Read TAITA BIBLE – Biblia Ilagho Jiboie Kwa Wandu Wose WALAWI 8 Bible Online

WALAWI 8 - TAITA BIBLE – Biblia Ilagho Jiboie Kwa Wandu Wose bible

WALAWI 8

¹BWANA ukamzera Musa,

²“Wada Haruni na wana wake, kudo marwao na mavuda ghewika wakfu, na njau efunya kizongona kwa wundu ghwa kaung'a, bauru iwi, na kikapu cha mikate isewadie chachu;

³nao kukwanye izungu ja wandu wose mnyangonyi ghwa Hema ekwania.”

⁴Nao Musa ukabonya sa iji koni BWANA oremlaghirieghe; na izungu jose ja wandu jikakwanyika mnyangonyi ghwa Hema ekwania.

⁵Musa ukajizera izungu ja wandu, “Agha malagho nichaaghibonya nigho BWANA unilaghirie.”

⁶Musa ukamreda Haruni na wana wake, ukawioghosha kwa machi.

⁷Ukamngira ijoho, ukamfunga mkowa, ukamngira nguwo na naivera na kumfunga mkowa ghulukilo nicha kwa wuya.

⁸Ukamngira kisibau cha laghenyi, na kungira Urimu na Thumimu[2] andenyi yaro.

⁹Ukamngira kiremba chongonyi kwake. Na sa iji orenekeloghe momu ni BWANA, ukawikiria chija kibau cha dhahabu naimbiri ya icho kiremba, chiwonyere fwana ya kirumbu cha wueli.

¹⁰Niko Musa ukawada mavuda ghewika wakfu, ukashinga Andu kwa BWANA Kokaia, na vose viko andenyi yaro; ukaviwika wakfu.

¹¹Ukamichira mavuda ghamu madhabahunyi mando mfungade, ukaishinga madhabahu mavuda, na vilambo varo wori; na wokoni beseni na andu kwaro koiwikiria, ukaviwika wakfu kwa BWANA.

¹²Ukamdunga Haruni mavuda chongonyi na kummbika wakfu.

¹³Sena ukawireda wana wa Haruni imbiri, ukawirusha majoho na kuwifunga mikowa na kuwingira kofia sa iji koni BWANA oremnekieghe momu.

¹⁴Niko Musa ukareda njau ikaie kizongona kwa wundu ghwa kaung'a, na Haruni na wana wake wikawikiria mikonu yawo aighu ya chongo cha ija njau ya kizongona kwa wundu ghwa kaung'a.

¹⁵Nao Musa ukaibwagha, ukawada bagha na chala chake ukarishinga rija mbembe inya ra madhabahu na kuielesha; ukadia bagha nandonyi ya madhabahu na kuiwika wakfu ipate kukaia ereda mapatano.

¹⁶Ukawada mavuda ghose gha vifu, na kipande chiboie cha idima, figho iwi na mavuda gharo, ukavikora aighu ya madhabahu.

¹⁷Ela nyama ya njau na mrongo ghwaro na vifu varo, ukavikora vose shighadi ya kambi, sa iji koni BWANA oremlaghirieghe.

¹⁸Niko ukareda bauru kwa wundu ghwa kizongona chekora, Haruni na wana wake wikawikiria mikonu yawo aighu ya chongo cha bauru.

¹⁹Musa ukaibwagha, na kumichira bagha yake aighu ya iro mbembe inya ra madhabahu.

²⁰Hata iji iyo bauru yadumbulwa vipade vipande, Musa ukakora chongo, na ivo vipande, na mavuda.

²¹Hata nyuma ya kuoghosha vindo vose va ndenyi na maghu kwa machi, Musa ukakora bauru yose aighu ya madhabahu, ikaie kizongona chekora, irumba jinukie nicha ja kizongona chekora chifunyiro kwa BWANA, sa iji koni BWANA oremlaghirieghe.

²²Niko Musa ukaireda bauru ya kawi, iyo ewika wakohani wakfu; na Haruni na wana wake wikawikiria mikonu yawo aighu ya chongo cha iyo bauru.

²³Musa ukaibwagha, ukawada bagha yake, na kushinga m'bonya ya kudu kwa kiwomi kwa Haruni, na chala chake cha ighosi cha mkonu ghwake ghwa kiwomi, na ino jake ja ighosi ja kughu kwake kwa kiwomi.

²⁴Na wana wa Haruni wikaredwa, na Musa ukawada bagha ukawishinga m'bonya ra madu ghawo gha kiwomi, na vala vawo va maghosi va mikonu ya kiwomi na mano ghawo gha maghosi gha maghu gha kiwomi. Musa ukadunga ija bagha isigharikie chia rose ra madhabahu.

²⁵Niko ukawada mavuda, na munda na ilala ja mavuda ghose gha vifunyi, na kipande chiboie cha idima, figho iwi na mavuda gharo na bara ya kughu kwa kiwomi.

²⁶Ukawusa mkate ghusewadie chachu ghumweri kufuma kikapunyi, ghorefunyiroghe kwa BWANA, na mkate ghumweri ghubonyero na mavuda, na skozi imweri, ukaviwikiria aighu ya mavuda na aighu ya nyama ya bara ya mkonu ghwa kiwomi.

²⁷Musa ukaviwikiria vindo ivi vose mikonunyi kwa Haruni na mikonunyi kwa wana wake, ukavisughusa vikaie kizongona chesughuswa chifunyiro kwa BWANA.

²⁸Niko ukaviwusa sena kufuma mikonunyi kwawo, ukavikora aighu ya madhabahu chia imweri na kizongona chekora, vikaie mafunyo kwa wundu ghwa kuwika wakfu, irumba icha ja ifunyo ja kizongona chekora kwa BWANA.

²⁹Nao Musa ukawada kidari, ukachisughusa chikaie kizongona chesughuswa chifunyiro kwa BWANA. Ni ifungu ja Musa ja bauru ewika wakfu; sa iji koni BWANA oremlaghirieghe.

³⁰Niko Musa ukawada mavuda ghamu na bagha imu iyo erekoghe madhabahunyi, ukammichira Haruni na wana wake, na nguwo rawo; na kwa chia iyo, ukawiwika wakfu chiaimweri na nguwo rawo.

³¹Musa ukamzera Haruni na wana wake, “Dekenyi iro nyama aho mnyangonyi ghwa Hema ekwania, murije chiaimweri na ugho mkate ghuko kikapunyi ghwa mafunyo kwa wundu ghwa kuwika wakfu, sa iji koni neremnekieghe momu ngighamba, ‘Haruni na wana wake wichakaia wikija ivo vindo.’

³²Nyama na mkate vikasigharika, muvikore na modo.

³³Nenyo ndemchaafuma aho mnyangonyi ghwa Hema ekwania kwa matuku mfungade, hata matuku ghenyu gha kuwikwa wakfu ghakatia, kwa kukaia kuwikwa wakfu konyu kuchadwa matuku mfungade.

³⁴BWANA odefunya momu dibonye seji dabonya idime kwa wundu ghwa kuinja kaung'a renyu.

³⁵Mchakaia aho mnyangonyi ghwa Hema ekwania kwa matuku mfungade kio na dime, mkibonya agho ghilaghirilo ni BWANA, eri msechefwa, angu huwo niko nerenekeloghe momu ni BWANA.”

³⁶Haruni na wana wake wikabonya kula ilagho ijo BWANA oremlaghirieghe Musa.