Read TAITA BIBLE – Biblia Ilagho Jiboie Kwa Wandu Wose JEREMIA 40 Bible Online

JEREMIA 40 - TAITA BIBLE – Biblia Ilagho Jiboie Kwa Wandu Wose bible

JEREMIA 40

¹BWANA oreghorieghe nani nyuma ya Nebuzaradani uja mbaa wa majeshi kunifungua aho Rama, iji orenidwaeghe nifungilo na minyororo chiaimweri na wose weredwaloghe wunyika kufuma Jerusalemu na Juda, na kughenjwa wubarishonyi cha Babuloni.

²Uja m'baa wa majeshi ukanidwa mbalama ukanizera, “BWANA Mlungu oreghorieghe malagho gha kunoneka kwa muzi ughu;

³nao waghikatishire na kubonya sa iji koni oreghorieghe. Kwa kukaia morebonyereghe kaung'a aighu ya BWANA, mkalegha kumsikira niko agha ghamchea aighu konyu.

⁴Idana zighana nakufungua ihi minyororo iko mikonunyi kwako idime. Iji kwawona nicha kughendanya nani cha Babuloni, choo tu nichakulindia; ela kukawona si nicha kughendanya na ini cha Babuloni, kuseche. Wona isanga jose jeko imbiri kwako; ghenda andu uko kose kuwonagha nicha kughenda.

⁵Kawona kuasigharika, kuwuye kwa Gedalia mwana wa Ahikamu wawae Shafani, uo uwikilo ni mzuri wa Babuloni ukaie m'baa wa mizi ya Juda. Kukaianye nao aghadi ya wandu, angu kughende andu uko kose kuwonagha kuchakufwana.” Niko uo m'baa wa majeshi ukanineka vindo vimu na manosi, ukanisigha nighende.

⁶Nao ngaghenda kwa Gedalia mwana wa Ahikamu aho Mispa, ngakaia nao aghadi ya wandu weresigharikieghe isangenyi.

⁷Wabaa wa majeshi wa Juda wisigharikie chiaimweri na wandu wawo wiko isangenyi weresikireghe kukaia mzuri wa Babuloni wam'bonya Gedalia mwana wa Ahikamu ukaie m'baa wa isanga, uwizighaneghe womi na waka na wanake, awo werekoghe wakiwa isangenyi, wiseredwaloghe wunyika cha Babuloni.

⁸Wikamghendia Gedalia aho Mispa; nawo werekoghe Ishmaeli mwana wa Nethania, na Johanani mwana wa Karea, na Seraia mwana wa Tanhumethi, na wana wa Efai, Mnetofathi, na Jezania mwana wa Mmaaka; nawo werekoghe na wandu wawo.

⁹Gedalia mwana wa Ahikamu wawae Shafani ukabonya ighemi kwawo na kwa wandu wawo ukighamba, “Msakeobua kuwidumikia Wababuloni; kaienyi isangenyi mumdumikie mzuri wa Babuloni nenyo mchakaia nicha.

¹⁰Ini nichakaia Mispa kwa wundu ghonyu imbiri ya Wababuloni wichaadichea. Ela inyo tumbanyenyi divei na matunda gha sumesu na mavuda, muviwike vombonyi konyu, mkaie mizinyi konyu iyo mwaiwusa.”

¹¹Wokoni Wayahudi wose werekoghe Moabu, na aghadi ya Waamoni, na Edomu, na masanga mazima, wiendasikira kukaia mzuri wa Babuloni wasighie masighariko gha wandu wa Juda, na kummbika Gedalia mwana wa Ahikamu, wawae Shafani, ukaie m'baa wa isanga aighu yawo,

¹²wikawuya wose kufuma masanga werekoghe wawingwa, wikacha isanga ja Juda kwa Gedalia aja Mispa, wikatumbanya divei na matunda gha sumesu kwa wungi.

¹³Idana Johanani mwana wa Karea na vilongozi vose va majeshi wikaiagha isangenyi wikamchea Gedalia aho Mispa

¹⁴wikamzera, “Keni kwaichi kukaia Baalisi mzuri wa Waamoni wadumie Ishmaeli mwana wa Nethania uchekubwagha?” Ela Gedalia mwana wa Ahikamu nderewirumirieghe.

¹⁵Niko Johanani mwana wa Karea ukaghoria Gedalia kivisonyi aho Mispa ukighamba, “Leka niendem'bwagha Ishmaeli mwana wa Nethania, na mndungi ndechaamanya. Kwaki ukunde kukubwagha eri Wayahudi wose wikukwanyikie wipate kusaghiswa na masighariko gha wandu wa Juda witote?”

¹⁶Ela Gedalia mwana wa Ahikamu ukamzera Johanani mwana wa Karea, “Kusebonye ilagho ijo; kwa kukaia oho kwaawuyamzighiria Ishmaeli.”