Read TAITA BIBLE – Biblia Ilagho Jiboie Kwa Wandu Wose WALAWI 15 Bible Online

WALAWI 15 - TAITA BIBLE – Biblia Ilagho Jiboie Kwa Wandu Wose bible

WALAWI 15

¹BWANA ukawizera Musa na Haruni,

²“Muwizere wandu wa Israeli kukaia mndungi wa womi ukakafumwa ni wufia mumbinyi ghwake ghwa womi, uchatalwa kukaia useelie.

³Sharia yaro ichakaia huwu: Ikakaia wufia ugho ghwawuyafuma angu ikaie ghwaleka kufuma, uchatalwa kukaia useelie.

⁴Ukaseria wuli ghungi ghuchakaia ghuseelie, na icho chose uchaachiseria chichakaia chiseelie.

⁵Uo ose uchaadada wuli ghwake, uchaoghosha nguwo rake, na kukuoghosha uo moni kwa machi, sena uchatalwa kukaia useelie hata luma lwa kenyi.

⁶Na uo ose uchaaseria kilambo chaserelwa ni uo mundu ufumwagha ni wufia, uchaoghosha nguwo rake, na kukuoghosha uo moni kwa machi, sena uchatalwa kukaia useelie hata luma lwa kenyi.

⁷Na uo ose uchaamuadada, uchaoghosha nguwo rake, na kukuoghosha uo moni kwa machi; sena uchatalwa kukaia useelie hata luma lwa kenyi.

⁸Mundu ufumwagha ni wufia, ukamchuya mndungi uelie mada, suti uo mundu uoghoshe nguwo rake, na kukuoghosha uo moni kwa machi; sena uchatalwa kukaia useelie hata luma lwa kenyi.

⁹Itandiko jingi jeseria angu kifumbi, chikaserelwa ni mundu ufumwagha ni wufia, chichakaia chiseelie.

¹⁰Mndungi ukaadada icho kilambo chaserelwa, uchakaia useelie hata luma lwa kenyi. Na mndungi ukadwa kilambo chingi chaserelwa ni uo mundu, suti uoghoshe nguwo rake, na kukuoghosha uo moni kwa machi; sena uchatalwa kukaia useelie hata luma lwa kenyi.

¹¹Mndungi ukawadwa na vala viseoghoshero ni uo mundu ufumwagha ni wufia, suti uoghoshe nguwo rake, na kukuoghosha uo moni kwa machi; sena uchatalwa kukaia useelie hata luma lwa kenyi.

¹²Kilambo cha wongo chikawadwa ni mundu ufumwaghwa ni wufia, suti chibaro, ukawada fuwa, suti ioghosho.

¹³“Uo mundu ukaboa uko kufumwa ni wufia kwake, uchaweseria matuku mfungade, niko uchaoghosha nguwo rake, sena ukuoghoshe uo moni kwa machi ghawuyaida; nao uchaela.

¹⁴Ituku ja wunyanya, uchareda tagho iwi ra mbughi angu maringo mnyangonyi ghwa Hema ekwania, na kurineka mkohani.

¹⁵Mkohani uchafunya imu ikaie kizongona kwa wundu ghwa kaung'a na imu kwa wundu ghwa kizongona chekora, nao uchabonya mapatano kwa wundu ghwa uo mundu imbiri ya BWANA kwa wundu ghwa uko kufumwa ni wufia kwake.

¹⁶“Mundu ukafumwa ni mbeu rake ra kiwomi, uchakuoghosha mumbi ghwake ghose, nao uchatalwa kukaia useelie hata luma lwa kenyi.

¹⁷Nguwo ingi angu kishoo, chikadikilwa ni iro mbeu, suti chioghosho; sena chichatalwa kukaia chiselie hata luma lwa kenyi.

¹⁸Mndungi ukalala na muka hata ufumo ni mbeu rake, suti wose wawi wikuoghoshe kwa machi; nawo wichatalwa kukaia wiseelie hata luma lwa kenyi.

¹⁹“Muka ukangia merinyi, uchakaia useelie kwa matuku mfungade. Uo ose uchaamuadada uchakaia useelie hata luma lwa kenyi.

²⁰Icho chose chichaalalilwa angu kuserelwa ni uo muka iyo ngelo, chichakaia chiseelie.

²¹Uo ose uchaadada wuli ghwake, uchaoghosha nguwo rake na kukuoghosha uo moni kwa machi; sena uchakaia useelie hata luma lwa kenyi.

²²Uo ose uchaadada kilambo chingi chaserelwa ni uo muka, suti uoghoshe nguwo rake, na kukuoghosha uo moni kwa machi; sena uchakaia useelie hata luma lwa kenyi.

²³Ikakaia ni wuli angu kilambo chingi cheseria chaserelwa ni uo muka, na mundu uchiadade, uchakaia useelie hata luma kwa kenyi.

²⁴Mndungi ukakulusha kwa kukaianya kimumbi na uo muka, uchakaia useelie kwa matuku mfungade, na wuli uchaaghulalia ghuchakaia ghuseelie.

²⁵“Ngera muka wafumwa ni bagha kuchumba matuku ghake gha meri, uchakaia useelie ngelo rake rose ra kufumwa ni bagha kwake, sa iji koni ukaiagha ngelo uko merinyi.

²⁶Kula wuli uchaaghulalia angu kifumbi uchaachiseria, chichakaia chiseelie ngelo rose ra kufumwa ni bagha kwake.

²⁷Mndungi ukaadada vilambo vake, suti uoghoshe nguwo rake, na kukuoghosha uo moni kwa machi; sena uchakaia useelie hata luma lwa kenyi.

²⁸Ela uo muka ukameria kuela, uchaweseria matuku mfungade, na nyuma ya agho matuku uchakaia uelie.

²⁹Ituku ja wunyanya, uchawada tagho iwi ra mbughi angu maringo, na kurireda kwa mkohani aho mnyangonyi ghwa Hema ekwania;

³⁰na mkohani uchafunya imu kizongona kwa wundu ghwa kaung'a, na imu kwa wundu ghwa kizongona chekora, nao uchabonya mapatano kwa wundu ghwa uo muka imbiri ya BWANA kwa wundu ghwa uko kufumwa ni bagha kwake.”

³¹Huwu niko mchaawilindia wandu wa Israeli na wuchafu, eri wisechefwa kwa wundu ghwa kulusha Andu kwapo Kokaia kuko aghadi kwawo.

³²Ihi niyo sharia ya mundu ulushiro ni kufunya wufia, angu kufumwa ni mbeu rake ra kiwomi.

³³Huwo koni kwa muka wakaia mkongo ofumwa ni bagha; na kwa mndwawomi ufumwagha ni wufia kulala na muka ngelo uko useelie.