Read TAITA BIBLE – Biblia Ilagho Jiboie Kwa Wandu Wose WALAWI 11 Bible Online

WALAWI 11 - TAITA BIBLE – Biblia Ilagho Jiboie Kwa Wandu Wose bible

WALAWI 11

¹Niko BWANA ukawizera Musa na Haruni,

²“Muwizere wandu wa Israeli huwu, Iri niro nyamandu rejighwa aghadi ya nyamandu rose riko ndoenyi.

³Nyamandu rose riko na kochokocho ribarikie na kuwaghika, rikeragha vindo vawo na kuvidafuna sena, iro nyamandu mwadima kurija.

⁴Elaima, aghadi ya iro nyamandu rikeragha, na kukaia na kochokocho ribarilo risewaghikie, mseje iri: Ngamila angu ikeragha ela kochokocho rake nderiwaghikie, iyo ni nyamandu iseelie konyu.

⁵Njiwu rakeragha vindo vawo, ela nderiwadie kochokocho riwaghikie, mseje; ni nyamandu iseelie.

⁶Kwaru wakeragha vindo vake, ela ndewadie kochokocho, mseje, ni nyamandu iseelie.

⁷Nguwe yawadie kochokocho riwaghikie ela ndeikeragha vindo vake, mseje, ni nyamandu iseelie konyu.

⁸Nyamandu iri rose mserije, hata gharia rawo mseriadade, ni nyamandu riseelie konyu.

⁹“Nyamandu rose ra machinyi reja ni iri: Icho chose chiko na mapezi na makoko mwadima kuja, chikaiagha baharinyi angu medenyi.

¹⁰Ela nyamandu rose risene mapezi na makoko, rikaiagha baharinyi na medenyi, nderielie; mseje.

¹¹Richadua wuchafu konyu, mserije, hata gharia rawo mseriadade.

¹²Nyamandu rose ra machinyi riko moyo risewadie mapezi angu makoko mserije.

¹³“Iri niro nyonyi riseelie, risedimagha kujighwa, naro ni: indu, nderi na mbungu,

¹⁴kisangangoju, luwighi na vichuku vake;

¹⁵kula ngorusa na vichuku vake,

¹⁶nyagha, kungumuzi, mashanda na vichuku vake;

¹⁷mkungi na iro rifwanane nagho;

¹⁸mnyange, igembe-gembe, nderi ya kichuku chimu,

¹⁹korongo, koi koi na kichuku chake, hudi hudi na iososi.

²⁰“Wadudu wose wiko na maghu awa wiburukagha ni wuchafu konyu;

²¹ela awo wiko na maghu ana na ndangachu rerama, mwadima kuwija.

²²Iri mwadima kuja: zighe, na vichuku varo; mwaparangia na vichuku varo; na weke mwapazi na vichuku varo.

²³Ela wadudu wose wa maghu ana wiburukagha ni wuchafu konyu.

²⁴“Na mundu uo ose uchaadada gharia ra nyamandu iri uchakaia useelie hata luma kwa kenyi;

²⁵na uo ose uchaadwa kipande cha gharia yaro, suti uoghoshe nguwo rake, nao utalo useelie hata luma lwa kenyi.

²⁶Kula nyamandu iko na kocho kocho risebarilo, na kuwaghika, hata isekeragha na kudafuna vindo vake, ndeielie konyu; uo ose uchaariadada uchakaia useelie.

²⁷Na iro rose ra maghu ana righendagha na vala vawo, nderielie konyu. Uo ose uchaadada gharia rawo, uchakaia useelie hata luma lwa kenyi.

²⁸Na uo udukagha gharia rawo, suti uoghoshe nguwo rake, sena uchakaia useelie hata luma lwa kenyi, iro nderielie konyu.

²⁹“Na iri naro ni wuchafu konyu. Shimandu rose riavuagha andoenyi; weke mwacheche, mbewa, wukanda na vichuku varo;

³⁰weke mwalukandua, weke mamba, weke mwaluchorongo, na malunji.

³¹Shimandu iri ni wuchafu konyu, na uo ose uchaariadada gharia rawo, uchakaia useelie hata luma lwa kenyi.

³²Gharia rawo rikapotokia kilambo chingi, chichakaia chiseelie; chikaiagha ni m'bau, nguwo, kishoo, angu igunia, na kilambo icho chose chitumilwagha kwa wundu ghungi, suti chioghosho, sena chitalo kukaia chiseelie hata luma lwa kenyi, ima chicherumirikia kukaia chaela.

³³Ingi ya iro shimandu, ikapotokia kilambo chingi cha wongo, icho chose chiko andenyi ya icho kilambo, chichakaia chiseelie; na icho kilambo chichabarwa.

³⁴Icho chose chikoghe cheja, chikatonyerwa ni machi ghafuma kwa icho kilambo, chichakaia chiseelie, machi ghose ghifumagha kwa icho kilambo, ghisenyugho; ndeghielie.

³⁵Kilambo icho chose chikapotokelwa ni shimandu ifue, chichatalwa kukaia chiseelie; ikaiagha na iriko ja wongo angu ovuna, suti vibaro; vichakaia viseelie konyu.

³⁶Elaima, ndoria ra machi angu chombo cha wongo chiwadie machi vichakaia vielie, ela vilambo ivo vose vichaadadana na gharia ra iro shimandu, vichakaia viseelie.

³⁷Na kipande chingi cha iyo gharia chikapotokia mbeu ewalwa, iyo mbeu ichakaia ielie;

³⁸ela iyo gharia ikapotokia mbeu idungilo machi, iyo mbeu ichakaia iseelie konyu.

³⁹“Nyamandu ingi ijighwaghwa ikafwa, na mndungi uwade gharia yake, uchakaia useelie hata luma lwa kenyi;

⁴⁰na uo ose uchaaja nyama yake, uchaoghosha nguwo rake, sena uchakaia useelie hata luma lwa kenyi; na wokoni, uo uchaadwa gharia ya iyo nyamandu, uchaoghosha nguwo rake, sena uchakaia useelie hata luma lwa kenyi.

⁴¹“Kula shimandu iavuagha andoenyi ni wuchafu; mseije.

⁴²Iyo yose isololokagha na kifu chake, angu kughenda kwa maghu ana angu maghu mengi; shimandu rose riavuagha andoenyi mserije; ni wuchafu.

⁴³Msekulushe inyo mmbeni kwa kuja iro shimandu.

⁴⁴Angu ini ne BWANA Mlungu onyu; kwa huwo mukueleshe mmbeni, mkaie muelie, angu ini ne Mweli.

⁴⁵Ini ne BWANA, uo oremfunyireghe isanga ja Misri, eri nipate kukaia Mlungu onyu, kwa huwo mchakaia muelie angu Ini ne Mweli.

⁴⁶“Ihi niyo Sharia ewonyera aighu ya nyamandu, nyonyi, icho chose chiko moyo chighendagha machinyi, na kula shimandu iavuagha andoenyi;

⁴⁷mpate kuvisasawua aghadi ya iro rielie na iro riseelie; iro riko rejighwa, na iro riseko rejighwa.”