Read TAITA BIBLE – Biblia Ilagho Jiboie Kwa Wandu Wose WALAWI 17 Bible Online

WALAWI 17 - TAITA BIBLE – Biblia Ilagho Jiboie Kwa Wandu Wose bible

WALAWI 17

¹BWANA ukamzera Musa,

²“Ghoria Haruni, na wana wake, na wandu wose wa Israeli kukaia, huwu niko BWANA walaghira.

³Mndungi wa wandu wa Israeli, ukabwagha ng'ombe, ng'ondi, angu mburi ikaie kizongona, ikaiagha ni andenyi angu shighadi ya kambi,

⁴kuseko na kuireda mnyangonyi ghwa Hema ekwania, ipate kukaia inosi imbiri ya BWANA, andenyi ya Andu Kokaia kwa BWANA, mundu uo uchatalwa kukaia wadia bagha kwa makosa; nao uchatalwa kukaia mkosi, na kutanywa na wandu wake.

⁵Agha malagho ni kwa wundu ghoghiria wandu wa Israeli wawuyafunyira vizongona vawo cha shighadi ya kambi, eri wipate kuvireda kwa mkohani mnyangonyi ghwa Hema ekwania; na kuvifunya vikaie vizongona vepatanisha kwa BWANA.

⁶Mkohani upate kumichira madhabahu ya BWANA bagha, aho mnyangonyi ghwa Hema ekwania, na kukora mavuda ghikaie marumba mecha kwa BWANA.

⁷Wandu wa Israeli ndewichaafunyira vizongona vawo shighadi ya kambi sena, kwa kubwaghia pepo na kulegha kaia waloli kwa BWANA; ela wichawadia momu ughu kwa kala na kala, vivalwa vawo vose.

⁸“Kuchawilaghira kukaia, mndungi wa wandu Israeli, angu mghenyi uko aghadi kwawo, ukafunya kizongona chekora, angu kizongona chingi kizima,

⁹kuseko na kuchireda mnyangonyi ghwa Hema ekwania, eri chipate kufunywa kwa BWANA; mundu uo uchatanywa na wandu wake.

¹⁰“Mndungi wa nyumba ya Israeli, angu mghenyi uko aghadi konyu, ukaja bagha iyo yose, ini BWANA nichazamilwa ni uo mundu, nani nichamuinja ufume kwa wandu wapo.

¹¹Kwa kukaia irangi ja mumbinyi jeeka andenyi ya bagha, nani namneka bagha madhabahunyi mpate kubonya wupatanisho ghwa kaung'a kwa wundu ghwa roho renyu; angu bagha niyo ibonyagha mapatano, nayo niyo irangi.

¹²Wokoni niko nawizera wandu wa Israeli, na waghenyi wiko aghadi kwawo, kukaia wiseje bagha jingi.

¹³“Huwo koni mndungi wa wandu wa Israeli angu mghenyi uko aghadi kwawo, ukabwagha nyamandu angu nyonyi eja, suti udie bagha yake yose, sena iyo bagha uidunge ndoe.

¹⁴Angu irangi ja kula nyamandu iko moyo jeeka andenyi ya bagha; niko nawizera wandu wa Israeli wiseje bagha ya nyamandu ingi, kwa kukaia irangi ja kula nyamandu jeeka baghenyi, mndungi ukaja bagha uchatanywa na wandu wake.

¹⁵Na uo ose uchaaja nyamandu ifue cheni, angu ibwaghilo ni mmbao, ukaiagha ni muisanga angu mghenyi wawuyakaia aghadi konyu, uchaoghosha nguwo rake, na kukuoghosha uo moni na machi; sena uchakaia useelie hata luma lwa kenyi.

¹⁶Ela ukalegha kuoghosha nguwo rake, angu kukuoghosha uo moni, uchaduka wuwiwi ghwake moni.”