Read TAITA BIBLE – Biblia Ilagho Jiboie Kwa Wandu Wose JEREMIA 37 Bible Online

JEREMIA 37 - TAITA BIBLE – Biblia Ilagho Jiboie Kwa Wandu Wose bible

JEREMIA 37

¹Zedekia mwana wa Josia, uo oresaghuloghe ni Nebukadnezari mzuri wa Babuloni ukaie mzuri wa Juda, orebonyereghe nguma wulalo ghwa Jehoiakini mwana wa Jehoiakimu.

²Ela uo angu ungi wa wadumiki wake, hata na wandu wa isangenyi, ndewereghisikireghe malagho gha BWANA ughighorie kwa kunitumia ini mlodi Jeremia.

³Mzuri Zedekia ukaduma Jehukali mwana wa Shelamia na mkohani Zefania mwana wa Maaseia wiche kwapo winizere, “Dilombie kwa BWANA Mlungu odu.”

⁴Nerekoghe nisefungilo; nani nerekoghe ngirangana na wandu kula andu.

⁵Ijeshi ja Wamisri jerekoghe jikicha kufuma Misri, na Babuloni, awo werekoghe wikighurughaia muzi ghwa Jerusalemu, wiendasikira agho malagho, wikainjika na kughusigha.

⁶Niko BWANA ukaghora nani ukighamba,

⁷“Ini BWANA, Mlungu wa Israeli naghamba, kumzere huwu mzuri wa Juda, uo ukudumie kwapo kunikotia malagho, ‘Ola ijeshi ja Wamisri ijo jerechieghe kukutesia, jalighisa kuwuya Misri isangenyi kwawo koni.

⁸Na Wakaldayo wichawuya kulwa na wandu wa ughu muzi; wichaghuwada na kughukora.

⁹Ini BWANA naghamba huwu, Msakekukalia mmbeni mkighamba, wei Wababuloni ndewichaawuya; kwa kukaia wichawuya.

¹⁰Angu hata ngera mwadasima ijeshi jose ja Wababuloni wawuyalwa nenyo, nao wisigharike wandu washoghonolwa wiko andenyi hemenyi kwawo, wichawuka na kughukora ughu muzi.’”

¹¹Ijeshi ja Wababuloni jiendainjika Jerusalemu kwa wundu ghwa kucha kwa ijeshi ja Wamisri,

¹²ngafuma Jerusalemu, ghaghenda isanga ja Benjamini kupata iwaghio japo aghadi ya wandu.

¹³Nao iji nerevikieghe Mbenge ya Benjamini, asikari uo orekoghe kilindirinyi aho, uwangwagha Irija mwana wa Shelemia, wawae Hanania, ukaniwada ukighamba, “Kwaawuyakimbia cha kwa Wababuloni.”

¹⁴Nani ngatumbulia, “Iro ni tee, siwuyewikimbia cha kwa Wababuloni kungi.” Ela Irija nderemsikireghe, ukammbwada Jeremia na kumreda kwa wabaa.

¹⁵Wabaa wikajokwa ni machu aighu ya Jeremia, wikamkaba na kumfunga andenyi ya nyumba ya muandiki Jonathani, angu niyo erebonyeroghe ikaie kifungo.

¹⁶Nao Jeremia ukangirwa chumba cha nandonyi cha kifungonyi ukakaia aho matuku mengi.

¹⁷Mzuri Zedekia ukaduma niredo kwake. Mzuri ukanikotia kivisonyi ngomenyi kwake ukighamba, “Ilagho jingi jeko jafuma kwa BWANA?” Ngatumbulia, “Jeko.” Niko ngamzera, “Kuchangirwa mikonunyi kwa mzuri wa Babuloni.”

¹⁸Ngachuria kumzera Mzuri Zedekia, “Ni ikosaki nibonyere kwako, angu kwa wabaa wako wa kazi, angu kwa awa wandu hata mkaningira kifungonyi?

¹⁹A walodi wako weko hao, awo wifunyire wulodi wei, ‘Mzuri wa Babuloni ndechaalwa na oho hata na iji isanga?’

²⁰Idana sikira nakulomba ee bwana wapo mzuri, kurumirie ilombi japo nikulombagha ngikusera imbiri kwako, kuseniwunje nyumbenyi kwa uja muandiki Jonathani nichefuya aho.”

²¹Kwa huwo Mzuri Zedekia ukafunya momu, wikaniwika wazenyi ya mlindiri, wikanineka mkate kula ituku ghufumagha chienyi ya waochi mikate, hata mikate yose ikasia. Kwa huwo ngakaia aho wazenyi ya mlindiri.