Read TAITA BIBLE – Biblia Ilagho Jiboie Kwa Wandu Wose ISAYA 6 Bible Online

ISAYA 6 - TAITA BIBLE – Biblia Ilagho Jiboie Kwa Wandu Wose bible

ISAYA 6

¹Mwaka ghuja Mzuri Uzia orefueghe, neremmbonieghe BWANA uko kidombo aighu ya kifumbi chake cha nguma chiwusirilo ighu, na irwao jake jerechueghe Hekalunyi.

²A naighu kwake, korekoghe na maserafi;[1] na kula umu orekoghe na mawawa arandadu. Mawawa awi ni ghefinikira wushu ghwake, na awi ghefinikira maghu ghake, na awi gheburuka.

³Wikawangana weni na weni wikighamba, “Mweli, mweli, mweli, ni BWANA wa majeshi, ndoenyi kose kwachua wubaa ghwake.”

⁴Na chwaka rawo rikasughusa misingi ya Hekalu, nayo ikachulwa ni mosi.

⁵Niko ngaghamba, “Ni bugha kwapo, angu nalagharie, kwa kukaia ini ne mundu uko na memu ilue; nani nadakaia aghadi ya wandu wiko na memu ilue, na meso ghapo ghammbona Mzuri, Uo BWANA wa majeshi.”

⁶Niko umu wa maserafi ukaburuka cha kwapo uwadie ika ja modo kwa koleo kufuma madhabahunyi.

⁷Ukaniadada momunyi kwapo na ijo ika, ukaghamba, “Ola iji jakuadada momu ghwako; wuwiwi ghwako ghwainjwa, na oho kwafuilwa wughoma.”

⁸Ngasikira lwaka lwa BWANA lukighamba, “Nimduma ani; nani ukufunyagha kughenda kwa wundu ghodu?” Niko ngaghamba, “Neko aha, nidume ini.”

⁹Nao ukanizera nighende niwighorie wandu, “Ghenda kuwizere awa wandu: ‘Kusikira mchasikira, ela ndemchaatambukilwa; na kuzighana mchazighana, ela ndemchaawona.’

¹⁰Kurikurishe ngolo ra awa wandu, na madu ghawo ghilemie, na meso ghawo ghisewone; wisechewona na meso ghawo, na kusikira kwa madu ghawo na kughaluka wipate kuboiswa.”

¹¹Niko ngakotia, “Hata lii ee BWANA?” Ukanitumbulia, “Hata mizi yanonwa na kusighwa miduu, na nyumba rikaie risene wandu, na isanga kusighwa iduu putu,

¹²na ini BWANA niwiinje wandu na kuwighenja noko, na andu kulazi kusigho kuduu isangenyi.

¹³Hata ukasigharika mundu umweri kwa ikumi, huwo saki uchatoteshwa sa mvinje angu mwaloni ghwademwa, na kishiki charo chisigharike kimusi.” Mbeu ielie nicho kishiki charo.