Read TAITA BIBLE – Biblia Ilagho Jiboie Kwa Wandu Wose ISAYA 57 Bible Online

ISAYA 57 - TAITA BIBLE – Biblia Ilagho Jiboie Kwa Wandu Wose bible

ISAYA 57

¹Mundu wa hachi waawuyatota, na mndungi ndetalagha; wandu wimuobuagha Mlungu waawuyafwa wurumwengunyi, na mndungi ndetambukilwagha. Kwa kukaia mundu wa hachi waafunywa wasinyi,

²nao wapata sere; awo wighendagha nicha wahora kifonyi.

³Ela soghodenyi aha, inyo wana wa muka msawi, na kivalwa cha walaki na malaya.

⁴Nani mwawuyamsarighia? Nani mwawuyamuasamia na kumfunyira chumi? Welee, inyo si wana wa makosa, kivalwa cheghora tee?

⁵Inyo mwaawuyaakiana modo kwa bea renyu ra mumbi aisi ya mialoni, mkikaia aisi ya kula mudi ghwa malemba mawishi; inyo m'bwaghagha wana wenyu andenyi mavongonyi wikaie vizongona na kuwivisa andenyi ya chukarara ra magho.

⁶Mwadalola magho ghidendere mavongonyi, ghiwuye andu konyu kotasira; mwadadunga kizongona chenywa aho, na kureda mafunyo gha viro; muaghesha maza iro richanihoresha?

⁷Mwadajoka aighu ya mghondi mlacha, mpate kubonya wumalaya na kutasa milimu; nao aeni aho, mwadafunya vizongona.

⁸Mwawikie milimu yenyu nanyuma ya vizingiti va minyango yenyu, na kufunukua wuduu ghwa wakundwa wenyu, nenyo mwajokie wulinyi ghonyu mshapa chiaimweri nawo, mkikunda kubonya lukundo nawo aighu ya ugho wuli, na kuzighana wuduu ghwawo.

⁹Mwabonyere charo kwendatasa Moleki, mwadwae mavuda na marumba mengi; nenyo mwawiduma wandu wengi noko kula hata Andu kwa Wafu.

¹⁰Mwakusirishire ndighi mmbeni mkighenda, hata huwo ndemchesilwa ni ndighi mghambe, “Ni kazi ya duu,” ela mkakufungisha ndighi, hata ndemoresiriloghe anduangi.

¹¹BWANA wakotia, “Nani umngirie kiture mkamuobua hata mkawona mghore tee? Nenyo ndemoredimieghe kunikumbuka, hata kunighesha anduangi. Welee, kurumaghia kwapo kwa ngelo ndacha niko kwam'bonya mseniobuo?

¹²Nichaghora malagho gha hachi na mabonyo ghenyu, ela milungu yenyu ndeichaamtesia anduangi.

¹³Iji kwakema kukilola wutesia, oke iyo milimu yako koreitumbanyireghe ndeikukirecho. Mbeo ya kiremba ichacha na kuidwa noko, ee, miruke tu ichaiinja noko. Ela uo uchaakusaghika nani, uchapata isanga na kughupata ifwa ugho Mghondi ghwapo ghwa wueli.”

¹⁴Ngelo iyo Mlungu uchaghora huwu; “Aghenyi, aghenyi m'boise chia, injenyi vikuwaro chienyi ya wandu wapo wipate kuida.”

¹⁵Angu uo ukaiagha aighu, ukumikie, ukaiagha kwa kala na kala, uo uwangwagha Mweli, waghamba huwu: “Ini nadakaia koighu andu kwa wueli, sena nadakanya na uo mundu uko na ngolo iheagha na kukusera; nipate kurukisha roho ra wandu wikuserie, na ngolo ra wandu wiko na wundo ghwa kuhea.

¹⁶Sichaasimana na wandu matuku ghose, hata sichaakaia na machu ngelo rose anduangi; angu mdamu wadima kudumbuka imbiri kwapo, uo uko na miruke icheni nereibonyereghe.

¹⁷Nerem'bonyereghe machu kwa wundu ghwa kaung'a na bea rake; ngamkaba angu nerekoghe na machu, na kuleghamzighana. Ela sena orechurieghe kuwuya nyuma ngolonyi kwake.

¹⁸Namerie kuwona mighendo yake, ela nichamkira, na kumlongoza, na kumhoresha;

¹⁹nichawibonya awo werekoghe wikilila wichulo ni makaso andenyi ya Israeli. Sere, sere kwa uo uko kula na uo uko kaavui, ini BWANA naghamba, nani nichamkira.

²⁰Ela wandu wawiwi wichakaia sa mivo-mivo ya bahari isehoragha, machi gharo ghachue mazozo na wuchafu.

²¹Ndekuwadie sere ingi kwa wandu wawiwi,” waghamba Mlungu wapo.