadakulolia mudi ghusewoagha; nao wadalola fundi um'boisire mlimu ghusedimagha kughenda.

²¹Wele ndemuichi, angu ndemsikire? Jingi ndemghorelo kufuma kala, angu kumanya kufuma wurumwengu ghwawikwa msingi;

²²kukaia, wurumwengu ghodeumbwa ni uo ukaiagha mawingunyi naighu, na kwake, wandu wikaiagha wurumwengunyi ni karakara na weke mwapazi? Wadakuchua mlungunyi sa pazia, na sa hema ekailwa ni wandu.

²³Uo wadawisera wabaa, na kuwibonya awo wibonyagha nguma wiwoneke kukaia si kindo chingi.

²⁴Wakaia karakara na miwalwa, angu mbeu rawalwa wokoni; imbiri riseserie miri woruwu, BWANA wawetesha mbeo aighu yaro, nayo yaoma na kiremba chaiduka noko sa itasa.

²⁵Mlungu Mweli ufwananishwa nani? Oko ungi ufwanane nao?

²⁶Zighanenyi nokoighu cha mlungunyi! Nani uumbie iro nyerinyeri muriwonagha? Uo urighenjagha sa ijeshi wariichi mtalo ghwaro; nao wadariwanga kula imu kwa irina jake. Ndighi rake ni mbaa loli loli, hata ingi yaro na jingi ndeidimagha kulaghaya.

²⁷Kwaki kudedagha ee Jakobo? Kwaki kughoragha ee Israeli, “Navisikie mesonyi kwa BWANA, na hachi rapo nderiwuetalwa ni Mlungu wapo?”

²⁸Wele ndekuichi, angu ndekusikire? Kukaia, BWANA ni Mlungu wa kala na kala, nuo Muumbi wa kutua kose kwa ndoenyi, ndesilwagha jingi hata ndedumbukagha, kumanya kwake ndekulawulwagha.

²⁹Wadamneka ndighi uo udumbukagha, na uo usewadie ndighi wadamchuria ndighi.

³⁰Wadawana wichadumbuka na kusilwa ni ndighi, na wandu wa irika wichaghwa kwa wundu ghwa kusilwa;

³¹ela awo wimmbeseragha BWANA wichapata ndighi mbishi, wichajoka kwa mawawa sa indu, wichakimbia nawo ndewichaasilwa, wichaghenda kuseko na kudumbuka anduangi.