Read TAITA BIBLE – Biblia Ilagho Jiboie Kwa Wandu Wose ISAYA 48 Bible Online

ISAYA 48 - TAITA BIBLE – Biblia Ilagho Jiboie Kwa Wandu Wose bible

ISAYA 48

¹Sikirenyi agha inyo wana wa Jakobo, inyo mmbangilo kwa irina ja Israeli; ee, inyo mfumie kwa kivalwa cha Juda; inyo mghemagha kwa irina ja BWANA, na kumshuhudia Mlungu wa Israeli; ela si kwa loli na hachi anduangi.

²Mwadakuwanga mmbeni wana wa muzi ghwa wueli, na kukusaghika kwa uo Mlungu wa Israeli; uo irina jake ni BWANA wa majeshi.

³Mlungu waghamba, “Neremghorieghe maza ra kala, kokala uko. Nereghighorieghe kwa momu ghwapo na kughibonya ghimanyike, nagho ghikabonyeka na kuwoneka shwa wori.

⁴Ini nakuichi kwaghilikie, na singo yako yakurie sa chuma, na wushu ghwako sa shaba;

⁵niko nereghorieghe maza richaakaia kufuma kokala uko ngakughoria imbiri risebonyekie, kusecheghora wei, ‘Ni mlimu ghwapo ghwabonya, ni mlimu ghwapo niwachire na iyo fwana niichanie niro rafunya momu ghibonyeke.’

⁶“Kwameria kughisikira na kughiwona agha ghose; Welee, kulemwa ni kughighora? Kufuma idana nichakubonya kusikire maza mbishi, maza rivisikie jingi kusererimanyireghe.

⁷Nderibonyekie kala nicharibonya idakoni jingi ndekunisikire, kwaarisikira idime kusecheghora wei, ‘Ola iri nererimanyireghe.’

⁸Jingi ndekorerisikireghe hata kurimanya, kufuma konkala uko madu ghako ndeghifungukie, kwa kukaia nerekumanyireghe kukaia mundu wa mikalo na kufuma kuvalwa kwako korekoghe mundu olegha mawonyero.

⁹“Nawadia machu ghapo kwa wundu ghwa ishima ja irina japo; nakurumaghia kwa wundu ghwa wubaa ghwapo, eri nisechekuinja putu.

¹⁰Ola nakuelesha ela si seji feza ieleshwagha, nakutima andenyi ya modo ghwa matiriro.

¹¹Ni kwa wundu ghwapo nimoni, ee, kwa wundu ghwapo, niko nibonyagha huwo; nidima wada kusigha irina japo jisowelo ishima? Sichaamneka mndungi wubaa ghwapo anduangi.”

¹²“Nisikire ini ee Israeli, kivalwa cha Jakobo neremmbangieghe! Ni ini Mlungu, ne wa imbiri na wa kutua.

¹³Mkonu ghwapo nigho ghorebonyereghe msingi ghwa ndoenyi, ee, mkonu ghwapo ghwa kiwomi ghukawika mlungunyi; ngawanga mlungunyi na ndoenyi riawuka kimusi shwa wori.

¹⁴“Kwanyikenyi inyo mmbose msikire, nani aghadi ya milimu yenyu, udimie kughora agho malagho ghichagha? Ini BWANA namkunde Koreshi, nao uchakatisha mpango ghwapo aighu ya Babuloni kwa ndighi rapo uchawikaba Wakaldayo.

¹⁵Ni ini, ee, ni ini moni nighighorie na kummbanga, namredie, nao uchawona nicha kwa chia rake.

¹⁶Idana soghodenyi kaavui na ini msikire, kufuma kuzoenyi ini sighorie kwa ngasu; hata ingelo ghicheebonyeka, ini nerekoghe aeni.” Na idana Bwana MLUNGU wamerie kuniduma kwa wulongozi ghwa Roho wake.

¹⁷BWANA, uo Mkomboli wako, Mlungu Mweli wa Israeli waghora huwu: “Ini ne BWANA Mlungu wako, uo ukufundishagha kupate fwaida na kukulongoza kwa iyo chia ifwane kuighendie.

¹⁸Na ngera kodesikira memu yapo, kumangu kwakaia na sere ichue sa moda ghwa machi, na hachi yako idikaa-dika sa mivo-mivo ya bahari.

¹⁹Kivalwa chako kumangu chakaia sa msangagha, ee, sa shangagho ra msangagha ghwa bahari; marina ghawo kumangu na jingi ndegherevutwagha hata kutoteshwa imbiri kwapo anduangi.”

²⁰Fuma Babuloni shwa-shwa, kimbia kufume kwa Wakalidayo. Ghora agho malagho kwa kuboilwa, kughighore na kughighenja kutua kose kwa ndoenyi kukighamba, “BWANA wamkombue mdumiki wake Jakobo.”

²¹Iji orewighenjereghe kireti, ndewerewonieghe kau ingi; orebonyereghe machi ghifume ighonyi, orebarieghe igho, na machi ghikafuma.

²²“Ndekuwadie sere ingi kwa wawiwi,” waghamba BWANA.