Read TAITA BIBLE – Biblia Ilagho Jiboie Kwa Wandu Wose EZEKIELI 12 Bible Online

EZEKIELI 12 - TAITA BIBLE – Biblia Ilagho Jiboie Kwa Wandu Wose bible

EZEKIELI 12

¹BWANA ukaghora nani ukighamba,

²“Mwana wa mdamu, oho kwadakaia aghadi ya wandu welegha. Wawadie meso, ela ndewiwonagha; wawadie madu, ela ndewisikiragha, kwa kukaia, awo ni wandu welegha.

³Kwa wundu ugho ee mwana wa mdamu, kufunge msigo ghwako nadime wandu wikiwona, ugho msigo ghoghenda wubarishonyi; kuchafuma andu kuko, kughende andu kuzima wikiwona; kewada wadima kutambukilwa hata ngera ni wandu welegha.

⁴Kuduke msigo ghwako ngelo ya nadime, kufume nagho seji kuaghenda cha wubarishonyi wikiwona; na oho kuchafuma ngelo ya luma lwa kenyi wikiwona seji iko suti wandu wibonye ingelo wakaghenda wubarishonyi.

⁵Na wikizighanira woruwo, kukote mruma a wurighenyi ghwa nyumba yako, nao kufumie aho.

⁶Kuchaduka msigo ghwako na iyonge wikizighanira, kufume nagho a kirenyi kwafinikira wushu ghwako, eri kusewone isanga; kwa kukaia neekubonya oho kukaie alama kwa wundu ghwa wandu wa Israeli.”

⁷Niko ngabonya sa iji koni nerelaghiriloghe. Ngafunya msigo ghwapo ghoghenda wubarishonyi, ngaghufunya shighadi nadime; na ngelo ya luma lwa kenyi, ngakota a wurighenyi na mikonu yapo cheni; ngafuma nakio ngiduka msigo ghwapo na iyonge wikiwona.

⁸Nao nakesho, BWANA ukaghora nani ukighamba,

⁹“Mwana wa mdamu, a waleghi wa wandu wa Israeli ndawaawuyakukotia, ‘Niki kwawuyabonya?’

¹⁰Idana kuwizere, ‘Bwana MLUNGU waghamba huwu, Ihi ni alama aighu ya m'baa wa Jerusalemu na wandu wa Israeli wikaiagha aho.’

¹¹Kuwizere, oho kwakaia alama kwa wundu ghwawo, kukaia, seji kwabonya niko wandu awa wichaabonyerwa. Wichadwalwa wunyika na kughenjwa wubarishonyi.

¹²Na uo m'baa uko aghadi kwawo, uchaduka msigo ghwake na iyonge a kirenyi na kughenda. Uchakota wurigha na kufuma shwa ukiidiria aho; uchaghufinikira wushu ghwake eri usewone ijo isanga.

¹³Nani nichakuchua nyavu yapo aighu yake, nao uchawadwa ni mdegho ghwapo; Nichamreda Babuloni isanga ja Wakalidayo; ela sena ndechaajiwona, nao uchafwa aho.

¹⁴Nichawisaghisa watesia wake andu kose, na majeshi ghake; nani nichawiwinga na lufu niwibwaghe.

¹⁵Na aho, ingelo nawisasara aghadi ya iro mbari ra wandu na masanga, wichamanya kukaia ini ne BWANA.

¹⁶Ela nichabonya watini wawo wifufunuke icho kifwa cha lufu na cha njala na cha saka izamie, eri ingelo wiko aghadi ya iro mbari ra wandu wirighendiagha, wipate kurumiria ugho wuchafu ghwawo wereghubonyereghe na kumanya kukaia Ini ne BWANA.”

¹⁷Sena BWANA ukaghora nani ukighamba,

¹⁸“Mwana wa mdamu, kukakaja vindo kusughusikeghe, na kukakanywa machi kusughusikeghe kwa wowa;

¹⁹nao kuwighorie waisanga malagho agha, Bwana MLUNGU waghamba huwu aighu ya wandu wikaiagha Jerusalemu, andenyi ya isanga ja Israeli, kukaia, wichaja vindo vawo kwa wowa, na kunywa machi wikikambwa ni chongo; kwa kukaia isanga jawo jichasokwa vilambo vose, kwa wundu ghwa lung'eto lwa wandu wikaiagha andenyi yaro.

²⁰Mizi ichulo ni wandu, ichawuya maghacho, na isanga jichasighwa iduu; nenyo mchamanya kukaia Ini ne BWANA.”

²¹BWANA ukaghora nani ukighamba,

²²“Mwana wa mdamu ni ikatanishoki iji muko najo isangenyi ja Israeli jeghamba, ‘Matuku ghaawuyaida na mawono ndeghikatiagha?’

²³Kwa huwo kuwizere, ‘Ini Bwana MLUNGU naghamba huwu, Iji ikatanisho nichajiinja jisetumilo sena sa ikatanisho andenyi ya Israeli.’ Ela kuwizere, Matuku ghekatisha mawono ghose ghameria kuvika.

²⁴Kwa kukaia ndekuchaakaia na mawono ghangi gha tee angu kulaghua kungi kosesea-sesea aghadi ya wandu wa Israeli.

²⁵Ela ini BWANA nichadeda ijo ilagho nikunde kujighora, najo jichakatishwa. Ndejichaamuka, ela jichakatishwa matuku ghenyu ee wandu welegha; nichadeda ilagho na kujikatisha. Ini Bwana MLUNGU naghamba.”

²⁶Sena BWANA ukaghora nani ukighamba,

²⁷“Mwana wa mdamu, wona seji wandu wa Israeli wighambagha, ‘Mawono gha uhu mlodi ni gha matuku mengi ghichagha, nao waawuyaloda maza ra ngelo riko kula.’

²⁸Kwa huwo kuwizere, Ini Bwana MLUNGU naghamba huwu, Ndekuwadie ilagho jingi japo jichaamuka sena, ela kula ilagho nawuyaghora jichakatishwa. Ini Bwana MLUNGU naghamba.”