Read TAITA BIBLE – Biblia Ilagho Jiboie Kwa Wandu Wose JEREMIA 5 Bible Online

JEREMIA 5 - TAITA BIBLE – Biblia Ilagho Jiboie Kwa Wandu Wose bible

JEREMIA 5

¹Kimbienyi ii chia na ii chia andenyi ya chia ra Jerusalemu, mzighane nicha, lolenyi viwachenyi vake kose, ngera mwadima kuwona mndungi ubonyagha hachi, ulolagha loli, nani nichaghufuya wughoma ugho muzi.

²Hata ngera wawuyaghema kwa irina ja BWANA wikighamba, “Sa iji BWANA ukaiagha moyo.” Ela sena wadaghema kwa tee.

³Ee BWANA, meso ghako ndeghizighanagha iyo loli anguwada? Oho kwawikabie, ela ndewisikire luwawo lungi, kwawionyere, ela waleghie kukuboisa weni. Wakurishire nia rawo kuchumba igho, nawo waleghie kuhea.

⁴Niko ngaghamba, “Awa ni wandu wakiwa, ndewiwadie akili ringi; kwa kukaia ndewiichi chia ya BWANA iyo sharia ya Mlungu wawo.

⁵Nichawighendia vilongozi, nani nichaghora nawo; kwa kukaia awo waiichi chia ya BWANA, iyo sharia ya Mlungu wawo.” Ela wose kwa nia imweri waleghie kubonyerwa nguma ni BWANA, na kulegha kumsikira.

⁶Kwa huwo wichabwaghwa ni shimba ifumagha kilembenyi, na kikwau chifumagha kireti chichawitotesha. Inge yaawuyalaliria mizi yawo, mndungi uchaafuma ucharashulwa vipande vipande, kwa kukaia makosa ghawo ni mengi, na kuwuya nyuma kwawo kwakaia kubaa.

⁷BWANA waaghamba, “Nidima wada kukufuya wughoma? Wana wako wanileghie, na kughema kwa ivo viseko milungu ingi. Iji nerewijishireghe wikaghuda, werelakieghe na kungia andenyi ya nyumba ra malaya.

⁸Wakaia karakara na farasi ra womi rilishiro nicha richulo ni bea, Kula mundu ooka na bea na muka wa mmbao.

⁹Welee, ndeinifwane niwikabe kwa maza iri? Ndeinifwane nilipie kisasi kwa mbari ya wandu sa ihi?

¹⁰Jokenyi muitoteshe mizabibu yawo, ela mseitoteshe putu; injenyi mbashu raro, kwa kukaia si ra BWANA kungi.

¹¹Kwa kukaia wandu wa Israeli na wandu wa Juda, waleghie kukaia waloli kwapo putu.”

¹²Wadedie kiwiwi aighu ya BWANA, wikighamba, “Ndedimagha kubonya ilagho jingi, hata ndedichelwagha ni wuwiwi ghungi; ndedichaawona wuda ghungi hata njala.

¹³Awo walodi wiadeda malagho tu sa mbeo, hata ijo ilagho ndejiko andenyi kwawo, agho wighighoragha ghiwipata weni.”

¹⁴Kwa wundu ugho, BWANA, uo Mlungu wa majeshi waghamba huwu, “Kwa kukaia wakuzera agha malagho oho Jeremia, ola nichabonya ilagho japo momunyi kwako jikaie sa modo, na wandu awa wichakaia sa mbande, na modo ghuchawimeria.

¹⁵“Ola nawuyareda aighu yenyu inyo wandu wa Israeli, mbari ya wandu ifumagha kula. Ni mbari imange, mbari ya kala, kiteto chawo msechimanyagha, hata msedimagha kuelelwa ni agho wighoragha.

¹⁶Zaka yawo eeka sa kaburi iko iari; wandu waro wose ni awo wiko na ndighi.

¹⁷Wichaja makuwido ghako na vindo vako; wichabwagha wana wako wa womi na wa waka; wichachinja ng'ondi rako na ng'ombe rako; wichanona mizabibu yako na mitini yako; wichanona mizi yako ya ngome kuirumirie, kwa wuda.”

¹⁸BWANA waghamba, “Ela hata andenyi ya matuku ghaja, sichaawimeria wandu wapo putu anduangi.

¹⁹Na ngelo wichaaghamba, ‘Ado kwaki BWANA Mlungu odu wadibonyera maza iri?’ Kuchawizera, ‘Sa iji koni winileghie na kuidumikia milungu ya kighenyi isangenyi kwawo, niko koni wichaawidumikia wandu wa kighenyi isangenyi jiseko jawo.’”

²⁰BWANA waghamba, “Ghorienyi kivalwa cha Jakobo, na kuwiereshera wandu wa Juda maza iri,

²¹Sikirenyi malagho agha inyo wandu wakelu msewadie akili ringi; wandu muko na meso, ela msewonagha.

²²Wele ndemuniobuagha ini? Ndemsughusikagha imbiri kwapo? Ini nawikie msangagha ghukaie mpaka ghwa bahari, kighirio cha toe machi ghisedimagha kuchumba, hata ngera mivo-mivo ya bahari yakumicha, isedimagha kughusima, hata ngera yaruruma, isedimagha kuida aighu yaro.

²³Ela awo wandu weeka na ngolo rikurie relegha kusikira; wamerie kughaluka nambai na kughenda noko.

²⁴Ndewighoragha ngolonyi kwawo, ‘Ndedimuobuo BWANA Mlungu odu, uo udinekagha vua kwa vimu varo; vua ya sumesu na vua ya kwari, uo udiwikiagha vimu va makuwido.’

²⁵Mawiwi ghenyu ghainjire na kuwika ivo vindo viboie kula nenyo.

²⁶“Wandu wawiwi wawoneka aghadi ya wandu wapo, wadalaliria karakara na wadeghi wideghagha na kulaliria wikiwesera. Wadadegha mdegho na kuwada wandu.

²⁷Nyumba rawo rachua mikalo kara kara na mdiwi wachura nyonyi kikapunyi; kwa chia iyo wawurie wandu wabaa wichue mali;

²⁸ni wandu wibandie widendere. Mabonyo ghawo ghizamie ndeghina kipimo; ndewiichi kutanya hachi kwa mwana mkiwa usewadie ndee, hata uwone nicha; ndewidederiagha hachi ra uo uko ukitiro.

²⁹“Wele nilemwa wada ni kuwikaba kwa wundu ghwa maza iri? Welee niselipie kisasi aighu ya mbari sa ihi?

³⁰Ilagho jizamie putu jeobosha jawoneka isangenyi:

³¹Walodi wawuyaloda tee, na wakohani waawuyabonya nguma kwa wulongozi ghwa awo walodi; wandu wapo nawo weekunda maza rikaie woruwo, ela, mchabonya wada ngelo ra kutua?”