Read TAITA BIBLE – Biblia Ilagho Jiboie Kwa Wandu Wose JEREMIA 7 Bible Online

JEREMIA 7 - TAITA BIBLE – Biblia Ilagho Jiboie Kwa Wandu Wose bible

JEREMIA 7

¹BWANA ukaghora nani ukighamba,

²“Ghenda kukaie kimusi mbengenyi ya BWANA, kughore malagho agha, sikirenyi ilagho ja BWANA inyo wandu wose wa Juda mchagha na kungia iri mbenge kuendamtasa BWANA.

³BWANA wa majeshi uo Mlungu wa Israeli waghamba huwu, Boisenyi chia renyu, nani nichamsigha mkaie aeni aha.

⁴Msakeghirumiria agha malagho gha tee gheghora, ‘Ihi ni Hekalu ya BWANA, Hekalu ya BWANA, Hekalu ya BWANA.’

⁵“Angu mkaboisa chia renyu na mighendo yenyu kwa loli, na kwa loli mkaitala hachi aghadi yenyu mmbeni na mmbeni,

⁶nao mkaie msemkorongagha mghenyi, na mwana mkiwa, na muka mkiwa angu kudia bagha ya wandu wisena ikosa andenyi ya muzi ughu, nenyo msighe kuinugha milungu mizima emnonia inyo mmbeni;

⁷niko na ini nichamsigha mkaie aeni aha isangenyi ijo nerewinekieghe weke ndeyo kokala, mpate kujikaia kwa kala.

⁸“Wonenyi seji mrumirie malagho gha tee ghisefwanagha.

⁹Kwani mwadima kuiwa, na kubwagha, na kulaka, na kughema kwa tee, na kufukiria Baali marumba, na kutasa milungu mizima msereimanyireghe,

¹⁰nao sena muche na kukaia kimusi imbiri kwapo andenyi ya nyumba ihi iwangilo kwa irina japo mkighamba, ‘Dakirilo!’ Sena ii chia muabonya agho mawiwi ghose?

¹¹Welee, i nyumba iwangilo kwa irina japo eewuya mbanga ya viting'a konyu? Ola nariwona iri maza ini moni, waghamba BWANA.

¹²Idana ghendenyi aho kwapo Shilo andu nerekusaghueghe kufuma imbiri, mpate kuwona seji nerekubonyereghe kwa wundu ghwa wuwiwi ghwa wandu wapo Israeli.

¹³Mwabonyere kaung'a iri rose; na iji nereghorieghe nenyu kalazi, ndemorenisikireghe; hata iji neremmbangieghe wori ndemoredikieghe.

¹⁴Kwa wundu ugho, sa iji koni nerebonyereghe Shilo, nichaibonyera wokoni iyo Hekalu iwangilo kwa irina japo, iyo muko na irumirio nayo, na andu aho nerekunekieghe weke ndeyo na inyo.

¹⁵Nani nichamkumba noko kula nani, sa iji nerewikumbieghe wamzenyu noko, awo wandu wa Israeli.”

¹⁶“Na oho Jeremia, kusakewilombia awa wandu, hata kusakenililia angu kunivoya kwa wundu ghwawo, kwa kukaia sichaakusikira anduangi.

¹⁷Ndekuwuewona seji wibonyagha andenyi ya mizi ya Juda, na chienyi ra Jerusalemu?

¹⁸Wana waawuyashoa mbande, na weke ndee wiakora modo; waka wiaruwa mufu wibonye mkate kwa wundu ghwa mlungu ghwa waka wighuwangagha Malkia wa Mlungunyi. Nawo wadunga vizongona venywa kwa milungu mizima, wipate kuwusira machu ghapo.

¹⁹Welee, ni ini wawuyanivavira? Wele ndawaawuyakuvavira na kukufusha waya wenii anguwada?

²⁰Ola machu ghapo na lubio lwapo luchakaia aighu ya Hekalu ihi, aighu ya mundu na nyamandu, aighu ya midi ya mbuwenyi na aighu ya mavalo ghose gha isanga. Machu ghapo ghichaaka sa modo ghuserimikagha.”

²¹BWANA wa majeshi, uo Mlungu wa Israeli waghora huwu, “Churienyi vizongona venyu vekora aighu ya vizongona venyu, mpate kuja nyama rose.

²²Angu jija ituku neremjosereghe kufuma isanga ja Misri, sereghorieghe na weke ndeyo angu kufunya momu ghungi kwawo aighu ya vizongona vekora na vizongona vizima anduangi.

²³Ela nerewinekieghe momu ughu, ‘Munisikire, nani nichakaia Mlungu onyu, na inyo mchakaia wandu wapo; mghende kwa iyo chia cheni nimlaghiragha mpate kuwona mecha.’

²⁴Ela ndewerenisikireghe hata kunideghia kudu; wikaghenda kwa kunugha njama rawo reni, kwa kukua kwa ngolo rawo rizamie; wikazama kuchumba kukaia nicha.

²⁵Kufuma ituku jija nerewifunyireghe weke ndeyo isanga ja Misri hata idime, sisighie jingi kuwidumia wazumba wapo tuli tuli,

²⁶ela ndewerenisikireghe hata kunideghia kudu; wikachuria kughilika, na kubonya mawiwi kuchumba weke ndee.

²⁷“Kwa huwo oho Jeremia, kuchawighoria wandu wapo agha malagho ghose; elaima ndewichaakusikira kungi. Kuchawiwanga ela ndewichaakudika.

²⁸Na oho kuchawizera, ‘Ihi ni mbari iserelusikireghe lwaka lwa BWANA Mlungu wawo, hata ndewerewusireghe kuja kuwunjwa ni Mlungu, na kwawo loli yamerie kusia, hata ndeikaiagha anduangi.’

²⁹“Lilenyi, muare maridia ghenyu, mghikumbe noko ee wandu wa Jerusalemu; kemenyi ngemi aighu mighondinyi, kwa kukaia ini BWANA nawileghie na kuwisigha wandu wiwusiragha machu ghapo.

³⁰“Wandu wa Juda wabonyere ilagho jizamie imbiri kwapo, wawikie milimu yawo andenyi ya Hekalu iwangilo kwa irina japo wipate kuinona.

³¹Waaghie madhabahu Tofethi andenyi ya Vololo ya Hinomu eri wipate kukora wana wawo wa womi na wa waka modonyi kwa kuwifunya kizongona; ilagho niserewilaghirieghe, hata jingi jisengia andenyi ya maghesho ghapo.

³²Kwa huwo zighana matuku ghichacha, andu aho kusechaawangwa Tofethi angu Vololo ya Hinomu, ela kuchawangwa Vololo Echinjira; kwa kukaia wandu wasowa andu kungi korikia, wicharika aho Tofethi.

³³Na mimbi ya awo wandu ichawuya vindo va nyonyi na va nyamandu ra isakenyi, hata mndungi ndechaariturusa iro nyamandu anduangi.

³⁴Ndekuchaakaia na mndungi andenyi ya mizi ya Juda na hata chienyi ra Jerusalemu; ndekuchaakaia na kuseka kungi aho, hata kuboilwa kungi; lwaka lwa bwana arusi angu lwa bibi arusi ndeluchaasikirika aho, kwa kukaia aho kuchawuya sa kireti.