Read TAITA BIBLE – Biblia Ilagho Jiboie Kwa Wandu Wose JEREMIA 4 Bible Online

JEREMIA 4 - TAITA BIBLE – Biblia Ilagho Jiboie Kwa Wandu Wose bible

JEREMIA 4

¹BWANA waghamba, “Iji kwakunda kuwuya, kuwuye kwapo ee Israeli. Kukainja wuchafu ghwa milimu yako niseiwone, nao kukaie kuseghalukagha,

²kwadima kughema kwa irina japo, ‘Sa iji BWANA ukaiagha moyo,’ kwa wuloli, na kwa hachi, na kwa ngolo ya loli; na iro mbari ra wandu richanilomba irasimio na kunikasa ini.”

³Kwa wandu wa Juda na awo wikaiagha Jerusalemu BWANA waghora huwu: “Chimbenyi ndoe renyu, msewe mbeu renyu a minjonyi.

⁴Mumsikire BWANA, muinje wuchafu ghwa ngolo renyu inyo wandu wa Juda na wa Jerusalemu; machu ghapo ghisecheaka sa modo, hata mndungi usewoneke odima kughirimisha, kwa wundu ghwa wuwiwi ghwa mabonyo ghenyu.”

⁵Ereshenyi malagho andenyi ya Juda na Jerusalemu mkeme, “Kabenyi tarumbeta isangenyi, Kemenyi kwa lwaka mghambe, ‘Kwanyikenyi dighende cha mizinyi ya ngome.’

⁶Wusirenyi kiweto chekimbiria Jerusalemu, kimbirienyi wusalama msemuke; kwa kukaia naawuyareda wuwiwi kufuma kaskazinyi, kunoneka kubaa nandighi.

⁷Mtoteshi wa iro mbari ra wandu wameria kufuma sa shimba ifumagha kisachinyi chake; waawuyacha kumtotesha Juda, na mizi ya Juda ichasighwa yameria kuwuya maghacho; na mndungi okaia andenyi yaro uchaasoweka.

⁸Kwa wundu ughu, ronyi nguwo ra magunia, mkulilie na kudikwa ni mbori; kwa kukaia machu gha BWANA ghibirie, ndeghidisighie anduangi.”

⁹BWANA waghamba, “Ituku ijo, wazuri na wabaa wichafwa ngolo; na wakohani wichangilwa ni wowa na kuobua; na walodi wichashinika.”

¹⁰Niko ngaghamba, “Ai! E Bwana MLUNGU, loli kwamerie kuwikalia awa wandu na Jerusalemu putu, kukiwizera, ‘Mkaia nicha to,’ sena hoku wameria kuchelwa ni kifwa.”

¹¹Ngelo yawuyacha, na wandu wa Jerusalemu wichazerwa, “Kiremba cha modo chichaweta kwawo kufuma kireti. Ndechichaakaia kiremba chiboie cheela masemu,

¹²ela chichakaia kiremba chiwadie ndighi, chafuma kwapo. Ni ini nighoragha kwa kureda kutanya aighu kwawo.”

¹³Wonenyi! M'maiza waawuyacha sa mawingu. Magare ghake ghaawuyacha sa kikulughulu, na farasi rake raangue kuchumba indu. Ni bugha kodu, kwa kukaia dameria kusia!

¹⁴Ee Jerusalemu, oghosha ngolo yako iinjikilo ni wuwiwi, kupate kukia. Kuwika maririkanyo ghizamie andenyi kwako hata lii?

¹⁵Wandu wafuma muzi ghwa Dani, na mighondi ya Efraimu, waghora malagho ghizamie aighu yako.

¹⁶Ghorienyi iro mbari ra wandu kukaia m'maiza waawuyacha; tangazirenyi Jerusalemu huwu, “Wamaiza wawuyacha kufuma isanga ja kula, nawo wiakema aighu ya mizi ya Juda;

¹⁷wichaghurughaia ugho muzi ghwa Jerusalemu, sa iji wandu wilindiagha mbuwa; kwa kukaia wanileghie ini, huwo niko BWANA waghamba.

¹⁸Ni chia rako na mabonyo ghako gheni ee Juda, ghakuredia agha, iji nijo ikabo jako. Jabirie, najo jangia kondenyi ngolonyi kwako.”

¹⁹Luwawo lubirie! Luwawo lubirie! Niaghala-ghala kwa ulo luwawo! Ai kondenyi ngolonyi kwapo! Ngolo yapo yaawuyakaba icho kisha, sidimagha kunyama kima; kwa kukaia naawuyasikira lwaka lwa tarumbeta, lwaka lwa wuda.

²⁰Kunoneka kwaawuyanughana, isanga jose jawuya kitungasi; hema rapo raanonwa shwa wori, na pazia rapo wori.

²¹Bendera ya wuda niiwona hata lii, na chwaka ra tarumbeta nirisikira hata lii?

²²BWANA waghamba, “Ni kwa kukaia wandu wapo wakaia wakelu ndewiniichi, nawo wakaia wana wiko wakelu, wisewadie kumanya kungi anduangi. Akili rawo rose ni aighu ya kubonya wuwiwi, ela kumanya kubonya ijo jiko jiboie ndewiichi.”

²³Nerezighanireghe ndoenyi nao ngawona ni kitungasi, hata eeka nduu; ngazighana mlungunyi ngawona ndekuwadie mwengere.

²⁴Nerezighanireghe aighu ya mighondi ngawona yaawuyasughusika, na mighondi mitini yose yawuyaghenda noko imbiri na noko nyuma.

²⁵Nerezighanireghe ngawona ndekuwadie mndungi, na nyonyi rose ra mbeonyi rameria kuburuka noko.

²⁶Ngazighana ngawona, isanga jerechuloghe ni matunda jawuya kireti; na mizi yaro yose yawuya maghacho, kwa wundu ghwa machu ghibirie gha BWANA.

²⁷BWANA waghamba huwu, “Isanga jose jichawuya iduu, ela sichaajimeria putu kungi.

²⁸Kwa wundu ghwa agha, ndoenyi ichakaia na wasi, na mlungunyi kuchawuya kwa chilu; kwa kukaia namerie kughora, namerie kubonya mipango; sichaaleka, hata sichaawuya nyuma.”

²⁹Kwa kusikira tiri ra wandu wa farasi, na ra wandu wa ndana, kula mundu uko mzinyi uchakimbia cha isakenyi, wamu wichajoka cha maghambenyi; na mizi yose ichasighwa miduu, na mndungi ndechaasigharika ukikaia andenyi yaro anduangi.

³⁰Na oho ee Jerusalemu kusighilo mkiwa, kwaki kukurushagha nguwo ra ngundu na kukupamba na vilambo va dhahabu, na kukushinga rangi ra meso na kukughokesha duu? Awo kubonyagha lukundo nawo, wameria kukulegha; nawo weekunda kukubwagha.

³¹Kwa kukaia namerie kusikira kililo, sa cha muka ukumbagha lufu; luwawo sa lwa muka uvagha mwana wake wa imbiri; Ni lwaka lwa Jerusalemu, ukumbagha miruke na kukumba mikonu yake nokoighu ukighamba, “Ni bugha kwapo, naawuyadumbuka imbiri ya wabwaghi.”