Read TAITA BIBLE – Biblia Ilagho Jiboie Kwa Wandu Wose JEREMIA 17 Bible Online

JEREMIA 17 - TAITA BIBLE – Biblia Ilagho Jiboie Kwa Wandu Wose bible

JEREMIA 17

¹“Kaung'a ya Juda eandikwa na kalamu ya chuma, mbari reekotwa aighu ya vibau va ngolo rawo rikaashingwa wudovu ghwa almasi; na aighu ya mbembe ra madhabahu ghawo wori,

²ingelo wana wawo wikumbukagha madhabahu ghawo na Ashera mlungu ghwawo ghwa waka, mbai na mbai ya kula mudi ghuko na malemba mawishi na aighu ya mighondi mitini,

³na mighondi mibaa iko isanga ja wurindi. Wuzuri ghwawo na mashamo ghawo ghose nichaghifunya ghidwalo wunyika, ikaie malipo gha kaung'a yawo wiibonyere isangenyi jawo jose.

⁴Wichajisigha isanga jerekoghe ifwa jawo nerewinekieghe, nani nichawibonya widumike andenyi ya isanga wisejiichi, kwa kukaia wawusira machu ghapo, nagho ghichaaka sa modo kwa kala.”

⁵BWANA waghamba huwu, “Mundu umsuwiriagha mdamu, na ngolo yake yaghalukie na mbai ikamsigha BWANA, uwado ni njowe.

⁶Uchakaia kara kara na kisachi chiko kireti hata ndechaawona mecha ghangi. Uchakaia andu kuomie kireti, isanga ja munyu jisekailwagha ni wandu.

⁷“Warasimilwa mundu unirumiriagha ini BWANA uo uwikie irumirio jake kwapo.

⁸Uchakaia karakara na mudi ghuwalo mbai na mbai ya moda, na kughenja miri yaro cha machinyi; ndeghukaiagha na wowa ghungi ngelo ya mruke, kwa kukaia malemba gharo ghichadua mawishi, hata ndeghusumbukagha ngelo ya kimu cha kwalazi; kwa kukaia mudi ghwaro ndeghusighagha kuva matunda.”

⁹“Ngolo yakalie ikachumba vilambo vose, eezama ikaachumba; nani udimagha kuitambua?

¹⁰Ni ini BWANA nizighanagha nia na kuitima ngolo; nipate kumlipa kula mundu kara kara na chia rake, karakara na mabonyo ghake.”

¹¹Mundu upatagha mali kwa chia iseko ya hachi, oofwanana na ngwale ilaliagha maghi ghiseko ghake. Mali iro richatana nao ghadi na ghadi ya matuku, na kutua kwake uchakaia karakara na ikelu.

¹²Andu kodu kwa wueli, ni aho kifumbi cha nguma cha wubaa chiwikilo, chiko koighu kufuma kuzoenyi.

¹³Ee BWANA oho kuko isuwirio ja Israeli, wose wikusighagha wichafushwa waya, na awo wikughalukiagha nambai, wichalaghaya sa marina ghiandikilo andonyi kwa kukaia wamsighie BWANA, uo ndoria ya machi ghiko moyo.

¹⁴Kuniboise ee BWANA, nani nichaboa; kunikire nani nichakia angu ni oho kuekeri nikukasagha.

¹⁵Ola wanizera, “Ijo ilagho ja BWANA jeko hao? Ndejikatisho-cho!”

¹⁶Jingi sikushingirie kuwiredie mawiwi, hata serekundieghe ijo ituku ja mawiwi; oho kwamanya. Ijo nidedie jeko worinyi imbiri kwako.

¹⁷Kusakenibonya nikuobuo angu oho koko andu kwapo kokimbiria ituku ja wasi.

¹⁸Watiriri wapo ndewifusho waya, kunilindie nisefusho waya. Kuwibonye wichulo ni kiture, ela ini niseobuo kindo chingi. Kuwiredie ituku ja wasi, kuwibonye winoneke mando awi.

¹⁹BWANA ukanizera, “Ghenda kukaie kimusi Mbengenyi ya Wandu, andu wazuri wa Juda wingiriagha na kufuma; na wokoni kughende mbenge rose ra Jerusalemu,

²⁰kughambe: ‘Sikirenyi ilagho ja BWANA inyo wazuri wa Juda na wandu waro wose, na wandu wose wikaiagha Jerusalemu, awo wingiriagha mbenge iri.

²¹BWANA waghamba huwu: Lindienyi marangi ghenyu. Mseduke misigo ingi na kuidia nayo mbengenyi ra Jerusalemu ituku ja Sabato.

²²Msefunye misigo nyumbenyi konyu na kuiduka ituku ja Sabato, ela mchajielesha ituku ijo sa iji koni nerewilaghirieghe weke ndeyo.

²³Elaima sena ndeweresikireghe, hata kudegha madu ghawo kwapo, ela wikaghilisha singo, eri wisechesikira na kuwada mafundisho.

²⁴“‘Ela mkanisikira, waghamba BWANA, nao mkaie msedukie misigo na kungia nayo mbengenyi ra muzi ughu ituku ja Sabato, ela muieleshe Sabato, hata msebonye kazi ingi,

²⁵niko wazuri weseria kifumbi cha nguma cha Daudi wichangia wikiidiria ihi mbenge ya ughu muzi, wikijoka magare na farasi, awo chiaimweri na wabaa wawo, na wandu wa Juda na awo wikaiagha Jerusalemu; na muzi ughu ghuchakailwa ni wandu kwa kala na kala.

²⁶Na wandu wichafuma mizi ya Juda, na andu kuzima kose kumarie Jerusalemu; kufuma isanga ja Benjamini na kufuma Shefela, na isanga ja mighondinyi, hata kufuma Negebu wikireda vizongona vekora, na vizongona, na mafunyo gha viro, na marumba, na mafunyo gha chawucha andenyi ya Hekalu ya BWANA.

²⁷Ela mkalegha kunisikira na kuleghatala ituku japo ja Sabato, mkiduka misigo enyu na kungia nayo mbengenyi ra Jerusalemu ituku ja Sabato, niko nicharikora iro mbenge, na ugho modo ghuserimikagha ghuchanona ngome ra Jerusalemu.’”