Read TAITA BIBLE – Biblia Ilagho Jiboie Kwa Wandu Wose WALAWI 21 Bible Online

WALAWI 21 - TAITA BIBLE – Biblia Ilagho Jiboie Kwa Wandu Wose bible

WALAWI 21

¹BWANA ukamzera Musa, “Kuwighorie wakohani, awo wana wa Haruni kuwizere angu mndungi wawo usekulushe kwa kungia ifonyi ja mkichuku,

²isaakaia wafuilwa ni mndumu wa kichuku chake cha kaavui sa mae, ndee, mwana wake wa womi angu wa waka, mruna wa womi,

³angu mruna wa waka uselowolo ukaiagha kwake usene mndwawomi; kwa uo, wadima kukulusha.

⁴Uo usekulushe kwa mariko gha wandu wiloworane anduangi.

⁵“Mkohani ungi usedumbuo iridia jake, hata sombe rake, angu kukudema-dema mumbi ghwake kwa kuwonyera wei oko na wasi ghofuilwa.

⁶Wakohani wichakaia waeli kwa Mlungu wawo; kwa kukaia awo wafunyagha vizongona vekora na mkate kwa Mlungu wawo, kwa huwo suti wikaie waeli.

⁷“Mkohani uselowuo muka orekoghe ilaya, angu orekoghe osela-sela; hata uselowuo muka uleghelo, kwa kukaia mkohani ni mweli wa Mlungu wake.

⁸Wandu wimtale mkohani kukaia mweli kwa kukaia wafunyagha mafunyo gha vindo kwa Mlungu. Ini ne BWANA, Ini ne Mweli; nani nadabonya wandu wapo wikaie waeli.

⁹Mwai wa mkohani ungi ukakulusha uo moni kwa kuwuya ilaya, waamfusha ndee waya; nao uchabwaghwa kwa kukorwa na modo.

¹⁰“Mkohani M'baa wamerie kushingwa mavuda chongonyi kwake, ukawikwa wakfu upate kurwa marwao gha wukohani. Kwa huwo, jingi usesighe iridia jake usejishanue, hata userashuo nguwo rake kwa wundu ghwa wasi ghofuilwa.

¹¹Mkohani usengie nyumba ingi iko na mundu ufue, uchelushwa; hata ngera ni ndee angu mae wafwa.

¹²Usefume Hemenyi ya Wueli, hata kukulusha Andu kwapo kwa Wueli, ini Mlungu wake; kwa kukaia oko na kuja kushingwa mavuda, na kuja kuwikwa wakfu kwapo, ini Mlungu wake.

¹³Uchalowua mwai uelie.

¹⁴Si muka ufuilo, angu uleghelo, angu orekoghe ilaya; angu unonelo; ela uchalowua mwai uelie kufuma kwa kichuku chake cheni;

¹⁵eri wana wake wisechetalwa kukaia wiseelie aghadi ya wandu wake kwa wundu ghwa awo waka; Ini ne BWANA, nani namerie kumsaghua ukaie Mkohani M'baa.”

¹⁶BWANA ukamzera Musa

¹⁷“Mzere Haruni huwu, Mndungi wa kichuku chako, kivalwa chako chose, uvalo na itiko mumbinyi kwake, usesoghode kufunya kizongona cha vindo kwapo. Ugho ni momu ghwa matuku ghose.

¹⁸Kwa kukaia ndekuwadie mndungi uko na itiko uchaanisoghodera kunifunyira kizongona. Mndungi uko kitungure, mtighini, mkelemeri angu uvalo kisaya;

¹⁹mndungi uko na mkonu ghuchikie angu kughu;

²⁰mndungi uko na fudu[6] angu uko kighosi, hata mndungi uko na iriso jiko mkongo, angu uko na fwali, hata mundu ukabilo stima.

²¹Mndungi wa kivalwa cha Haruni ukakaia na itiko jingi ja mumbinyi sa agho, usesoghode kaavui na BWANA kufunya vizongona vekora; kwa wundu ghwa ijo itiko useche kufunya kizongona cha vindo kwa Mlungu wake.

²²Ela sena wadima kuja ivo vindo vieleshero vifunyiro kwa Mlungu, na hata ivo vieleshero kuchumba.

²³Kwa wundu ghwa uo kukaia na itiko mumbinyi kwake, ndechaasoghoda kaavui na pazia ya wueli angu madhabahu, usechelusha ivo vilambo, angu Ini ne BWANA ueleshagha ivo vilambo.”

²⁴Musa ukawighoria Haruni na wana wake agho malagho, chiaimweri na wandu wose wa Israeli.