Read TAITA BIBLE – Biblia Ilagho Jiboie Kwa Wandu Wose WALAWI 18 Bible Online

WALAWI 18 - TAITA BIBLE – Biblia Ilagho Jiboie Kwa Wandu Wose bible

WALAWI 18

¹BWANA ukamzera Musa,

²“Kuwizere wandu wa Israeli angu Ini ne BWANA Mlungu onyu.

³Msakebonya seji Wamsiri wibonyagha isangenyi mzawo andu moredueghe, sena msakebonya seji Wakanaani wibonyagha, aho andu nawuyamghenja. Msakenugha mighendo yawo.

⁴Mchawada memu yapo na kunugha malaghiro ghapo, ini ne BWANA Mlungu onyu.

⁵Kwa huwo, mmbwadie sharia rapo na memu yapo, na kwa kubonya huwo mundu uchadua moyo, Ini ne BWANA.

⁶“Mndungi onyu usakesoghoda kaavui na mundu wa kichuku chake kulala nao; Ini ne BWANA.

⁷Kusemsowie ndeyo ishima kwa kulala na mayo, uo ni mayo; kusakelala nao jingi.

⁸Kusakelala na mka-ndeyo; ugho ni wuduu ghwa ndeyo.

⁹Kusakelala na mwanyinyu wa waka, mwai wa ndeyo angu wa mayo; ikaiagha oovailwa mzinyi angu andu kuzima.

¹⁰Kusakelala na wawayo, mwai wa mwana wako wa womi angu wa mwana wako wa waka, kwa kukaia wuduu ghwawo ni wuduu ghwako ghoni.

¹¹Kusakelala na mwai wa mka-ndeyo uvalo ni ndeyo; uo ni mwanyinyu wa waka.

¹²Kusakelala na mruna-ndeyo; uo ni bagha imweri na ndeyo.

¹³Kusakelala na mruna-mayo; uo ni bagha imweri na mayo.

¹⁴Kusakelala na mruna ndeyo mkake; huwo ni kughamba kusefunukuo wuduu ghwa mkake; uo ni mayo.

¹⁵Kusakelala na mka-mwanwako; uo ni muka wa mwana wako, kusefunukuo wuduu ghwake.

¹⁶Kusakelala na mka-mwanyinyu; ugho ni wuduu ghwa mwanyinyu.

¹⁷Kusakelala na muka, sena kuwuelala na mwai wake; hata kusakelala na mwai wa mwana wake wa womi, mwai wa mwai wake, awo ni wakichuku wa kaavui; ugho ni wuwiwi ghuchumbie.

¹⁸Hata kusewuse mlamu wako kukaia mkako, ngelo mruna uko moyo; kusakelala nao.

¹⁹“Kusemsoghodere muka kulala nao ngelo uko merinyi.

²⁰Kusekulushe kwa kulala na muka wa mmbenyu.

²¹Kusefunye mwana ungi wako kukorwa kizongona kwa mlungu Moleki na kujilusha irina ja Mlungu wako; Ini ne BWANA.

²²Kuselale na mndwawomi seji ni muka, ni wuwiwi ghuchumbie.

²³Kuselale na nyamandu ingi, hata muka ungi usekufunye kulala na nyamandu; ni kulaghaya kubaa uko.

²⁴“Jingi msekulushe mmbeni kwa maza iri, angu iro mbari nawuyariwinga imbiri konyu wadakulusha kwa kuribonya;

²⁵hata isanga jikalua, nani ngajikaba kwa wundu ghwa ugho wuwiwi ghawo, na isanga jikawuya seji jialegha wandu waro.

²⁶Ela inyo mchawadia sharia rapo na memu yapo, hata msebonye ghangi gha agho mawiwi; ikaiagha ni muisanga angu mghenyi uko aghadi konyu.

²⁷(Angu mawiwi agha ghose gherebonyeroghe ni wandu werekoghe andenyi ya iji isanga imbiri konyu; na isanga jikalushwa.)

²⁸Msebonye sa awo wandu, isanga jichemlegha, seji jerewileghieghe awo wandu wa mbari erekoghe imbiri konyu.

²⁹Angu uo ose uchaabonya jingi ja agho mawiwi, uchatanywa na wandu wa Mlungu.

³⁰Kwa huwo, mmbwadie malaghiro ghapo hata na jingi msakenugha tabia mbiwi ra wandu werekoghe imbiri yenyu; jingi msekulushe kwa iro tabia, Ini ne BWANA Mlungu onyu.”