Read TAITA BIBLE – Biblia Ilagho Jiboie Kwa Wandu Wose ISAYA 42 Bible Online

ISAYA 42 - TAITA BIBLE – Biblia Ilagho Jiboie Kwa Wandu Wose bible

ISAYA 42

¹BWANA waghamba, “Zighana mdumiki wapo uo nimmangishagha, msaghulwa wapo, uo uniboiagha loli-loli. Nameria kumchura Roho wapo, nao uchareda hachi kwa iro mbari ra wandu.

²Ndechaakema, hata lwaka lwake ndeluchaasikirika chienyi;

³mrangi ghufashikie ndechaaghuchikanya, hata wutambi ghufukiagha mosi ndechaaghurimisha; ela uchareda kutanya kwa hachi.

⁴Uo ndechaalemwa angu kubwaghwa ngolo, hata umerie kuimangisha hachi ndoenyi; na masanga gha pwani ghaawuyaweseria sharia yake.”

⁵Mlungu, uo BWANA oreumbieghe na kuwika mlungunyi na ndoenyi, na vose viko andenyi yaro; uo Mlungu uwinekagha wandu miruke na irangi jedua moyo waghamba huwu:

⁶“Ini ne BWANA, nakuwangie kupate kubonya hachi, nakuwadie na kukumazira kwa mkonu ghwapo; nakufunyire kukaie ilaghano kwa wandu, na kukaia mwengere kwa iro mbari ra wandu.

⁷Kupate kutambua meso gha vitungure, na kufungua wafungwa wifume kifungonyi, na awo wiko kirenyi wipate kufunguka.

⁸Irina japo ini ni BWANA, sichaamneka mndungi wubaa ghwapo; hata sichaasighia milimu iwachilo makaso ghapo.

⁹Olenyi niamghoria kiimbiri kukaia, maza ra kala riaida, nani idana niamghoria maza mbishi.”

¹⁰M'borienyi BWANA lumbo luwishi, inyo wandu wake hata kutua kwa ndoenyi! Bahari ndeirurume, chiaimweri na vose viko andenyi yaro. Masanga gha pwani na wandu wikaiagha andenyi yaro.

¹¹Kireti na mizi yose iko aho ndeiwusire chwaka rawo kumkasa BWANA, wandu wose wikaiagha mizi ya Kedari, na awo wikaiagha Sela, ndewibore kwa kuboilwa; ndewiwusire chwaka rawo na kukasa aighu mighondinyi.

¹²Wandu wose wa pwani ndewim'borie BWANA makaso.

¹³BWANA wafuma karakara na ing'oni, wawukwa ni mware na kukema kara kara na mundu wa wuda; kuwonyera ndighi rake kwa wamaiza wake.

¹⁴Mlungu waghamba, “Nanyame kima luma, nanyame hata ngasirimika. Ela idana nichakema kara kara na muka ukumbagha lufu kwa kuva ngisoda-soda kwa ndighi.

¹⁵Nichainona mighondi mibaa na mitini, na kuomera nyasi rose; nichaighalusa meda iwuye ikara, na kuomera viriwa.

¹⁶“Nani nichawilongoza vitungure kwa chia wiseiichi, nichawighenja kwa chia wisererimanyireghe. Nichachighalusa kira chiwue mwengere imbiri kwawo, na chia rizamie nicharighokesha. Agho nigho malagho nichaaghibonya, hata sichaakaia niseghikatishire anduangi.

¹⁷Awo wose wiirumiriagha milimu, na kutasa fwana richanilo wikighamba, Inyo mo milungu yedu, wichawunjwa wandu wa nyuma na kufushwa waya putu.”

¹⁸BWANA waghamba, “Sikirenyi inyo wandu mfue madu! Zighanenyi inyo vitungure, mpate kuwona!

¹⁹Nani ufue meso ela mdumiki wapo, angu ufue madu ela mdumwa wapo? Nani ufue meso sa mndwapo uwikilo wakfu? Angu nani ufue madu sa uo mdumwa wapo?

²⁰Israeli kwawuyawona malagho mengi, ela ndekuwueghizighana; kwawuyasikiria malagho mengi, ela ndeghiwuengia.”

²¹Yam'boie BWANA kuibonya sharia yake italo na kunekwa wubaa mungi, kwa wundu ghwa hachi yake.

²²Ela awa ni wandu wiwadilo, wikaiwa, na kufungilwa mirumenyi wose; wangirilo jela, hata ndekuwadie ungi owivuvua, hata oghora Wiwunjenyi!

²³Nani aghadi konyu uchaasikiria malagho agha, nani uchaadua ukisikiria kwa ngelo richagha?

²⁴Nani ukumbie wana wa Jakobo mikonunyi kwa mnoni, na Israeli kwa viting'a? Welee, si BWANA uo werem'bonyerieghe kaung'a? Uo wisereghendieghe kwa chia rake, na uo wiserewadieghe sharia rake?

²⁵Niko huwo BWANA ukawidiria machu ghake ghibirie, na ugho wuda ghubirie; werekoreloghe ni machu ghake, ela awo ndeweremanyireghe gherewikorieghe, hata ndeweretalieghe anduangi.