Read TAITA BIBLE – Biblia Ilagho Jiboie Kwa Wandu Wose ISAYA 65 Bible Online

ISAYA 65 - TAITA BIBLE – Biblia Ilagho Jiboie Kwa Wandu Wose bible

ISAYA 65

¹Mlungu ukaghamba, “Nerekoghe tayari kuwitumbulia wandu wiserenilombieghe jingi, na kukufunukua kwa wandu wiserenilolighe. Ngaizera iyo mbari iserejiwangieghe irina japo kwa malombi, ‘Neko aha, ola neko aha.’

²Matuku ghose nadaighorua mikonu yapo kwa wandu wileghie, awo wighendagha kwa chia riseboie; na kunugha mighendo yawo cheni.

³Wandu winivaviragha matuku ghose, wikifunya vizongona vawo a mbuwenyi, na kufukira marumba a matofalinyi.

⁴Wandu wiseagha kidombo a makaburinyi, na kulala andu kwa kivisonyi; wadaaja nguwe na kutumia vilambo vawo kunywa supu ya vindo viseelie.

⁵Nawo wawizera wambao, ‘Kaienyi kula nesi, msedisoghodere; kwa kukaia isi daelie.’ Wandu awa wakaia sa mosi mbuonyi kwapo na modo ghuserimikagha matuku ghose.

⁶“Olenyi ilagho iji jaandikilo imbiri yapo, Sichaanyama kima ela nichalipia, ee nichawikaba kunughana na mawiwi ghawo;

⁷mawiwi ghawo na mawiwi gha weke ndee, waghamba BWANA; kwa kukaia wakorie marumba aighu ya mighondi mibaa, wikanimenya aighu ya mighondi mitini. Kwa huwo nichawipimia na kuwilipa kwa wundu ghwa mabonyo ghawo gha kala.”

⁸BWANA waghamba huwu, “Sa iji koni changa cha zabibu chiwonekagha na divei imu, nao wandu wighambe, ‘Kusechinone, kando kamu kaduagha andenyi,’ ni huwo koni nichaabonya kwa wundu ghwa wadumiki wapo; sichaawitotesha wose.

⁹Nichareda kivalwa cha Israeli na cha Juda, wandu wa ifwa ja iyo mighondi yapo, awo wasaghulwa wapo wichajipata ijo ifwa, na wadumiki wapo wichakaia aho.

¹⁰Sharoni ichawuya andu kolishira ng'ondi, na Vololo ya Akori ichawuya andu kodimishira ng'ombe ra wandu wapo werenilolieghe.

¹¹Ela ndeichaakaia huwo konyu inyo munisighagha ini, na kuleghatala ugho mghondi ghwapo ghwa wueli; inyo mtasagha mlungu Bahati, na mlungu Ndengwa.

¹²Nichammbikia kufwa wudenyi na inyo mmbose mchabwaghwa, kwa kukaia iji neremmbangieghe, ndemoredikieghe; hata ndemorenisikireghe iji nerekoghe ngideda; ela morebonyereghe wuwiwi mesonyi kwapo, na kusaghua agho nisereghikundieghe.”

¹³BWANA waghamba huwu, “Olenyi wadumiki wapo wichaja, ela inyo mchakaia njala; wadumiki wapo wichanywa, ela mchakaia kau; wadumiki wapo wichaboilwa, ela inyo mchafushwa waya.

¹⁴Wadumiki wapo wichabora wikiboilwa ngolonyi, ela inyo mchakema mkiwawa ngolonyi; nenyo mchalila mkikaia na luwawo lubaa rohonyi.

¹⁵Wasaghulwa wapo wichatumia irina jenyu kwa kuwasira njowe, na ini BWANA Mlungu nicham'bwagha inyo; ela wadumiki wapo nichawineka irina izima.

¹⁶Eri uo mundu ose ukundagha irasimio isangenyi, ujipate kwa Mlungu wa loli, na uo ose ubonyagha ighemi isangenyi, ujibonye kwa Mlungu wa loli. Kwa kukaia wasi ghwa kala ghwameria kuliwika, na kusoweka putu imbiri kwapo.”

¹⁷BWANA waghamba, “Olenyi niaumba mlungunyi kuwishi na ndoenyi kuwishi; na maza ra kala nderichaakumbukwa hata kugheshwa anduangi.

¹⁸Ela boilonyi mzume kwa kala na kala kwa wundu ghwa agho nighiumbagha; kwa kukaia niaiumbia Jerusalemu maboilo, na wandu waro wichachulwa ni iseko.

¹⁹Jerusalemu ichaniboia, na wandu wapo wichaniboia; lwaka lwa kulila ndeluchaasikirika kwawo, hata kililo na wasi ghungi ndeghuchaakaia anduangi.

²⁰Ndekuchaakaia na mwana ungi ufwagha uko mkoo, hata mghosi ungi ndechaafwa usekatishire matuku gha wughosi ghwake; kwa kukaia mwana uchazoghua uvike miaka ighana, ima uchefwa; na mghosi ufwagha usevikie miaka ighana, uchatalwa kukaia mkaung'a uwadilo ni njowe.

²¹Wichaagha nyumba na kukaia andenyi yaro, nawo wichawa mizabibu na kuja matunda gharo.

²²Ndewichaagha nyumba nao riwuekailwa ni wandu wazima, hata ndewichaawa viro na vindo varo vijigho ni wandu wazima. Wandu wapo wichadua moyo miaka mingi sa midi, na wasaghulwa wapo wichaboilwa luma ni kazi ra mikonu yawo.

²³Ndewichaabonya kazi ya duu, hata wana wawo wichaawiva ndewichaapatwa ni mawiwi ghangi, angu wichakaia kivalwa chirasimilo cha BWANA andwamweri na wana wawo.

²⁴Nichawidika imbiri wiseniwangie, na hata iji wisemerie kunilomba nichakaia nameria kusikira.

²⁵Kikwau na mwana wa ng'ondi wichajanya, na shimba ichaja nyasi sa ng'ombe, hata teri ichawuya vindo va choka. Richakaianya kuseko na kushoghonuana angu kunona kilambo chingi aighu ya kula andu kwa wueli mghondinyi kwapo.”