Read TAITA BIBLE – Biblia Ilagho Jiboie Kwa Wandu Wose JEREMIA 51 Bible Online

JEREMIA 51 - TAITA BIBLE – Biblia Ilagho Jiboie Kwa Wandu Wose bible

JEREMIA 51

¹BWANA waghamba huwu, “Olenyi nichareda mbeo enona aighu ya Babuloni na wandu waro;

²nani nichareda wandu wa kighenyi wenona Babuloni seji mbeo ielagha makanda, nawo wichanona ugho muzi na kusigha isanga iduu, ingelo wacha kufuma chia rose ituku ja wasi.

³Msesighe wakumbi mawanu wirude ndana rawo, angu kurwa nguwo rawo ra chuma. Msesighare wandu wawo wa irika, mtoteshe ijeshi jawo jose putu.

⁴Wichabwaghwa andenyi ya isanga ja Wababuloni na kushoghonolwa chienyi rake.

⁵Angu ini Mlungu, BWANA wa majeshi, siwisighie wandu wapo Israeli na Juda anduangi; ela isanga ja Wababuloni jeechulwa ni mawiwi aighu yapo ini Mlungu Mweli wa Israeli.

⁶Kimbienyi mfume Babuloni, kula mundu ndekire irangi jake; msechebwaghwa andenyi ya ikabo jake; angu ihi niyo ngelo yapo ini BWANA elipia kisasi, agho malipo ghimfwanagha kulipilwa.

⁷Babuloni edeeka sa kikombe cha dhahabu mkonunyi kwapo, chibonywaghwa wurumwengu ghose ghuwongie; iro mbari rerenyueghe divei yake rikakaia seji raawukwa ni isu.

⁸Babuloni yaghwa shwa-shwa ikabarika; ililienyi! Wadenyi mavuda gha zeri kwa wundu ghwa luwawo lwake, kewada yadima kuboa.

⁹Waghenyi wiko aho wikaghamba, ‘Kumangu daghuboisire muzi ghwa Babuloni, ela ghoolema kuboisika. Ghusighenyi noko dighende kula mundu cha isangenyi jake; kwa kukaia kutanywa kwake kwavikie mlungunyi, nako kwawusirilo hata mawingunyi.’”

¹⁰BWANA waghamba, “Wandu wapo waghamba, ‘BWANA wamerie kudidederia; nndokonyi dighore kazi ra BWANA Mlungu odu andenyi ya Jerusalemu.’”

¹¹Kalishenyi mawanu, mmbwade ngao! Ini BWANA narinyavurishire roho ra wazuri wa Wamedi, kwa kukaia makusudi ghapo aighu ya Babuloni ni kutotesha ugho muzi; angu icho nicho kisasi chapo kwa wundu ghwa Hekalu yapo.

¹²Josenyi kiweto aighu ya mawurigha gha Babuloni, wikenyi wulindiri ghumange; wikenyi walindiri, boisenyi andu kokuvisa; kwa kukaia ini BWANA namerie kubonya mpango, ngaghukatisha sa iji nereghorieghe aighu ya wandu wikaiagha Babuloni.

¹³Ee mundu kukaiagha kaavui na machi mengi, kushamie nandighi; hata kutua kwako kwavika, kipimo cha irangi chasia.

¹⁴Ini BWANA wa majeshi namerie kughema kwa ini moni ngighamba, kwa loli nichachura wandu aha, wiko wengi sa izungu ja zighe, nawo wichakema ngemi ya wusimi aighu yako.

¹⁵BWANA nuo ubonyere ndoenyi kwa kudima kwake, nuo umangishire wurumwengu kwa hikima yake, na kwa kumanya kwake; ukawika mlungunyi.

¹⁶Ukadeda, lwaka lwake luaghonesha machi mlungunyi, na kubonya ikungughu jijoke kufuma kutua kwa ndoenyi; wadabonya luhehia luwoneke andenyi ya vua, na kureda mbeo kufuma andu uiwikagha.

¹⁷Kula mundu ni mkelu usewadie kumanya kungi; kula mundu uchanagha dhahabu wafwa waya kwa wundu ghwa iyo milimu yake, angu milimu yake ni ya tee, hata ndeiwadie miruke ingi andenyi yaro anduangi.

¹⁸Ndeiwadie fwaida ingi, ni kazi ya duu; ngelo ya kukabwa kwawo ichatota.

¹⁹Mlungu wa Jakobo ndeko sa iyo anduangi, angu uo nuo ubonyere vilambo vose; mbari ya Israeli niyo uisaghue ikaie ifwa jake, na irina jake ni BWANA wa majeshi.

²⁰BWANA waghamba, “Babuloni, oho ko nyondo yapo na iswagha ja wuda, nichakutumia kwa kubara-bara mbari ra wandu vipande vipande, na kutotesha mawuzuri.

²¹Nichakutumia kwa kutotesha farasi na mjoki farasi, igare na mjoki igare.

