Read TAITA BIBLE – Biblia Ilagho Jiboie Kwa Wandu Wose JEREMIA 10 Bible Online

JEREMIA 10 - TAITA BIBLE – Biblia Ilagho Jiboie Kwa Wandu Wose bible

JEREMIA 10

¹Sikirenyi ilagho ja BWANA ughoragha nenyo ee wandu wa Israeli.

²BWANA waghamba welee, “Msakekufundisha mighendo ya iro mbari ra wandu; msakeoboshwa ni alama ra mlungunyi, hata ngera iro mbari radaoboshwa ni iro alama.

³Angu mizango ya awa wandu ni ya kisha; wadema mudi kufuma msidunyi na kuwachwa na isoka kwa mikonu ya wandu wiwadie wuya.

⁴Waghupamba kwa feza na dhahabu, na kughukomeria na misumari kwa nyondo, eri ghusechebingilika.

⁵Milimu yawo ni sa fwana returusa, riwikilo mbuwenyi ya marenge; nderidedagha na ni suti riduko kwa kukaia nderidimagha kughenda. Kusakeriobua, nderikubonyagha ilagho jingi jizamie hata nderibonyagha ilagho jingi icha anduangi.”

⁶Ndekuwadie ungi uko sa oho ee BWANA, oho koko m'baa, na irina jako ni ibaa sena jiwadie ndighi.

⁷Nani usekuobuagha oho ee Mzuri wa iro mbari ra wandu? Angu kwafwana oho kuwusa ijo ishima; angu ndekuwadie ungi sa oho, aghadi ya wandu wa akili wa iro mbari, hata aghadi ya mawuzuri ghawo ghose.

⁸Wose wakaia wakelu wisena akili, wifundishwagha ni milimu ya midi!

⁹Feza ichanilo yaredelo kufuma Tarshishi, na dhahabu kufuma Ufazi. Iro ni kazi ra mundu wa wuya, richanilo ni mchani dhahabu, marwao ghawo ni gha ngundu-ngundu, na gha zambarau; iro rose ni kazi ra wandu wa wuya.

¹⁰Ela BWANA ni Mlungu wa loli; Uo ni Mlungu uko moyo, na Mzuri wa kala na kala. Ndoe yadasughuswa ni machu ghake, iro mbari ra wandu nderidimagha kurumaghia lubio lwake.

¹¹Muwighorie wandu huwu: “Iyo milungu iseumbie mlungunyi na ndoenyi, ichatota ndoenyi na aisi ya mlungunyi.”

¹²Ela BWANA oreumbieghe ndoenyi kwa ndighi rake, uo umangishire wurumwengu kwa hikima yake, na kwa kumanya kwake, ukaala mlungunyi.

¹³Ukakaba lukuwa, machi gha mlungunyi ghadaruruma, wadabonya mawingu ghijoke kufuma ndoenyi. Wadareda luhehia na vua, na kuweta kwa mbeo kufuma andu kwaro.

¹⁴Kula mundu uawoneka usewadie akili hata kumanya kungi, kula mchani dhahabu wafwa waya kwa wundu ghwa iyo milimu yake. Fwana rake ni rekalia, nderiwadie miruke andenyi yaro anduangi.

¹⁵Nderiwadie fwaida ingi, ni kazi ra tee; ngelo yawo etanywa, richatoteshwa.

¹⁶Mlungu, wa Jakobo, ndedimagha kufwanananishwa naro, kwa kukaia nuo moni uumbie ivo vilambo vose, na Israeli ni mbari ya ifwa jake; irina jake ni BWANA wa majeshi.

¹⁷Funganya misigo yako kupate kujisigha isanga, oho kurughailo ni majeshi, ee Jerusalemu.

¹⁸Angu BWANA wagora huwu: “Ola nichawikumba noko wandu wose sa kukumba kwa kikuza wifume isangenyi ngelo ii cheni; nani nichawiredia wasi nao wighumanye.”

¹⁹Wandu wa Jerusalemu wikakema, “Ni bugha kodu kwa wundu ghwa kushoghonoka kodu! Chonda chedu ndechiboagha. Nesi dereririkanyeghe ughu ni wasi, didimagha kughurumaghia.

²⁰Hema yapo yamerie kunonwa, na kamba raro radumbulwa; wana wapo ndewiko, waghenda wikanisigha, ndekuwadie mndungi oidunga hema yapo sena, na kuwanika pazia rapo.”

²¹Kwa kukaia walisha wasowa akili, hata ndewilombagha njama kwa BWANA; kwa huwo ndewiwonagha mecha, na mfugho rawo rose reesaghisika.

²²Sikirenyi malagho ghacha! Ndoghoi ya wandu wichagha kufuma kaskazinyi, wipate kuibonya mizi ya Juda iwuye miduu, andu kokailwa ni mizozo.

²³Naichi ee BWANA, mdamu ndeghendagha kwa kudima kwake moni anduangi, hata ndekuwadie mdamu ungi udimagha kughenja mighendo yake moni.

²⁴Kuniwunje ee BWANA, ela kwa kipimo cha hachi isekaie kwa machu ghako, nichewuya kindo cha duu.

²⁵Machu ghako ndeghikaie aighu ya iyo mbari ya wandu wisekuichi oho, na kwa awo wandu wisejiwangiagha irina jako; kwa kukaia wamerie kuwibwagha wandu wa Israeli, wawibwaghie na kuwimeria putu, hata isanga jawo jeesighwa iduu.