Read TAITA BIBLE – Biblia Ilagho Jiboie Kwa Wandu Wose WALAWI 9 Bible Online

WALAWI 9 - TAITA BIBLE – Biblia Ilagho Jiboie Kwa Wandu Wose bible

WALAWI 9

¹Nao ituku ja wunyanya, Musa ukammbanga Haruni, wana wake, na vilongozi va Israeli;

²ukamzera Haruni, “Wada ngache ya womi ikaie kizongona kwa wundu ghwa kaung'a, na bauru ikaie kizongona chekora; rose rikaie risene itiko jingi, nao kurifunye imbiri ya BWANA.

³Kuwizere wandu wa Israeli wiwade fwandi ikaie kizongona kwa wundu ghwa kaung'a, na ngache na mwana wa ng'ondi wose wa mwaka ghumweri-ghumweri wisene itiko jingi wikaie kizongona chekora;

⁴njau na bauru rikaie kizongona cha mapatano chifunywagha imbiri ya BWANA, na kizongona cha viro chiranganyiro na mavuda; kwa kukaia BWANA uchakuwonyera konyu idime.”

⁵Niko wandu wikareda kula kilambo cherelaghiriloghe ni Musa imbiri ya Hema ekwania; ikwanyiko jose jikacha na kukaia kimusi imbiri ya BWANA.

⁶Musa ukaghamba, “BWANA waamlaghira kubonya huwu, eri wubaa ghwake ghupate kumchea.”

⁷Ukamzera Haruni, “Ghenda madhabahunyi, kufunye kizongona kwa wundu ghwa kaung'a rako na kaung'a ra wandu wako, na kizongona chekora chebonya mapatano kwa wundu ghwako na kwa wundu ghwa wandu wako; kurede agho mafunyo gha wandu, nao kubonye mapatano kwa wundu ghwawo, sa iji koni BWANA orefunyireghe.”

⁸Niko Haruni ukaghenda madhabahunyi ukabwagha ngache kwa wundu ghwa kaung'a rake;

⁹na wana wake wikamredia iyo bagha, nao ukangira chala chake baghenyi, ukashinga mbembe inya ra madhabahu, na bagha isigharikie ukaidia nandonyi ya madhabahu.

¹⁰Ela mavuda na figho, na kipande chiboie cha idima kufuma kwa icho kizongona kwa wundu ghwa kaung'a, orevikorieghe aighu ya madhabahu, sa iji koni BWANA oremlaghirieghe Musa.

¹¹Nyama na mrongo ghwaro ukavikora na modo shighadi ya kambi.

¹²Nao ukabwagha nyamandu kwa wundu ghwa kizongona chekora, na wana wake wikamredia bagha; nao ukashinga chuwaru inya ra madhabahu.

¹³Wikamredia vipande vose va nyama na chongo kwa wundu ghwa kizongona chekora, nao ukavikora aighu ya madhabahu.

¹⁴Ukavioghosha vindo vose va ndenyi na maghu, ukavikoranya na kizongona chekora aighu ya madhabahu.

¹⁵Niko ukafunya kizongona kwa wundu ghwa wandu, ukawada mburi erefunyiroghe kizongona kwa wundu ghwa kaung'a ra wandu, ukaibwagha na kuifunya kwa wundu ghwa kaung'a sa iji koni orebonyereghe kiimbiri.

¹⁶Ukafunya icho kizongona chekora kunughana na mawiko gharo.

¹⁷Ukafunya kizongona cha viro, ukabegha ngonde ichue ya mufu, na kughukora aighu ya madhabahu, kuchuria chija kizongona chifunywagha kula nakesho.

¹⁸Wokoni ukabwagha njau na bauru, rikaie kizongona cha mapatano kwa wundu ghwa wandu, na wana wake wikamredia bagha; nao ukashinga chuwaru rose inya ra madhabahu.

¹⁹Haruni ukawada mavuda gha njau na gha bauru, na munda, na ilala ja agho mavuda gha vifunyi, figho na kipande chiboie cha idima;

²⁰ukaviwika aighu ya kidari na kuvikora aighu ya madhabahu;

²¹ela kidari na bara ya kiwomi, ukavisughusa vikaie kizongona chesughuswa chifunyiro kwa BWANA sa iji koni Musa oremlaghirieghe.

²²Nao Haruni ukawighalukia wandu ukawusira mikonu yake nokoighu, ukawirasimia; ukasea kufuma aja orefunyiragha vizongona kwa wundu ghwa kaung'a, na vekora, na va mapatano.

²³Musa na Haruni wikangia cha Hemenyi ekwania; hata iji wafuma, wikawirasimia wandu, na wubaa ghwa BWANA ghukawichea wandu wose.

²⁴Modo ghukasea kufuma kwa BWANA, na kukora kizongona chekora na agho mavuda gherekoghe aighu ya madhabahu; hata iji wandu wose werewonieghe huwo, wikakema na kughwa andonyi kijimijimi.