Read TAITA BIBLE – Biblia Ilagho Jiboie Kwa Wandu Wose JEREMIA 11 Bible Online

JEREMIA 11 - TAITA BIBLE – Biblia Ilagho Jiboie Kwa Wandu Wose bible

JEREMIA 11

¹BWANA oreghorieghe na Jeremia ukighamba,

²“Sikira malagho gha ilaghano iji, kuwighorie wandu wa Juda, na awo wikaiagha Jerusalemu.

³Kuwizere huwu, Ini BWANA, uo Mlungu wa Israeli naghamba, Mundu useghiwadiagha malagho gha ilaghano ijo, uwadwa ni njowe.

⁴Nerewilaghirieghe weke ndeyo ilaghano ijo, ngelo nerewifunyagha isanga ja Misri, kufuma ijo iriwa ja modo, ngighamba, munisikire na kubonya malagho agho nimlaghiragha, mpate kuwuya wandu wapo na ini nikaie Mlungu onyu;

⁵nani nipate kujikatisha ighemi nerewighemieghe weke ndeyo, jewineka isanga jinorie, sa iji koni jiko idime.” Niko ngatumbulia, “Ndeikaie wokoni BWANA.”

⁶Nao BWANA ukanizera, “Ghora agha malagho ghose mizinyi ya Juda, na chienyi ra Jerusalemu kughambe; Sikirenyi malagho gha iji ilaghano, mughibonye.

⁷Kwa kukaia nerewiwonyereghe weke ndeyo kwa wumboa ngelo nerewifunyagha isanga ja Misri, ngiwiwonyera sena na sena hata idime iji, ngighamba, munisikire.

⁸Ela ndewerenisikireghe, hata kudegha madu ghawo kwapo, ela kula umu wawo oreghendieghe kwa kukua kwa ngolo rawo mbiwi. Kwa wundu ugho niko nerewiredieghe njowe kunughana na malagho ghose gha iji ilaghano nerewilaghirieghe wibonye, ela ndewerebonyereghe anduangi.”

⁹BWANA ukanizera sena, “Koko kuleghasikira aghadi ya wandu wa Juda, na awo wikaiagha Jerusalemu.

¹⁰Wamerie kuwuria wuwiwi ghwa weke ndee wa kala, awo wereleghieghe kughisikira malagho ghapo; wamerie kuitasa milungu mizima, na kuidumikia. Wandu wa Israeli na wandu wa Juda wamerie kujichikanya ijo ilaghano japo nerejibonyereghe na weke ndee.

¹¹Kwa huwo BWANA waghamba huwu, ‘Olenyi naawuyareda wuwiwi aighu yawo wisedimagha kughufufunuka; hata wikeduanikemia sichaawisikiria anduangi.’

¹²Niko wandu wa mizi ya Juda na awo wikaiagha Jerusalemu wichaghenda kuililia milungu iyo werekoghe wikiifukiria marumba ela ndeichaadima kuwikira ngelo ya wasi ghawo.

¹³Kwa kukaia milungu yenyu eewuya mingi kara kara na mizi enyu ee Juda, na madhabahu ghenyu mughiwikie ghemfusha waya gheeka mengi kara kara na chia ra Jerusalemu; mpate kumfukiria Baali marumba.

¹⁴Kwa huwo, oho Jeremia, kusakewilombia hata kusakenivoya kwa wundu ghwa wandu awa; kwa kukaia sichaawisikira iji wakaniwanga ngelo wapatwa ni wasi.

¹⁵“Awandu wapo niwikunde weko na hachiki engia andenyi ya Hekalu yapo ingelo wabonya mawiwi? Welee, wiaghesha wichaghiria mawiwi ghisewipate kwa kufunya vizongona vingi va nyamandu? Wichaboilwa andenyi ya agho?

¹⁶Ngelo imu ini BWANA nerekuwangieghe irina ja ‘Mzeituni ghuko na malemba mawishi, na matunda ghiboie;’ ela nichaghuomera kwa kiremba kibaa sa modo, na mbashu rake richachika.

¹⁷Ini BWANA wa majeshi, uo orekuwaeghe wamerie kughora mawiwi aighu yako, kwa wundu ghwa mawiwi ghibonyero ni wandu wa Israeli na wandu wa Juda; wikanivavira ngolo kwa kumfukiria Baali marumba.”

¹⁸Bwana orenimanyishireghe njama mbiwi, yawuyabonywa ni wamaiza wapo aighu yapo; ukaniwonyera mabonyo ghawo ghizamie.

¹⁹Ela nerekoghe sa mwana wa ng'ondi uko kima, ughenjwagha kubwaghonyi. Seremanyireghe wei iyo njama ni aighu yapo wereibonyereghe wikighamba, “Nndokonyi dighunone mudi chiaimweri na matunda gharo, ndedim'bwaghe dimuinje isangenyi, irina jake jisechekumbukwa sena.”

²⁰Niko ngalomba, “Ee BWANA wa majeshi, kutanyagha kwa hachi oho kuritimagha ngolo na nia ra wandu, nakulomba kunineke kuwona kukilipa kisasi chako aighu yawo, kwa kukaia irangi japo najisaghika kwako.”

²¹Kwa huwo BWANA waghamba huwu aighu ya wandu wa Anathothi; awo wikunde kukubwagha waawuyaghamba, “Kusakeloda kwa irina ja BWANA dichekubwagha” -

²²kwa wundu ugho BWANA wa majeshi waghora huwu, “Ola nichawikaba, na wandu wa irika wichabwaghwa kwa lufu, na wana wawo wa womi na wa waka wichabwaghwa ni njala.

²³Ndekuwadie hata ungi wawo uchaasigharika, kwa kukaia nichareda wuwiwi aighu ya Anathothi, nagho ni mwaka ghwawo ghokabwa.”