Read TAITA BIBLE – Biblia Ilagho Jiboie Kwa Wandu Wose ISAYA 64 Bible Online

ISAYA 64 - TAITA BIBLE – Biblia Ilagho Jiboie Kwa Wandu Wose bible

ISAYA 64

¹Ndakwarashuagha mlungunyi kusee, eri mighondi ipate kusughusika imbiri kwako;

²seji modo ghukoragha visachi, na kughibonya machi ghichemke, sea kubonye irina jako jimanyike kwa wamaiza wako, na iro mbari ra wandu risughusike imbiri kwako.

³Iji oho korechieghe na maza ra mashiniko, iro disererisuwirieghe, mighondi eresughusikieghe imbiri kwako.

⁴Kufuma kon kala uko ndekuwadie mndungi usikire, angu kuwona Mlungu ungi mzima sa oho uwibonyeragha maza awo wimsuwiriagha.

⁵Oho kwadawikaribisha awo wose wibonyagha hachi kwa kuboilwa, awo wikumbukagha kubonya malagho kara kara na chia rako. Zighana oho korekoghe kwazamilwa ni isi, ela sena dikabonya kubonya kaung'a; dikakaia luma dikibonya iro kaung'a. Da huwo dadima kukia?

⁶Isi diwose dawuya sa mundu useelie, hata hachi redu rose rakaia karakara na nguwo ilushiro; isi diwose daoma sa ilemba, na mawiwi ghedu ghadilaghasha sa kudukwa ni mbeo.

⁷Ndekuwadie hata umweri ujiwangiagha irina jako kwa malombi, hata ungi ukushashiragha moni kukuchea oho kwa wutesia; angu oho kwakuvisire kodu, kwadileghie na kudida kula kwa wundu ghwa mawiwi ghedu.

⁸Hata huwo saki ee BWANA, oho ko Aba odu; isi deeka sa wongo, na oho kooka sa mvimbi; deko kazi ra mikonu yako.

⁹Kusebonye machu putu ee BWANA, hata kusakekumbuka mawiwi ghedu kwa kala. Zighana, kudimanye kukaia diwose isi deko wandu wako.

¹⁰Mizi yako ya wueli eewuya sa kireti, Sioni eewuya kireti, Jerusalemu ikasighwa duu.

¹¹Hekalu yedu ighokie ya wueli, andu weke aba werekukasagha oho, yamerie kukorwa, na kula andu kodu kuboie kwamerie kunonwa.

¹²Kudima wada kurumaghia aighu ya maza iri rose ee Bwana? Kudima wada kunyama kima kukiditirira huwu?