Read TAITA BIBLE – Biblia Ilagho Jiboie Kwa Wandu Wose JEREMIA 27 Bible Online

JEREMIA 27 - TAITA BIBLE – Biblia Ilagho Jiboie Kwa Wandu Wose bible

JEREMIA 27

¹Kuzoya kwa kubonya nguma kwake Zedekia mwana wa Josia mzuri wa Juda, BWANA orenizerieghe huwu,

²“Bonya ghongolo ya vilingo na mikowa, kuingire singonyi kwako.

³Kudume momu kwa wazuri wa Edomu na Moabu, na mzuri wa wana wa Amoni, na mzuri wa Tiro, na mzuri wa Sidoni, kwa kutumia wandu wichagha Jerusalemu kwa Zedekia mzuri wa Juda.

⁴Kuwineke malaghiro kukaia, ‘BWANA wa majeshi, uo Mlungu wa Israeli waghambie wiwizere weke bwana wawo huwu,

⁵“Ni ini niumbie wurumwengu kwa mkonu ghwapo ghwa ndighi, chiaimweri na wandu na nyamandu riko ndoenyi; nani nadamneka uo ose seji niwonagha.

⁶Idana nanekie mdumiki wapo Nebukadnezari mzuri wa Babuloni agha masanga ghose, sena namnekie nyamandu ra mlambenyi rimdumikie.

⁷Mbari rose ra wandu richamdumikia uo, na mwana wake, na wawae; hata ngelo ivike ya kughwa kwa mbari yake. Aho niko mbari nyingi, na wazuri wabaa wichaam'bonya Nebukadnezari ukaie mzumba wawo.

⁸“‘“Ela mbari angu wuzuri ghungi ghukalegha kumdumikia Nebukadnezari mzuri wa Babuloni, na kurumiria kungira singo rawo andenyi ya ghongolo yake, nichaikaba ija mbari kwa wuda, na kwa njala, na kwa saka izamie, waghamba BWANA; hata nam'bonya Nebukadnezari uwimerie putu.

⁹Kwa huwo msakewisikiria awo walodi, angu wawoni mawono gha maza richagha, angu walodi ndodo, angu waghori na pepo retambua maza richagha, angu walaghui; awo wimzeragha wei ndemchaamdumikia mzuri wa Babuloni kungi.

¹⁰Angu waawuyamfunyira wulodi ghwa tee; mchawona mkidwalwa noko kula na isanga jenyu, nani nichammbinga noko mpate kutota.

¹¹Ela mbari iyo yose ichaarumiria kungira ghongolo ya mzuri wa Babuloni na kumdumikia, nicham'bonya ukaie isangenyi jake jeni, ujilime na kukaia aho, Ini BWANA naghamba.”’”

¹²Neremghorieghe Zedekia mzuri wa Juda malagho agho gheni ngimzera, “Mkungire singo renyu andenyi ya ghongolo ya mzuri wa Babuloni, mumdumkie chiaimweri na wandu wake, nenyo mchakaia moyo.

¹³Kwaki mfwagha chiaimweri na wandu wenyu kwa wuda, na kwa njala, na kwa saka izamie? Nechi huwo niko koni BWANA ughorie aighu ya iyo mbari ichaalegha kumdumikia mzuri wa Babuloni.

¹⁴Msakewisikira awa walodi wimzeragha wei ‘Msekufunye kwa mzuri wa Babuloni,’ kwa kukaia waawuyamfunyira wulodi ghwa tee.

¹⁵BWANA ooghora ndewidumie kungi, ela waawuyamfunyira wulodi ghwa tee kwa irina jake; na ii chia malagho ghake ghiakatia agho umzerie uchammbinga noko, nenyo mchatota chiaimweri na awo walodi wawuyamfunyira wulodi.”

¹⁶Niko ngawighoria wakohani na wandu wose ngaghamba, “BWANA waghorie huwu, msesikire malagho gha walodi wenyu, awo wawuyamfunyira wulodi wikighamba, ‘Vilambo vose va Hekalu valighisa kuwunjwa kufuma Babuloni,’ kwa kukaia waawuyamfunyira wulodi ghwa tee.

¹⁷Msakewisikira! Mdumikienyi mzuri wa Babuloni mpate kukaia moyo. Kwaki ado ughu muzi ghuwuyagha ighacho?

¹⁸Ikakaia loli wiko walodi, na ikakaia weko na ilagho ja BWANA, ndewimvoye BWANA wa majeshi ivo vilambo viko andenyi ya Hekalu ya BWANA, na andenyi ya ngome ya mzuri wa Juda, na andenyi ya Jerusalemu visedwalo wunyika cha Babuloni.

¹⁹BWANA wa majeshi waghamba huwu aighu ya masighariko gha nguro, na itangi, na vishawalata varo va nandonyi, na vilambo vose va muzi veresigharikieghe,

²⁰ivo viseredwaloghe ni Nebukadnezari mzuri wa Babuloni, ingelo oremdwaeghe wunyika Jekonia mwana wa Jehoiakimu mzuri wa Juda kufuma Jerusalemu hata Babuloni, chiaimweri na wabaa wose wa Juda na Jerusalemu.

²¹BWANA wa majeshi uo Mlungu wa Israeli waghamba kukaia, vilambo veresighiloghe andenyi ya Hekalu ya BWANA, na andenyi ya ngome ya mzuri wa Juda na Jerusalemu,

²²vichadwalwa cha Babuloni, navo vichakaia aho hata iyo ngelo uchaavizighana; niko uchaaviwunja na kuviwika sena andu aha.”