Read TAITA BIBLE – Biblia Ilagho Jiboie Kwa Wandu Wose ISAYA 43 Bible Online

ISAYA 43 - TAITA BIBLE – Biblia Ilagho Jiboie Kwa Wandu Wose bible

ISAYA 43

¹Ela idana BWANA uo oremuumbieghe waghora huwu ee wana wa Jakobo, uo orekubonyereghe waghamba huwu ee Israeli, “Kusakeobua, kwa kukaia nakukombue; nakuwangie kwa irina jako, oho ko wapo.

²Hata ngera kwaida aghadi ya machi mengi, ini nichakaia andwamweri na oho. Kukaida aghadi ya meda ya machi mengi, ndegichaakudwa anduangi. Kukaida aghadi ya modo, ndekuchaahia; hata lumu lwa modo lukakuleta, ndekuchaalungua anduangi.

³Angu ini ne BWANA Mlungu wako, Mlungu Mweli wa Israeli, Mkiri wako. Nichafunya Misri ikaie wukomboli ghwako, na Ethiopia na Seba nichaifunya kwa wundu ghwako.

⁴Kwa kukaia koko wa zoghori mbaa mesonyi kwapo, na kwa kukaia nakukunde na kukuneka ishima, nichafunya wandu kwa wundu ghwako, na mbari ra wandu kwa wundu ghwa irangi jako.

⁵Kusakeobua, angu ini neko andwamweri na oho, nichareda kivalwa chako kufuma mashariki, na kuwikwanya kufuma magharibi.

⁶Nichaizera kaskazinyi, wilekerie, na kusinyi nichaizera, Kusakewighiria! Redenyi wana wapo wa womi na wa waka kufuma aho kula kutuonyi kwa ndoenyi,

⁷awo wose wiwangilo kwa irina japo, awo nerewiumbieghe kwa wundu ghwa wubaa ghwapo; ngawibonya na kuwiumba.”

⁸Mlungu waghamba, “Wiredenyi wandu wapo wiko na meso ela ndewiwonagha, awo wiko na madu ela ndewisikiragha.

⁹Mbari rose ra wandu nderikwanyike chiaimweri, wandu ndewikwanyike chiaimweri. Nani ungi aghadi kwawo udimagha kujighora ilagho iji, upate kudiwonyera maza richagha? Ndewirede mashahidi ghawo ghewipatira hachi, Nawo wisikire na kughora wisikire na kughora, Ni loli.

¹⁰“Inyo moko washahidi wapo, mo wadumiki wapo awo nerewisaghueghe. Jingi ndekorekoghe mlungu ghungi ghoreumbiloghe imbiri yapo; hata ndekuchaakaia na ghungi nyuma yapo sena anduangi.

¹¹“Ini, ee, ini ne BWANA; ndeuko mkiri ungi mzima kuchumba ini anduangi.

¹²Naereshere, ngakira, sena ngawonyera, ingelo mlungu ghungi ghwa kighenyi ghuserekoghe konyu; nenyo moko washahidi wapo; waghamba BWANA.

¹³Ini ne Mlungu, nani neko Uo moni. Ndekuwadie mndungi udimagha kukira kufuma mkonunyi kwapo; nadabonya kazi mndungi usedimagha kuitangala.”

¹⁴BWANA, uo Mkomboli wako, Mlungu Mweli wa Israeli, waghamba huwu, “Nichaduma majeshi Babuloni kwa wundu ghonyu, wipate kuwidwa Wababuloni andenyi ya meli rawo sa wakimbii, na kukukasa kwawo kuchaghaluswa kuwuye kililo.

¹⁵Ini ne BWANA, uo Mweli onyu Muumbi wa Israeli, Mzuri onyu.”

¹⁶BWANA, uo ubonyere chia baharinyi, ee, uo ubonyere andu koidia aghadi ya machi mengi,

¹⁷na kubonya magare, farasi na majeshi ghigho andonyi ghisewuke, hata ghisie sa wutambi ghwarimishwa!

¹⁸Uo BWANA waghamba, “Msekumbuke hata mseghitale malagho gha kala.

¹⁹Olenyi naawuyabonya ilagho iwishi jazoya kubonyeka; ndemmbuejiwona? Nichabonya chia kireti, na kumneka meda aho.

²⁰Nyamandu ra isakenyi richanineka ishima, mizozo hata nyagha, angu nareda machi kireti, na meda ikarenyi; na kuwineka machi wandu wapo wisaghulo.

²¹Wandu nerewiumbieghe kwa wundu ghwapo, eri wipate kueresha makaso ghapo.”

²²Bwana waghamba, “Ela sena ndekorenitasireghe ee Jakobo, korenikojereghe ee Israeli.

²³Ndekuniredie ng'ondi rako kwa wundu ghwa vizongona vekora, hata ndekuninekie ishima kwa vizongona vako. Ini sikulemeshere kwa mafunyo ghako, hata sikusirishire ndighi kwa kunifukiria marumba.

²⁴Ndekunighue marumba na pesa rako, hata kunibonya nikato ni mavuda gha vizongona vako. Ela korenilemeshereghe kwa kaung'a rako na kunisirisha ndighi kwa mawiwi ghako.

²⁵Ini ne Mlungu, uo uinjagha makosa ghako kwa wundu ghwa irina japo, nani sichaarikumbuka kaung'a rako sena anduangi.

²⁶“Kunikumbuke, nao kuche didede agho malagho; reda mashitakio ghako kupate kuwoneka ngera koko na hachi.

²⁷Ndeyo wa imbiri odebonya kaung'a na wadederii wako wikanikosera.

²⁸Kwa huwo ngawiinjira ishima wabaa wa Andu kwa Wueli, ngamfunya Jakobo upate kutoteshwa putu, na Israeli upate kusholelwa.”