²²Nadakutumia kwa kuwitotesha mndwawomi na muka, mghosi na mundu wa irika, mdawana na mwai.

²³Nadakutumia kwa kumtotesha mlisha na chagha chake; nadakutumia kumtotesha mlimi na wandu wake, nadakutumia kwa kuwitotesha wabonyi nguma na wabaa wawo wa majeshi.”

²⁴BWANA waghamba, “Nichamlipa Babuloni na wandu waro ugho wuwiwi ghose wereghubonyereghe Jerusalemu imbiri ya meso ghako.

²⁵Ola nichalwa na oho ee Babuloni Mnoni kuko sa mghondi ghototesha, nagho ghwadatotesha ndoenyi kose; nichaghorua mkonu ghwapo aighu yako, nani nichakung'arisha kufuma mchombololonyi ghwa igho, nikughushe andoenyi na kukubonya sa mghondi ghukorelo.

²⁶Igho jingi ja mbembenyi ndejichaapatika kwako, hata igho jingi ja msingi, ela kuchasighwa duu kwa kala na kala, ini BWANA naghamba.

²⁷“Josenyi kiweto ndoenyi, kabenyi tarumbeta aghadi ya mbari ra wandu, wikenyi iro mbari nicha, ripate kulwa na Babuloni; wangenyi mawuzuri gha Ararati, na Mini, na Ashkenazi wichelwa nao; mmbike m'baa olongoza wuda gholwa nao, mrede farasi nyingi sa izungu ja zighe.

²⁸Wikenyi iro mbari ra wandu ripate kulwa na Babuloni; wazuri wa Waamedi chiaimweri na awo wibonyagha nguma, na wabaa wawo watini, na kula isanga jiko aisi ya wuzuri ghwake.

²⁹Isanga jaawuyasughusika na kuwawa kwa wasi, kwa kukaia mipango yapo ini BWANA aighu ya Babuloni ndeighalukie, nipate kujibonya ijo isanga jisigho iduu jisekailwagha ni wandu.

³⁰Masikari gha Babuloni ghiko mang'oni ghameria kuleka wuda, nawo wasigharika andenyi ya ngome rawo; ndighi rawo ramerie kusia, wikawuya sa waka; malalo ghake ghekaia ghameria kukorwa, na vuma vawo verugha vameria kuchikanywa.

³¹Wadumwa waawuyanughana wikikimbia kwendamghoria mzuri wa Babuloni malagho, kukaia muzi ghwake ghameria kuwadwa kula andu.

³²Viruwuko vameria kuwadwa, na ngome rameria kukorwa; masikari ghawadwa ni kiwogho-wogho.

³³Wandu wa Babuloni wichawadilwa sa viro awazenyi vakachanwa; ngelo yake ekuwida yalighisa, ini BWANA wa majeshi, Mlungu wa Israeli, naghamba.”

³⁴Wandu wa Sioni ndewighambe, “Nebukadnezari mzuri wa Babuloni wameria kudija, wamerie kudifasha-fasha; wadibonyere diwoneke sa kilambo kiduu wadimilie sa are; waghudishiro ni kuboa kodu, na kudidaika.

³⁵Wuwiwi ghubonyero aighu yedu na aighu ya wamzedu, ghulipilo aighu ya Babuloni;” na wandu wa Jerusalemu ndewighambe, “Bagha yedu ndeikaie aighu ya wandu wa isanga ja Babuloni.”

³⁶Kwa huwo, BWANA waghamba huwu aighu ya wandu wa Jerusalemu, “Olenyi nicharizighana maza renyu, nani nichalipa kisasi kwa wundu ghonyu. Nichaomera ndiwa ra Babuloni na kuomera ndoria raro ra machi.

³⁷Na Babuloni ichanonwa na kuwuya ighacho; iwuye andu kwa mizozo, koshinikilwa na kusekwa, kusekailwagha ni wandu.

³⁸Wandu wa Babuloni wicharuma chiaimweri sa shimba; wichakema sa wana wa shimba.

³⁹Wikawawa, nichawibonyera karamu na kuwiwongera hata wiboilo; wichalala dilo wisechaawuka sena.

⁴⁰Nichawighenja sa wana wa ng'ondi wiendaabwaghwa, karakara na bauru na fwandi.”

⁴¹BWANA waghora huwu aighu ya Babuloni, “Babuloni yawadwa-wadwa wada, ee, ugho muzi ghwa Babuloni ghorekumwagha ndoenyi kose! Ghwawurie wada ghoshinikilwa aghadi ya mbari ra wandu!

⁴²Babuloni yamilwa ni bahari, yafinikirwa ni mivo-mivo yaro irurumagha.

⁴³Mizi yaro yawuya kilambo cheobosha, isanga jiomie jiwurie ikara ja kireti; isanga jisekailwagha ni mndungi, hata jiseidwagha ni mdamu ungi.

