Read TAITA BIBLE – Biblia Ilagho Jiboie Kwa Wandu Wose WALAWI 20 Bible Online

WALAWI 20 - TAITA BIBLE – Biblia Ilagho Jiboie Kwa Wandu Wose bible

WALAWI 20

¹BWANA ukamzera Musa,

²“Zera wandu wa Israeli huwu, Mndungi wa wandu wa Israeli, angu mghenyi uko aghadi konyu, ukafunya wana wake kwa mlungu Moleki, uchalaswa na magho ni wandu wa Israeli hata ufo.

³Ini moni nichalwa na uo mundu, nao uchatanywa na wandu wapo, angu waneka mlungu Moleki wana wake, na kuinona Hema ya Wueli na irina japo ja Wueli.

⁴Wandu wa isangenyi wikamvisa uo mundu, nao wimsighe wisem'bwaghie,

⁵nichalwa na uo mundu na nyumba yake yose, chiaimweri na awo wandu wiwadane nao kwa kuleghakaia waloli kwapo hata wikatasa Moleki, nani nichamtanya na wandu wapo.

⁶“Mndungi ukaghenda kulola njama kufuma kwa walaghui wa pepo ra wafu na wasawi, nichalwa nao, nani nichamtanya na wandu wapo.

⁷Mkueleshe, mkaie waeli angu Ini ne BWANA Mlungu onyu.

⁸Mmbwadie memu yapo na kunugha malaghiro gharo; Ini ne BWANA uo umueleshagha inyo.

⁹“Mundu ukamuewia ndee angu mae, uchabwaghwa; na bagha yake ichakaia aighu yake moni.

¹⁰“Mndungi ukabonya wulaki na muka wa mmbao, waja walaki wose, mndwawomi na muka wibwaghwa.

¹¹Mundu ulalagha na mka-ndee, waafunukua wuduu ghwa ndee; wose wawi wibwagho, na bagha yawo ichakaia aighu kwawo.

¹²Mundu ukalala na mka-mwanwake, wose wawi wichabwaghwa; wabonya mashaka mabaa, na bagha yawo ichakaia aighu kwawo.

¹³Mundu ukalala na mdwawomi mmbao sa kulala na muka, wose wawi wabonya ilagho jizamie nandighi, wibwagho; na bagha yawo ichakaia aighu kwawo.

¹⁴Mundu ukalowua muka chiaimweri na mae, wabonya wuwiwi ghuchumbie, wose wadadu wichakorwa modonyi, eri ilagho ijo jisakebonyeka konyu sena.

¹⁵Ngera mndungi walala na nyamandu ubwagho; na iyo nyamandu ibwagho.

¹⁶Muka ungi ukaisoghodera nyamandu na kulala nayo ubwagho, na iyo nyamandu ibwagho; bagha yawo ichakaia aighu kwawo.

¹⁷“Mundu ukamlowua mruna wa waka, uvalo ni ndee, angu uvalo ni mae na kulala nawo, ni ilagho ja waya nandighi, wichainjwa wandunyi, angu walala na mruna wa waka, nao uchaduka wuwiwi ghwake moni.

¹⁸Mundu ukalala na muka uko merinyi na kummanya kimumbi, waachuria kurucha kwake, na muka nao wafunukua kurucha kwake; wose wawi wichainjwa na kutanywa na wandu wawo.

¹⁹“Kuselale na mruna mayo angu na mruna ndeyo, huwo ni kufunukua wuduu ghwa mundu uko bagha imweri na oho; mkabonya huwo, mmbose mchaduka wuwiwi ghonyu.

²⁰Mundu ukalala na mka-awue, wafunukua wuduu ghwa awue, nawo wichaduka wuwiwi ghwawo weni; wichafwa wisene wana.

²¹Mundu ukammbusa mka-mruna, ugho ni wuchafu, waafunukua wuduu ghwa mruna; wichafwa wisene wana.

²²“Kwa huwo, mchaiwadia memu yapo na kunugha malaghiro gha sharia rapo, eri ijo isanga nawuyamghenja kujikaia jisakemlegha.

²³Msakenugha tabia ra wandu nawuayawifunya imbiri konyu angu kwa kubonya agho mawiwi, niko winizamie.

²⁴Ela namerie kumlaghira kukaia nichamneka ijo isanga jinorie; Ini ne BWANA Mlungu wako, uo orekufunyireghe na kukutanya na wandu wazima.

²⁵Kwa huwo mmanyeghe nyamandu rielie na riseelie, nyonyi rielie na riseelie. Msakekulusha kwa nyamandu angu nyonyi, angu kilambo chingi chiko ndoenyi icho neremlaghirieghe kuchitala kukaia chiseelie.

²⁶Mkaie waeli wapo, angu Ini BWANA ne Mweli, nani namtanyire inyo kufuma kwa wandu, mpate kukaia wapo.

²⁷“Mndungi wa womi angu wa waka, ukakaia mlaghui olola njama kwa roho ra wandu wifue, angu ukakaia msawi, wichabwaghwa kwa kulaswa na magho, weekushekeria kufwa weni.”