Read TAITA BIBLE – Biblia Ilagho Jiboie Kwa Wandu Wose JEREMIA 38 Bible Online

JEREMIA 38 - TAITA BIBLE – Biblia Ilagho Jiboie Kwa Wandu Wose bible

JEREMIA 38

¹Idana Shefatia mwana wa Matani, na Gedalia mwana wa Pashuri, na Jukali mwana wa Shelemia, na Pashuri mwana wa Malkia weresikireghe malagho agho ini Jeremia nereghighorieghe kwa wandu wose.

²BWANA waghamba huwu, “Mundu uchaakaia andenyi ya ughu muzi, uchabwaghwa wudenyi, angu kwa njala, angu kwa saka izamie; ela uo uchaafuma na kughenda cha kwa Wababuloni uchakaia moyo; uchafufunuka na kukira irangi jake.

³Kwa loli muzi ughu ghuchangirwa mikonunyi kwa majeshi gha mzuri wa Babuloni, nagho ghuchawadwa.”

⁴Niko wabaa wikamzera mzuri, “Umundu yamfwana ubwagho. Kwa kukaia waawuyaredia masikari ghisigharikie andenyi ya ughu muzi wunyonge, chiaimweri na wandu wose, kwa kuwighoria malagho ghifwane huwu; kwa kukaia ndewuelola wucha ghwa wandu, ela kunoneka kwawo.”

⁵Mzuri Zedekia ukaghamba, “Olenyi hoyo oko mikonunyi konyu; kwa kukaia mzuri ndedimagha kusimana nenyo.”

⁶Nao wikaniwada wikanikumba andenyi ya kisima cha mwana wa mzuri Malkia, icho cherekoghe andenyi ya waza ya mlindiri; wikinisera na kamba. Ndekorekoghe na machi ghangi andenyi ya icho kisima, ela kizozo kiduu; ngangia nokondenyi aho kizozonyi.

⁷Ebedi-meleki Muethiopia, kolowi orekoghe ukikaia ngomenyi kwa mzuri, oresikireghe kukaia nakumbwa andenyi ya kisima; na mzuri orekoghe kidombo aja Mbenge ya Benjamini.

⁸Ebedi-meleki ukafuma aho ngomenyi kwa mzuri, ukaghenda na kumzera mzuri,

⁹“Bwana wapo mzuri, wandu awa wabonya wuwiwi ghuchumbie ghomkumba mlodi Jeremia andenyi ya kisima; nao uchabwaghwa ni njala aho, kwa kukaia ndekuwadie vindo vingi visigharikie mzinyi.”

¹⁰Niko Mzuri ukamlaghira Ebedi-meleki Muethiopia, “Dwaa wandu wadadu kufuma aha, mughende mumjose mlodi Jeremia kufuma kisimenyi imbiri usefue.”

¹¹Nao Ebedi-meleki ukawada wandu, ukaghendanya nawo ngomenyi kwa mzuri, hata kabatinyi mbaa iko andenyi ya stoo, ukafunya nguwo na vitambaa va marasi ukaniseria kamba andenyi ya kisima.

¹²Niko Ebedi-meleki Muethiopia ukanizera, “Ngira iro nguwo na vitambaa va marasi na kamba kwaenyi kwako.” Nani ngabonya wokoni.

¹³Nao wikaniruda na kamba, wikanifunya kisimenyi. Ngakaia aho wazenyi kwa mlindiri.

¹⁴Mzuri Zedekia ukanidumiria, nao ngaredwa mbengenyi ya kadadu ya Hekalu ya BWANA. Mzuri ukanizera, “Nichakukotia ikoto, na oho kusenivise ilagho jingi.”

¹⁵Ngamzera Zedekia, “Ngakughoria-lee, ndakwadanibwagha? Nako ngakuneka njama, ndekuisikiragha.”

¹⁶Niko Mzuri Zedekia ukanibonyera ighemi kivisonyi ukighamba, “Naghema kwa BWANA ukaiagha moyo, uo uumbie roho redu, sichaakubwagha, hata sichaakungira mikonunyi kwa awa wandu wijilolagha irangi jako.”

¹⁷Nao ngamzera Zedekia kukaia, BWANA, uo Mlungu wa majeshi, Mlungu wa Israeli waghamba huwu, “Kukakufunya kwa wabaa wa mzuri wa Babuloni, kuchakira irangi jako, na ughu muzi ndeguchaakorwa anduangi, na oho na nyumba yako mchakaia banana.

¹⁸Ela kukalegha kukufunya kwa wabaa wa mzuri wa Babuloni, niko ughu muzi ghuchaangirwa mikonunyi kwa Wababuloni, nawo wichaghukora, na oho ndekuchaafufunuka wisekuwadie anduangi.”

¹⁹Mzuri Zedekia ukanizera, “Naawuyawiobua Wayahudi awo wikimbirie cha kwa Wababuloni, wisecheniwada na kunikoronga.”

²⁰Ngaghamba, “Ndewikuwadagha kungi. Oho sikira lwaka lwa BWANA kwa ghose nikughoriagha, na oho kuchakaia nicha hata ndekuchaabwaghwa anduangi.

²¹Ela kukalegha kukufunya, wufunuo BWANA waniwonyera ni ughu:

²²Ola waka wose weresigharikieghe andenyi ya ngome ya mzuri wa Juda werekoghe wikighenjwa shighadi kwa wabaa wa mzuri wa Babuloni; nawo werekoghe wikighamba, ‘Waghenyi wako kuwirumirie weekukalia wikakusima; na idana angu maghu ghako ghangia mazozonyi, wakusigha kuekeri.’

²³Waka wose na wana wako wichafunywa na kughenjwa kwa Wababuloni, hata oho kumoni ndekuchaafufunuka kusewadilo, ela kuchawadwa ni mzuri wa Babuloni, na ughu muzi ghuchakorwa.”

²⁴Zedekia ukanizera, Jeremia, “Mndungi usemanye agha malagho, na oho ndekuchaafwa.

²⁵Wabaa wikasikira nadedanya na oho, nao wiche kwako wikuzere, ‘Dighorie agha malagho kumzerie mzuri, na seji ukutumbulie; kusedivise ilagho jingi, nesi ndedichaakubwagha,’

²⁶kuwizere, ‘Neemvoya mzuri useniwunje nyumbenyi kwa Jonathani nifue aho.’”

²⁷Niko wabaa wose wikanichea na kunikotia, nao ngawitumbulia sa iji koni mzuri orenifundishireghe. Wikasigha kudedanya nani, kwa kukaia mndungi ndereghisikireghe agho malagho.

²⁸Ngasigharika ahoeni wazenyi ya mlindiri hata ituku jija muzi ghwa Jerusalemu ghorewadiloghe.