⁴⁴Nani nichamkaba Beli ghuja mlungu ghwa Babuloni na kumdaisa ivo vindo uvimilie; wandu wa iro mbari ndewichaamchea sena, wurigha ghwa Babuloni ghameria kughwa.

⁴⁵“Fumenyi ugho muzi inyo wandu wapo, kula mundu ndekire irangi jake na agho machu ghapo ghibirie.

⁴⁶Msakefwa ngolo, hata msakeobua kwa wundu ghwa agho mughisikiragha isangenyi. Msakeobua ingelo mwasikira malagho mwaka ghumu, na mwaka mzima kusikira malagho ghamu sena, hata mkasikira maza ra nganyi isangenyi na wuzuri ghukilwa aighu ya wuzuri.

⁴⁷Zighana matuku ghichacha, nani nichaikaba milimu ya Babuloni na isanga jake jose jichafushwa waya; na wandu wake wichaabwaghwa, wichafuya aghadi ya ugho muzi.

⁴⁸Aho niko mlungunyi na ndoenyi, na vose viko andenyi yaro, vichabora kwa kuboilwa aighu Babuloni: kwa kukaia wanoni wichawichea kufuma kaskazinyi.

⁴⁹Babuloni uchaghwa kwa wundu ghwa kuwibwagha Waisraeli, na wokoni kwa kubwagha wandu wa ndoenyi kose.”

⁵⁰BWANA waghamba huwu kwa wandu wake wiko Babuloni, “Inyo wandu mfufunukie msebwaghilo ghendenyi, msedunge maghu; hata ngera moko kula na mzinyi, ela nikumbukenyi ini BWANA, mgheshe Jerusalemu.

⁵¹Nenyo mwaghamba, ‘Isi daawuyafushwa waya, angu dimenyero na kufushwa waya; kwa kukaia wandu wa kighenyi wachee, na kungia andenyi ya andu kwa wueli, andenyi ya Hekalu.’

⁵²Kwa huwo ini BWANA naghamba kukaia matuku ghichacha, nani nichareda kutanya aighu ya milimu ya Babuloni, na aghadi ya isanga jake jose; na awo wishoghonokie wichakaia wikiruma.

⁵³Hata ngera Babuloni wakujosa hata mlungunyi, na kuagha ngome rake rimange koighu, ela sena nichamdumia wandu wemtotesha, ini BWANA naghamba.”

⁵⁴BWANA waghamba, “Sikirenyi kililo kufuma Babuloni, kililo cha kunoneka kubaa kufuma kwa Wababuloni!

⁵⁵Angu ini BWANA naawuyabonya isanga ja Babuloni jisigho iduu, na kunyamirisha ulo lwaka lwake lubaa. Ndoghoi ya wamaiza yaruruma sa machi mengi, na chwaka rawo rakaia mbaa.

⁵⁶Mtoteshi wameria kucha aighu ya Babuloni; masikari ghake ghawadwa, na ndana rawo rachikanywa-chikanywa, kwa kukaia ini BWANA ne Mlungu olipia, nani kwa loli nichalipia kisasi.

⁵⁷Nichawiwongera wabaa wake na wandu wake wa hikima, wabonyi nguma wake, na wabaa wake wa majeshi, na masikari ghake; wichalala putu wisechaawuka sena, Ini Mzuri, niwangwagha BWANA wa majeshi, naghamba.

⁵⁸Wurigha mshapa ghwa Babuloni ghuchaghushwa hata andoenyi, na mbenge rake riko ighu richakorwa, wandu wichadumika duu, na kazi rawo rose wawuyabonya richakorwa, Ini BWANA wa majeshi naghamba.”

⁵⁹Seraia mwana wa Neria, wawae Mahiseia orekoghe mzighaniri m'baa wa nyumba ya Zedekia mzuri wa Juda. Mwaka ghwa kana ghwa kubonya nguma kwa Mzuri Zedekia, oreghendanyeghe na mzuri cha Babuloni; na ini Jeremia ngamneka malaghiro.

⁶⁰Nereandikieghe andenyi ya chuo mawiwi ghose aighu ya muzi ghwa Babuloni, agho malagho ghose nereghiandikieghe aighu ya Babuloni.

⁶¹Nao ngamzera Seraia, “Kukavika Babuloni kushomie wandu agha malagho ghose,

⁶²nao kughambe: ‘Ee BWANA, oho kwameria kughora malagho aighu ya andu aha, kukaia kuchaghuinja ughu muzi, hata kilambo chingi chisedime kukaia aha, ikaiagha ni mdamu angu nyamandu, nagho ghuchasighwa mduu kwa kala na kala.’

⁶³Kukameria kushoma icho chuo, kuchifunganye na igho nao kuchikumbe ghadi na ghadi ya Moda ghwa Eufrate;

⁶⁴nao kughambe, ‘Babuloni ichaneng'ena machinyi huwu, hata isedime kuwuyajoka sena kwa wundu ghwa ugho wuwiwi niirediagha.’” Uko niko kutua kwa malagho gha Jeremia.