Read TAITA BIBLE – Biblia Ilagho Jiboie Kwa Wandu Wose JEREMIA 30 Bible Online

JEREMIA 30 - TAITA BIBLE – Biblia Ilagho Jiboie Kwa Wandu Wose bible

JEREMIA 30

¹BWANA, uo Mlungu wa Israeli oreghorieghe nani ukighamba,

²“Malagho ghose nakuzera, kughiandike chuonyi.

³Ola matuku ghichacha nani nichaawiwunja wandu wapo Israeli na Juda kufuma wunyikenyi, wiwuye kwa isanga nerewinekieghe weke ndee jikaie jawo.”

⁴Agha nigho malagho BWANA ughighorie aighu ya wandu wa Israeli na Juda,

⁵“Dasikira lwaka lwa wowa na loobosha luseko lwa sere.

⁶Kotia idana kuwone welee, mndwawomi wadima kuva mwana? Kwaki sena nawuyawona kula mndwawomi wawika mkonu ghwake kifunyi sa muka ukumbagha lufu lova? Kwaki mawushu ghafuwia huwu?

⁷Ai, e ituku ja mashiniko, jisefwanane na ituku jingi; ni ngelo ya wasi kwa kivalwa cha Jakobo, elaima ugho wasi ghuchamredia kukia.”

⁸BWANA wa majeshi waghamba, “Ituku ijo nicharichikanya ghongolo rifume singonyi kwawo, na vilingo wifungilo navo; waghenyi ndewichaawibonya wikaie wadumiki wawo sena anduangi.

⁹Ela wichamdumikia BWANA Mlungu wawo; na umu wa kivalwa cha Daudi mzuri wawo, uo nichaammbusira kwa wundu ghwawo.

¹⁰“Idana msakeobua ee kivalwa cha Jakobo mdumiki wapo, msakefwa waya ee wandu wa Israeli; angu nichamkira ahoeni isanga ja kula, na kivalwa chenyu chichafuma ijo isanga weredwaloghe wunyika. Mchawuya na kukaia mhorie nicha, na mndungi ndechamuobosha sena anduangi.

¹¹Angu ini neko andwamweri nenyo nipate kumkira; nicharitotesha putu iro mbari rose andu neremsaghisireghe, ela inyo sichaamtotesha anduangi; nichamkaba kwa hachi, hata sichaamsigha jingi kuseko na makabo ghemmbunja.”

¹²BWANA waghamba, “Kushoghonoka konyu ndekuchaaboa jingi, na chonda chenyu chazamie.

¹³Ndekuwadie mndungi otesia maza renyu, na wughanga ghwa chonda chenyu ndeghuko, ndeidimikagha m'boo.

¹⁴Wandu wose m'bonyere nawo lukundo wamliwie, ndewimtalagha hata kutini, namkabie karakara na kukaba kwa m'maiza, ngamkaba kuseko na kummbonia wughoma, na kukaia makosa ghenyu ni mabaa, na kaung'a renyu ni nyingi.

¹⁵Kwaki mlalamikagha aighu ya kushoghonoka konyu? Luwawo lonyu ndeluchaasia; kwa kukaia wuwiwi ghonyu ni m'baa na kaung'a renyu ni nyingi, niko nim'bonyere agho malagho.

¹⁶Kwa huwo awo wimmilie wichamilwa, na wamaiza awo wose wichadwalwa wunyika awo wimkorongagha wichakorongwa, na awo wimmbingagha wichawingwa.

¹⁷Nichamuagha sena, na kuboisa vonda venyu; angu wimtalie wei moolegha, wikighamba, ‘Ni Sioni iyo mndungi useitalagha.’”

¹⁸BWANA waghamba huwu, “Olenyi nichariagha sena hema ra kivalwa cha Jakobo, na kukaia na wughoma kwa awo wikaiagha aho. Muzi ghwa Jerusalemu ghuchaaghwa aeni ghorekoghe, na ngome ya mzuri ichakaia aeni erekoghe.

¹⁹Chumbo na kubora kwa makaso kuchafuma kwawo, na chwaka ra kuboilwa richasikirika. Nichawichuria nawo wichazegha, nichawibonya wineko ishima, nawo ndewichaakaia watini anduangi.

²⁰Wana wawo wichakaia sa matuku gha kala, na izungu jawo jichawoneka imbiri kwapo; na awo wose wiwikorongagha nichawikaba.

²¹M'baa wawo uchafuma kwawo koni, na uo ubonyagha nguma uchafuma aghadi kwawo, nicham'bonya usoghode kaavui nani, nao uchakaia kaavui nani; angu nani udimagha kunisoghodera kwa ndighi rake reni?

²²Nenyo mchakaia wandu wapo, na ini nichakaia Mlungu onyu.”

²³Olenyi machu gha BWANA ghafuma sa kiremba, ghichakaia aighu kwawo sa kikulughulu. Ee, ghichakaia aighu ya wuwiwi.

²⁴Machu gha BWANA ghibirie ndeghichaawuya nyuma hata ghameria kukatisha seji ughidumie, kukatisha agho ughiririkanyire. Mchamanya agho ngelo ra kutua.