Read TAITA BIBLE – Biblia Ilagho Jiboie Kwa Wandu Wose EZEKIELI 11 Bible Online

EZEKIELI 11 - TAITA BIBLE – Biblia Ilagho Jiboie Kwa Wandu Wose bible

EZEKIELI 11

¹Roho wa Mlungu ukaniwusira na kunireda chia ya mbenge ya mashariki ya Hekalu ya BWANA. Nao ngawona aho mnyangonyi ghwa mbenge wandu mirongo iwi na wasanu, wikwanye na Jaazania mwana wa Azuri, na Pelatia mwana wa Benaia, nawo ni wabaa wa wandu.

²Nao Mlungu ukanizera, “Mwana wa mdamu, awa niwo wandu widungagha malagho gha wuwiwi, na kufunya njama ra wuwiwi andenyi ya ughu muzi.

³Waawuyaghamba, ‘Ngelo eagha nyumba ndeilighisire, ela muzi ughu ghooka sa nyungu, nesi sa nyama riboie riko nyungunyi.’

⁴Kwa wundu ugho ee mwana wa mdamu, kufunye wulodi aighu yawo.”

⁵Nao Roho wa BWANA ukakaia aighu kwapo, ukanizera, Ghora na wandu wa Israeli huwu, “Ini BWANA naghamba, Huwo niko mwawuyaririkanya, ela ini naichi seji mwawuyaghesha akilinyi konyu.

⁶Mwabwaghie wandu wengi andenyi ya ughu muzi, mkachura chia raro na gharia ra wandu.

⁷Kwa huwo ini Bwana MLUNGU naghamba kukaia muzi ughu loli ni nyungu, ela nyama si inyo kungi; mimbi ya wandu muwibwaghie mkaikumba aghadi yaro niyo nyama.

⁸Mwaobue lufu, ela nichareda wandu wilo nenyo kwa lufu, ini Bwana MLUNGU naghamba.

⁹Nani nichamfunya mfume ughu muzi na kumngira mikonunyi kwa waghenyi; nipate kureda kutanya aighu yenyu.

¹⁰Mchabwaghwa kwa lufu; nichamtanya a manonyi ya Israeli, nenyo mchamanya kukaia ini ne BWANA.

¹¹Ughu muzi ndeghuchaawuya nyungu yenyu, hata inyo ndemchaawuya nyama andenyi yaro, nichamtanya a manonyi ya Israeli;

¹²nenyo mchamanya kukaia ini ne BWANA. Angu inyo ndemnughie memu yapo, hata kukatisha sharia rapo anduangi; moonugha sharia mookufwananisha na iro mbari ra wandu wimmarie mbai mbai yenyu.”

¹³Nao iji nerekoghe ngifunya wulodi, Pelatia mwana wa Benaia ukafwa. Niko ngaghwa kiwushu-wushu, ngamlilia BWANA kwa lwaka lubaa ngighamba, “Ai e Bwana MLUNGU! Wele kuaghimeria masighariko gha wandu wa Israeli putu?”

¹⁴Niko BWANA ukaghora nani ukighamba,

¹⁵“Mwana wa mdamu, Awandu wikaiagha Jerusalemu waawuyazera wanyinyu awo wanyinyu weni wiko wubarishonyi, wandu wose putu wa Israeli wei waghendie kula na BWANA. Nao kedi awo niwo winekelo ijo isanga jiwuye jawo.

¹⁶Kwa huwo kuwighorie ini Bwana MLUNGU naghora hata ngera nawifunyire na kuwighenja kula kwa iro mbari ra wandu na hata ngera nawisaghisire masangenyi, ela sena nichakaia andwamweri nawo kwa ngelo vui andenyi ya agho masanga wereghendieghe.

¹⁷“Kwa huwo kuwighorie kukaia ini Bwana MLUNGU nichawikwanya wifume kwa awo wandu na kuwitumbanya chiaimweri kufuma kwa agho masanga andu weresaghisiroghe; nani nichawineka isanga ja Israeli.

¹⁸Na ngelo wichaawuya wichainja nambai vilambo vose vizamie na wuchafu ghose.

¹⁹Nani nichawibonya wikaie na nia imweri, na kungira roho mbishi andenyi kwawo. Nichainja ija ngolo ikurie sa igho ifume andenyi kwawo, nani nichawineka ngolo esikira,

²⁰eri wipate kunugha sharia rapo na kuiwadia memu yapo na kuikatisha; nawo wichakaia wandu wapo, nani nichakaia Mlungu wawo.

²¹Ela awo wandu wikufunyire kubonya maza rizamie, na wuchafu, nichawikaba kwa wundu ghwa mawiwi ghawo. Ini Bwana MLUNGU naghamba.”

²²Niko agho makerubi ghikakuchua mawawa ghawo, na agho magurudumu ghikakaia chuwarunyi rawo; wubaa ghwa Mlungu wa Israeli ghukakaia aighu kwawo.

²³Niko ugho wubaa ghwa BWANA ghukainjika Jerusalemu na kujoka nokoighu; ghukakaria aighu ya mghondi ghuko chia ya mashariki ya muzi.

²⁴Na Roho wa Mlungu ukaniwusira nokoighu andenyi ya mawono, ukaniwunja Babuloni kwa wandu wa wubarishonyi. Niko agho mawono ghikasia.

²⁵Ngawighoria awo wandu werekoghe wubarishonyi malagho ghose Mlungu oreniwonyereghe.