Read TAITA BIBLE – Biblia Ilagho Jiboie Kwa Wandu Wose WALAWI 10 Bible Online

WALAWI 10 - TAITA BIBLE – Biblia Ilagho Jiboie Kwa Wandu Wose bible

WALAWI 10

¹Nao wana wa Haruni, Nadabu na Abihu wikawusa kula umu luwigha lwake, na kukumbiria maka gha modo andenyi yaro; wikakumbiria marumba na kumfunyira BWANA. Ela ghuja modo ndeghorekoghe ghwa wueli, kwa kukaia BWANA nderelaghirieghe anduangi.

²Niko modo ghukasea kufuma kwa BWANA, ghukawikora wikafwa imbiri ya BWANA.

³Nao Musa ukamzera Haruni, “Huwu niko BWANA oreghoragha, ‘Nichakuwonyera ini moni kukaia mweli kwa kula mundu unisoghoderagha, nani nichanekwa wubaa imbiri ya wandu wose.’” Haruni ukanyama kima chake.

⁴Niko Musa ukawiwanga Mishaeli na Elizafani wana wa Uzieli, awue wake Haruni, ukawizera, “Choonyi, muinje mimbi ya weke mwamayo ifume Hemenyi ya Wueli, muighenje shighadi ya kambi.”

⁵Niko wikacha na wikawadia rija nguwo rawo wererwaeghe, wikaiduka na kuifunya shighadi ya kambi sa iji koni Musa oreghorieghe.

⁶Musa ukamzera Haruni na wana wake Eleazari na Ithamari, “Msakesigha maridia ghenyu ghiseshanulo, hata msakerashua nguwo renyu kuwonyera wei moko na wasi mchefwa na kuredia izungu iji jose machu gha BWANA; ela wanyinyu icho kinyumba chose cha Israeli, wadima kubonya ifwa kwa wundu ghwa ugho modo ghuredelo ni BWANA ghukabwagha.

⁷Nenyo msakefuma shighadi ya iyo Hema ekwania mchefwa; kwa kukaia mwamerie kudungwa mavuda na kuwikwa wakfu kwa BWANA.” Wikabonya huwo sa iji koni werelaghiriloghe ni Musa.

⁸BWANA ukamzera Haruni,

⁹“Iji oho na wana wako mwakangia andenyi ya Hema ekwania, msenyo divei angu chofi mchefwa, iyo ichakaia ni sharia ya kala na kala vivalwa venyu vose.

¹⁰Mmbonyere wuchumbano aghadi ya vilambo va wueli vizima vose, vielie na viseelie;

¹¹na oho kuchawifundisha wandu wa Israeli sharia rose nimghorie kwa kumtumia Musa.”

¹²Musa ukamzera Haruni na awo wana wake wisigharikie, Eleazari na Ithamari, “Wusenyi ivo vindo va mafunyo gha viro visigharikie, ivo verefunyiroghe vikaie vizongona vekora kwa BWANA, muvije viseko na chachu aho kaavui na madhabahu; angu ni vindo vieleshero loli loli;

¹³mchavijia aho andu kueleshero, kwa kukaia ni ifungu jenyu na ifungu ja wana wenyu jifumagha kwa mafunyo gha vizongona vekora kwa BWANA, angu huwo niko nerelaghiriloghe ni BWANA.

¹⁴Ela kidari chisughusiro na bara iyo ifunyiro kwa BWANA kwa wundu ghwa wakohani, mwadima kuvijia andu uko kose kuelie, oho na wana wako wa womi na wa waka mkwanye, angu ni ifungu jako na wana wako jifumagha kwa vizongona va mapatano vifunywagha ni wandu wa Israeli.

¹⁵Iyo bara na kidari chisughusiro, vikakaredwa viredwanye na mavuda gha kizongona chekora, na kusughuswa kukaia kizongona chesughuswa; navo vichawuya venyu na wana wenyu mkwanye, angu ni ifungu jenyu ja kari kose sa iji koni BWANA orelaghirieghe.”

¹⁶Musa ukakotia malagho gha ija mburi erefunyiroghe ikaie kizongona kwa wundu ghwa kaung'a, nao ukaghorelwa kukaia yamerie kukorwa. Ukajokwa ni machu aighu ya Eleazari na Ithamari, awo wana wa Haruni weresigharikieghe; ukaghamba,

¹⁷“Kwaki mserejagha icho kizongona kwa wundu ghwa kaung'a, aja Andu kwa Wueli? Ni vindo va wueli loli loli; nenyo mwamerie kunekwa, mpate kuridwa kaung'a ra wandu wose, na kubonya mapatano imbiri ya BWANA.

¹⁸Zighanenyi bagha yake ndeiredelo kondenyi kwa Andu kwa Wueli. Kwa loli erefwanieghe muije aho Andu kwa Wueli sa iji neremlaghirieghe.”

¹⁹Nao Haruni ukamzera Musa, “Ola idime wafunya kizongona chawo kwa wundu ghwa kaung'a na kizongona chawo chekora kwa BWANA; sena hoku napatiro ni iri maza rose! Saki ngera idime nedeeja icho kizongona kwa wundu ghwa kaung'a uko BWANA waboilwagha?”

²⁰Nao iji Musa wasikira agho, ukakatwa.