Read TAITA BIBLE – Biblia Ilagho Jiboie Kwa Wandu Wose ISAYA 41 Bible Online

ISAYA 41 - TAITA BIBLE – Biblia Ilagho Jiboie Kwa Wandu Wose bible

ISAYA 41

¹Mlungu waghamba huwu, “Nyamenyi kima imbiri kwapo inyo wandu wa masanga gha pwani, Wandu ndewikufungishe ndighi, ndewiche wighore ndedisoghode kaavui diwose ditanyo.

²“Nani umnyavurishire mndumu kufuma mashariki, na kum'bonya usimeghe kula andu? Waribonya mbari ra wandu righo imbiri kwake, na wazuri kusimwa hata wikaie aisi yake. Wadawighusha andonyi kwa lufu lwake karakara na teri, na kuwiwinga kwa ndana yake karakara na matasa ghidukwagha ni mbeo.

³Wadawinuga na kuida banana, ukiida chienyi useiidie jingi.

⁴Nani ubonyere maza iri rikaie seji riko, ukipanga malagho kivalwa hata kivalwa? Ini BWANA, wa imbiri, na wa kutua, ni Ini.

⁵“Wandu wa masanga gha pwani wawonie wikaobua, kutua kwa ndoenyi waawuyasughusika; wasoghoda kaavui wikacha.

⁶Watesiana kula mundu na mmbao, na kula mundu na mruna wikighamba, ‘Kaia na ngolo.’

⁷Fundi wa mbau uamzera mchani dhahabu, ‘Kwabonya kazi iboie!’ Na uo udendereshagha kwa nyondo wamzera uo ukomeriagha misumari na kukwanya ugho mlimu, ‘Kwaibonya nicha to!’ na wose wafunga ndighi kughufunga na misumari.

⁸“Ela inyo wandu wa Israeli mo wadumiki wapo kivalwa cha Jakobo neremsaghueghe, kivalwa cha Abrahamu mghenyi wapo.

⁹Neremdwaeghe kufuma kutua kwa ndoenyi, ngammbanga kufuma kula ngimzera, ‘Inyo mo mdumiki wapo, neremsaghueghe hata seremleghieghe anduangi.’

¹⁰Msakeobua, angu neko andwamweri na inyo, msekambo ni chongo, angu Ini ne Mlungu onyu. Nichamchuria ndighi, nichamtesia; nichammaziria na kumsimia kwa ndighi rapo.

¹¹“Ola awa wikubonyeragha machu, wichafushwa waya; awo wifungagha ndighi kulwa na oho, wichawuya si kilambo chingi, nawo wichatota.

¹²Kuchawilola, ela ndekuchaawiwona, awo wilwagha na oho, wichawuya kukaia si kilambo chingi.

¹³Kwa kukaia Ini Bwana Mlungu wako, nichakumaziria kwa mkonu ghwapo ghwa kiwomi; ni Ini nighoragha, ‘Kusakeobua, Ini nichakutesia.’”

¹⁴Bwana waghamba, “Msakeobua inyo wana wa Jakobo msewadie ndighi, ee, inyo wandu wa Israeli. Nichamtesia, Mkomboli onyu ni Mlungu Mweli wa Israeli.

¹⁵Ola nicham'bonya mkaie sa chombo kiwishi chekuwida, chiko na maghegho ghikalie; mchaikaba mighondi na kuifasha-fasha, na mighondi mitini mchaisaghisa sa makanda.

¹⁶Mchawiela, nawo wichadwalwa noko ni mbeo. Kiremba chichawisasara ii chia na ii chia; na inyo mchaboilwa andenyi ya BWANA, ee, mchakukasa andenyi ya Mlungu Mweli wa Israeli.

¹⁷“Iji wakiwa na awo wisowagha wakalola machi na kughisowa, na chumi rawo kuoma kwa kau, Ini BWANA nichawitumbulia, Ini Mlungu wa Israeli sichaawisigha wandu wapo anduangi.

¹⁸Nichaibonya meda ya machi idike-dike aighu ya mighondi iomie, na ndoria ra machi ribuke vololonyi; nichabonya kireti chibuke viriwa va machi, na andu kuomie kuchabuka machi.

¹⁹Nichabonya misida na mgholeka, na mhadasi, na mzeituni ibuke kireti; kuchakaia na msumbesu, na m'beroshi, na m'bunduki kireti.

²⁰Wandu wichawona na kumanya, wizighane na kutambukilwa chiaimweri, kukaia ndighi ra BWANA niro rabonya agho, ee, Mlungu Mweli wa Israeli nuo ughibonyere.”

²¹“Redenyi malagho ghenyu ee milungu ya mbari ra wandu, waghora BWANA. Redenyi wuloli ghonyu; waghamba Mzuri wa Israeli.

²²Redenyi iyo milungu yenyu ipate kudighoria iro maza richagha. Dighorienyi malagho gha kala ngera ghafwane wada, dipate kughilawua na kughimanya kutambua kwaro ni wada; angu ima ndeidighorie maza richagha.

²³Dighorienyi iro maza richagha, dipate kumanya kukaia mo milungu; dibonyerenyi mecha angu mawiwi, dipate kukambwa ni chongo na kuobua.

²⁴Olenyi inyo ndemokilambo chingi, na kazi renyu nderiko; uo umtasagha inyo ni mchafu.

²⁵“Namnyavurisha mndumu kufuma kaskazinyi, nao wamerie kucha; na umu kufuma mashariki andu iruwa jibukiagha, nao uchajiwangia irina japo kwa malombi. Uo uchawiwadia-wadia awo wibonyagha nguma karakara na mazozo, uchawiwadia-wadia sa iji koni mvimbi ufashagha wongo.

²⁶Nani oreghighorieghe agha kufuma koicho eri dipate kughimanya angu ughilodere imbiri ya ngelo nesi dighambe, ‘Waghorie loli?’ Ndekuwadie ungi ughorie, hata ndekuwadie ungi usikire malagho ghenyu.

²⁷Ni ini BWANA nizoe kughoria Jerusalemu agho malagho; neremdumieghe mundu Jerusalemu kureda malagho mecha, ‘Ola wandu hawa wacha.’

²⁸Nani iji nerezighanireghe aghadi ya iyo milungu, serewonieghe ghonighoria ilagho jingi; hata ndekorekoghe na ghungi ghoredimieghe kunitumbulia ikoto japo anduangi.

²⁹Ola i milungu yose ni ya duu, ndeiwadie kazi ingi; milungu yawo echana ni kazi nduu.”