Read TAITA BIBLE – Biblia Ilagho Jiboie Kwa Wandu Wose WALAWI 22 Bible Online

WALAWI 22 - TAITA BIBLE – Biblia Ilagho Jiboie Kwa Wandu Wose bible

WALAWI 22

¹BWANA ukamzera Musa,

²“Mzere Haruni na wana wake angu wighineke ishima agho mafunyo ghieleshero nifunyirwagha ni wandu wa Israeli; wiseadade agho mafunyo wiseelie, wisechejilusha irina ja wueli; Ini ne BWANA.

³Mndungi wa kivalwa chenyu chose, ukawada vilambo vieleshero nafunyirwa ni wandu wa Israeli useelie, uchatanywa na wandu wapo. Ihi ni sharia kwa vivalwa venyu vose; Ini ne BWANA.

⁴“Mndungi wa kivalwa cha Haruni uko na sima angu ufumwagha ni wufia, useje ivo vindo vieleshero, hata wameria kueleshwa kufuma kwa wukongo ghwake. Mkohani ungi ukaadada kilambo chingi chiseelie, ngera ni mundu ufue angu mundu ufumwagha ni mbeu rake ra kiwomi,

⁵ikaiagha waadada nyamandu angu mundu, angu icho chose chiseelie,

⁶uo mkohani uchakaia useelie hata luma lwa kenyi, nao ndechaaja ivo vindo vieleshero, hata wameria kukuoghosha uo moni na machi.

⁷Iruwa jikaneng'ena, uchatalwa kukaia waela, nao wadima kuja vindo vieleshero, kwa kukaia ivo ni vindo vake.

⁸Useje nyamandu yafwa cheni, angu yabwaghwa ni nyamandu ya isakenyi, uchekulusha uo moni; Ini ne BWANA.

⁹“Wakohani wose wichawadia malaghiro ghapo, wisechelushwa na kungia kaung'enyi na kufwa kwa wundu ghwa kuleghasikira kwawo; Ini ne BWANA uo uwieleshagha.

¹⁰“Mafunyo ghieleshero ghichajighwa ni wakohani wiekeri; mndungi mzima useje, hata mghenyi ukanyagha na mkohani angu uo uandikilo kazi ni mkohani.

¹¹Ela mzumba wa mkohani umghuye na pesa rake, angu uvailo mzinyi kwake, wadima kuja ivo vindo vinekwaghwa wakohani.

¹²Mwai wa mkohani, ulowolo ni mundu useko wa kichuku cha wakohani, ndedimagha kuja ivo vindo vieleshero.

¹³Ela uo ufuilo ni mumi angu uleghelo, nao ndewadie wana wangi, ela wadakaia ukikusaghika[7] kwa ndee, wadima kuja ivo vindo va wueli vinekwagha ndee uo uko mkohani; ela mndungi useko wa kichuku cha wukohani useje ivo vindo.

¹⁴“Mndungi useko wa kichuku cha wukohani, ukaja ivo vindo usemanyire, suti umlipe mkohani ighuri jaro jose, sena uchurie mirongo iwi kwa ighana ya ighuri ja ivo vindo.

¹⁵Wakohani wiselushe ivo vindo vieleshero nifunyirwagha ni wandu wa Israeli,

¹⁶na kuwishekeria wandu wiseko wakohani wingie makosenyi gheja ivo vindo vieleshero; angu Ini ne BWANA uo uwieleshagha.”

¹⁷BWANA ukamzera Musa,

¹⁸“Mzere Haruni na wana wake chiaimweri na wandu wa Israeli huwu, Mndungi wa wandu wa Israeli, angu mghenyi ukaiagha aghadi kwawo, ukakafunya mafunyo ghake, ngera ni malipo ghelipia ighemi, angu kizongona chafunywa kwapo kukaia inosi kwa wundu ghwa kizongona chekora;

¹⁹eri icho kizongona chirumirilo, mchafunya njau riseko na itiko jingi, angu bauru, angu fwandi.

²⁰Msefunye nyamandu iko na itiko jingi, kwa kukaia ndeichaarumirilwa ni BWANA anduangi.

²¹Mndungi ukafunya kizongona cha mapatano kwa BWANA, kwa wundu ghwa kukatisha ighemi jake, angu ngera waafunya inosi kwa BWANA kufuma kwa mfugho rake, suti chikaie chisewadie itiko jingi; niko chidimagha kurumirilwa ni BWANA.

²²Msemfunyire BWANA nyamandu rifue meso, angu ritighinagha, angu rikelemere, angu rifumwaghwa ni wufia na kukusuwa. Nyamandu rifwane huwo msenifunyire, hata mserikore aighu ya madhabahu, rikaie kizongona kwapo.

²³Kukamfunyira BWANA inosi ja njau angu mwana wa ng'ondi uvalo kisaya, jicharumirilwa, ela ndejichaarumirilwa jikaie kizongona kwa wundu ghokatisha ighemi anduangi.

²⁴Nyamandu yashoghonoka makende ghake, ikaiagha ghaabarika, kurashuka angu kudumbuka, kuseifunye wei ikaie kizongona kwa BWANA isangenyi kwako; kwa kukaia ndechichaarumirilwa ni BWANA.

²⁵Kusefunye nyamandu ingi ifumie kwa mghenyi iko huwo ikaie kizongona cha vindo kwa Mlungu wako; kizongona icho ndechichaarumirikia anduangi, angu chiko na itiko jeshoghonoka.”

²⁶BWANA ukamzera Musa,

²⁷“Ngache ya womi ikavalwa, angu mwana wa ng'ondi, angu ndaghina, suti isigho, ionge mae kwa matuku mfungade; konyuma, wadima kurumirilwa ufunyo kukaia kizongona cha vindo kwa BWANA.

²⁸Kusakebwagha mwana wa ng'ombe angu wa ng'ondi chiaimweri na mae ukaie kizongona ijo ituku jeni.

²⁹Iji kwakafunya kizongona cha chawucha kwa BWANA, kuinughe sharia; eri kupate kurumirilwa.

³⁰Icho kizongona chichajighwa ijo ituku jeni, kindo chingi chisesigharike hata nakesho; Ini ne BWANA.

³¹“Kwa huwo, mchaiwadia memu yapo na kuibonya; Ini ne BWANA.

³²Mselushe irina japo ja wueli, ela nicharumirilwa kukaia mweli aghadi ya wandu wa Israeli; Ini ne BWANA, uo ukueleshagha oho;

³³uo orekufunyireghe isanga ja Misri eri upate kukaia Mlungu wako; Ini ne BWANA.”