Read TAITA BIBLE – Biblia Ilagho Jiboie Kwa Wandu Wose KILILO CHA JEREMIA 3 Bible Online

KILILO CHA JEREMIA 3 - TAITA BIBLE – Biblia Ilagho Jiboie Kwa Wandu Wose bible

KILILO CHA JEREMIA 3

¹Ni ini niichi seji Mlungu ukajokwa ni machu ukabagha.

²Wanilongozere na kuningira andenyi ya kira kibaa.

³Wanikabie sena na sena kuseko na wughoma.

⁴Wabonyere mumbi ghwapo ghukadaruma na kusia; wachikanyire maindi ghapo.

⁵Wanirughie na kuningira kifungonyi cha wasi na matiriro.

⁶Wanibonyere kukaia andenyi ya kira sa mundu ufue kokala.

⁷Wanifungie na minyororo; nakaia mfungwa usene isuwirio jefufunuka.

⁸Nakema ngilola wutesia, ela Mlungu walegha kunisikira.

⁹Wafungie chia yapo na magho ghiwachilo; wabonyere chia yapo ikaie ya ngulai-ngulai.

¹⁰Orekoghe ukinilaliria sa kibarabara, ukaniramia sa shimba.

¹¹Wanifunyire chia na mbai ukanirashua-rashua; ukanisigha nisewadie wutesia ghungi.

¹²Warudie ndana yake, ukanibonya nikaie bole olasa na mawanu ghake.

¹³Ukanilasa, mawanu ghake ghikangia ndenyi mumbinyi kwapo.

¹⁴Nadasekwa ni wandu wapo wose; wadasinda nidema sare wikinileza.

¹⁵Wanighudishire matiriro ghibirie, wulalo ghwa vindo na kunywa.

¹⁶Wanikurue wushu ghwapo na ndoe, na kuchikanya maghegho ghapo shangadonyi.

¹⁷Naimilo sere; naliwie seji mecha ghiko.

¹⁸Kwa huwo niaghora, “Wubaa ghwapo ghoosia; wokoni isuwirio japo neresuwiriagha kwa BWANA jeesia.”

¹⁹Uko kughesha luwawo lwapo, na uko kusowa muzi kwapo, ni sa sumu ibirie.

²⁰Nadaririkanya maza iri ngelo rose, nani niasowa isuwirio.

²¹Ela nadawurilwa ni isuwirio iji nakumbuka ilagho iji:

²²Lukundo lwa BWANA lukatie ndelusiagha, na wughoma ghwake ndeghuwadie kutua kungi anduangi.

²³Ni mmbishi kula ituku, wuloli ghwake ni m'baa.

²⁴Neeka na BWANA moni, kwa huwo naawuyamsuwiria uo.

²⁵BWANA ni mucha kwa kula umu umsuwiriagha.

²⁶Kwa huwo ni nicha diwesere kwa irumaghio; dimmbesere udikire.

²⁷Ni nicha mundu kukufundisha irumaghio ngelo uko wa irika.

²⁸Dikatirirwa ndedikaie kima diekeri dikirumaghia; kwa kukaia BWANA nuo wadiredia ugho wasi.

²⁹Ndedikusere dikufunye kwake, angu aho jeko isuwirio sena.

³⁰Dikeduakabwa na kudukanwa, diwuse ghose.

³¹BWANA ni wa wughoma; ndechaadida putu anduangi.

³²Wadima kudiredia wasi, ela kwa loli wadikunde putu.

³³Ndeboilwagha ni kudiredia wasi angu luwawo.

³⁴BWANA waichi ingelo roho redu ratirirwa kifungonyi;

³⁵waichi iji dasowelwa hachi redu;

³⁶BWANA waichi iji hachi yalaghashwa kotinyi.

³⁷Nani wafunya momu maza rikabonyeka isaakaia ni BWANA moni walaghira?

³⁸Welee, Uo-Uko-Aighu-Nandighi suo ughoragha mecha na mawiwi ghiche?

³⁹Kwaki mdamu ulalamikagha iji wakabwa kwa wundu ghwa kaung'a rake?

⁴⁰Ndediripime na kuritima chia redu; dimmburie BWANA.

⁴¹Ndedirughuo ngolo redu cha kwa Mlungu uko mlungunyi dilombe huwu:

⁴²“Dabonyere kaung'a dikakulegha, na oho ee BWANA ndekudifuye wughoma.

⁴³“Kwadinughie kukadibwagha, wughoma ghwako ghwavisiro ni machu ghako.

⁴⁴Kwakufinikire iwingu ja machu ghako hata malombi ghedu ndeghikuvikiagha.

⁴⁵Oho kwadibonyere dikaie majala na wuchafu aghadi ya wandu.

⁴⁶“Wamaiza wedu wose waawuyadiseka.

⁴⁷Dapatiro ni wasi na kunoneka; daawuyakaia ndengonyi, diko na kiture.

⁴⁸Naawuyadikwa ni mbori sa machi, kwa wundu ghwa kutoteshwa kwa wandu wapo.

⁴⁹“Nichadikwa ni mbori risesiagha,

⁵⁰hata BWANA uzighane kufuma mlungunyi, na kudiwona.

⁵¹Nawawa ni ngolo kwa kuwona agho ghiwipatire waka wa muzi.

⁵²“Wamaiza wapo wereniwadieghe sa nyonyi; awo werezamilwagha ni ini duu.

⁵³Werenikumbieghe kinenyi nimoo, wikafinikira igho momunyi kwaro.

⁵⁴Ngazoya kungilwa ni machi ngadawona niafwa.

⁵⁵“Nerekukemieghe niko konndonyi kinenyi ee BWANA.

⁵⁶Niendakulomba kusikirie kililo chapo, koresikireghe.

⁵⁷Korenitumbulieghe kukanizera niseobuo.

⁵⁸“Korechieghe kukanivuvua BWANA, kukanikira.

⁵⁹Kunitanyire hachi ee BWANA; oho kwamanya seji nibonyere kiwiwi.

⁶⁰Oho kwaichi seji wamaiza wapo wawuyazamilwa ni ini, na seji wawuyanideda njama.

⁶¹“Kwasikire wikinidukana ee BWANA; kwaichi njama rawo rose cha kwapo.

⁶²Wadasindanideda dii, na kubonya mipango yawo aighu yapo.

⁶³Wadasinda wikinileza kufuma nakesho hata nakenyi.

⁶⁴“Kuwikabe kwa wundu ghwa agho wighibonyagha ee BWANA.

⁶⁵Kuwiwasire njowe na kuwibonya wifo ngolo.

⁶⁶Kuwinughe na kuwiinja wurumwengunyi, ee BWANA.”