Read TAITA BIBLE – Biblia Ilagho Jiboie Kwa Wandu Wose WALAWI 6 Bible Online

WALAWI 6 - TAITA BIBLE – Biblia Ilagho Jiboie Kwa Wandu Wose bible

WALAWI 6

¹BWANA ukamzera Musa,

²“Mndungi ukabonya kaung'a kwa BWANA na kumkalia mmbao kwa maza repokezana angu kwa kummbikia, angu kumuiwia, angu kumkoronga kwa chia ingi;

³angu kumkalia kwa kilambo cherelagharieghe chikawoneka, nao ughemeghe wei ndechiwonekie, angu chia iyo yose zima wadamu wibonyagha kaung'a nayo.

⁴Iji mundu wabonya kaung'a huwo na kuwuya mkosi, uchawunja icho oresokieghe, angu icho orechipatireghe kwa kukoronga, angu icho cherewikiloghe kwake, angu icho cherelagharieghe ima ukachiwona;

⁵angu kilambo chingi chim'bonyere ukaghema kwa tee; uchavilipa vose sena uchurie mirongo iwi kwa ighana aighu yaro na kumneka mundu waro ngelo efunya kizongona chake kwa wundu ghwa makosa.

⁶Nao uchareda bauru iseko na itiko, ikaie kizongona kwa wundu ghwa makosa ghake kwa BWANA, na oho kuchabonya ighuri jaro kunughana na ighuri ja agho matuku.

⁷Na mkohani ucham'bonyera uo mundu mapatano imbiri ya BWANA, nao uchafuilwa wughoma kwa maza iro rose ubonyere na kuwuya mkosi.”

⁸BWANA ukamzera Musa,

⁹“Kuwilaghire Haruni na wana wake huwu, Ihi niyo Sharia ya kizongona chekorwa: Kizongona chekorwa chichakaia modonyi aighu ya madhabahu kio chee hata luma lwa nakesho, na modo ghwaro ghuchakaia ghukiaka madhabahunyi ngelo rose.

¹⁰Mkohani ucharwa ijoho jake ja kitani, na mwadeghu wake wa kitani; nao uchainja ivu ja ugho modo ghwa kizongona madhabahunyi, na kujiwika nambai ya madhabahu.

¹¹Niko uchafunya agho marwao ghake, na kurwa marwao mazima; nao uchafunya ijo ivu cha shighadi ya kambi, na kujidia andu kueleshero kwa wundu ghodiria ivu.

¹²Modo ghwa madhabahu ghuchakaia ghukiaka, ndeghuchaarimishwa; uo mkohani uchakaia ukikumba mbande aighu yaro kula luma lwa nakesho; nao uchakaia ukiwikiria icho kizongona chekora aighu yaro nicha, sena uchakora agho mavuda gha kizongona cha mapatano aighu yaro.

¹³Modo ghwa madhabahu ghuchakaia ghukiaka ngelo rose; ghuserimisho.

¹⁴“Ihi niyo sharia ya kizongona cha viro: Wana wa Haruni, awo wakohani, wichakaia wikichifunya naimbiri ya iyo madhabahu imbiri ya BWANA.

¹⁵Umu wawo uchabegha ngonde ichue ya mufu ghudendere ghwa kizongona cha viro, chiaimweri na mavuda gharo na vilungo vose viko aighu ya kizongona cha viro, nao uvikore vikaie lukumbuso kukaia vaafunywa kwa BWANA, ni irumba icha kwa BWANA.

¹⁶Masighariko gha mufu ghichatumilwa ni Haruni na wana wake; ghuchabonywa mkate ghusewadie chachu na kujilwa Andu kwa Wueli, wazenyi ya Hema ekwania.

¹⁷Ghuseocho na chachu. Nawinekie vizongona vapo vekorwa va viro, vikaie ifungu jawo; ni vindo vieleshero loli loli karakara na vizongona kwa wundu ghwa kaung'a na vizongona kwa wundu ghwa makosa.

¹⁸Matuku ghose ghichagha, kula mwana wa womi wa kivalwa cha Haruni vivalwa vose, uchaja mafungu gha ivo vindo vifunywagha vizongona vekora kwa BWANA. Uo ose uchaaviadada, uchabonywa ukaie mweli.”

¹⁹BWANA ukamzera Musa,

²⁰“Ichi nicho kizongona chichaafunywa ni Haruni na wana wake ngelo kula umu wawo wakawikwa wakfu. Uchamfunyira BWANA kilo imweri ya mufu ghuboie ghukaie kizongona cha viro; nusu kilo nakesho, na nusu kilo nakenyi.

²¹Ugho mufu ghucharanganywa na mavuda na kukangwa kikangonyi, niko ghudumbulo vipande vipande na kufunywa ghukaie kizongona cha viro, ni irumba jinukie nicha kwa BWANA.

²²Matuku ghose ghichagha, kizongona ichi chichafunywa ni kula mvalwa wa Haruni wasaghulwa ukaie Mkohani M'baa. Kizongona icho chichakorwa chose chikaie kizongona chifunyiro kwa BWANA.

²³Kula kizongona cha viro chifunywagha ni mkohani chichakorwa chose, ndechichajighwa anduangi.”

²⁴BWANA ukamzera Musa,

²⁵“Kumghorie Haruni na wana wake: Ihi niyo sharia aighu ya vizongona kwa wundu ghwa kaung'a. Nyamandu yafunywa kizongona kwa wundu ghwa kaung'a, ichabwaghilwa ichia cha magharibi andu iro nyamandu rifunywagha kukaia vizongona vekorwa ribwaghilwagha; iji ni ifunyo jieleshero loli loli.

²⁶Uo mkohani ufunyagha iyo nyamandu kizongona kwa wundu ghwa kaung'a nuo uchaaijia aho andu kueleshero, wazenyi ya Hema ekwania.

²⁷Mndungi angu kilambo chingi chiadadagha nyama ya iyo nyamandu, uchashoghonolwa ni wueli ghwaro, na kilambo chieleshero; na kilambo chingi angu nguwo ingi ikatarikilwa ni bagha ya iyo nyamandu, ichaoghosherwa ahoeni andu kueleshero.

²⁸Ikakaia ni nyungu ya wongo yatumilwa kwa kudeka iyo nyama, ichabwarwa; ela ikakaia yaadekwa na kilambo cha shaba, icho kilambo chichazughulwa na kuoghoshwa kwa machi.

²⁹Kula mundu wa womi uko aghadi ya wakohani, wadima kuja iro nyama; ni vindo vieleshero loli loli.

³⁰Ela kizongona chingi chafunywa kwa wundu ghwa kaung'a, na bagha yaro ikaredwa andenyi ya Hema ekwania, kubonya mapatano kwa wundu ghwa kaung'a andenyi ya Andu Kwa Wueli, nyama raro risejigho; richakorwa kwa modo.”