Read TAITA BIBLE – Biblia Ilagho Jiboie Kwa Wandu Wose EZEKIELI 13 Bible Online

EZEKIELI 13 - TAITA BIBLE – Biblia Ilagho Jiboie Kwa Wandu Wose bible

EZEKIELI 13

¹BWANA ukaghora nani ukighamba,

²“Mwana wa mdamu, Funya wulodi aighu ya walodi wa Israeli kuwizere awo wilodagha malagho wikitumia akili rawo reni, wikighamba, ‘Sikirenyi ilagho ja BWANA!’

³Bwana MLUNGU waghamba huwu, Ni bugha kwa awo walodi wikelie, winughagha mawoni gha roho rawo reni wisewonie kindo chingi!

⁴Walodi wenyu weeka sa mizozo iko maghachonyi ee Israeli.

⁵Ndem'wuelindia andu kunonelo, hata ndemuaghie wurigha kwa wundu ghwa wandu wa Israeli, wipate kumanga wudenyi ngelo ya ituku ja BWANA.

⁶Wadedie malagho ghiseko gha loli, na kulaghua malagho gha tee wikighamba, ‘BWANA waghamba,’ sena usewidumie; na ii chia wikisuwiria BWANA uwikatishire wulodi ghwawo.

⁷Wele huwo ndemoowona mawono ghiseko gha loli, na kulaghua malagho gha tee iji mghoragha, ‘BWANA waghamba’ sena niseghorie ilagho jingi anguwada?”

⁸Kwa huwo Bwana MLUNGU waghamba huwu, “Kwa kukaia mwadeda malagho ghiseko gha loli, na kuwona malagho gha tee, olenyi nichalwa nenyo, waghamba Bwana MLUNGU.

⁹Nichawikaba walodi wiwonagha mawono gha tee, na kulaghua malagho gha tee; ndewichaakaia andenyi ya njama ra wandu wapo, hata ndewichaandikwa andenyi ya chuo cha wandu wa Israeli, angu kungia andenyi ya isanga ja Israeli; nenyo mchamanya kukaia Ini ne Bwana MLUNGU.

¹⁰Kwa kukaia wawilaghashire wandu wapo wikighamba, ‘Sere,’ sena sere iseko; na wandu wikaagha wurigha kisha-kisha, awo walodi wadaghushinga chokaa.

¹¹Kuwizere awo wawuyaghushinga ugho wurigha chokaa kukaia ghuchaghwa. Kuchakaia na vua mbaa, vua mbaa ya magho, na kiremba kibaa chichacha.

¹²Welee, ingelo ugho wurigha ghwaghwa wandu ndewichaakotia, ‘Uko kushinga chokaa konyu moreshingagha ugho wurigha kuao?’

¹³“Kwa huwo ini Bwana MLUNGU naghamba huwu, Nichareda kiremba kibaa kwa lubio lwapo, na vua mbaa kwa machu ghapo na vua ya magho ichaghunona ugho wurigha kwa lubio lwapo.

¹⁴Nani nichaghuchikanya ugho wurigha moreghushingieghe chokaa na kughusasara andoenyi, eri msingi ghwaro ghusigho mduu; na iji ghwameria kughwa, inyo mchatoteshwa aghadi yaro, nenyo mchamanya kukaia ini ne BWANA.

¹⁵Huwo niko nichaaghikatisha machu ghapo aighu ya ugho wurigha, na aighu ya awo wandu wereghushingagha chokaa kisha-kisha; nani nichamzera inyo: Ugho wurigha ndeghuko, na awo wereghushingagha chokaa wori ndewiko.

¹⁶Awo walodi wa Israeli werefunyagha wulodi aighu ya Jerusalemu, na kuwona mawono gha sere kwa wundu ghwaro, ingelo sere ingi iseko, ndewiko. Ini Bwana MLUNGU naghamba.

¹⁷“Na oho mwana wa mdamu, zighana waka wa mzenyu awo wilodagha malagho wikitumia akili rawo reni; kuwilodere

¹⁸kughambe, ini Bwana MLUNGU naghamba huwu, Ni bugha kwa awo waka widungagha mbingu refunga vikotonyi vose, na kubonya vitambaa vefunga vongo va wandu wa kula kipimo, wipate kukaia na nguma aighu ya marangi gha wandu! Welee, mwadima kukaia na nguma aighu ya marangi gha wandu wapo, msighe wamu wikaie moyo kwa wundu ghwa fwaida renyu?

¹⁹Mwamerie kunilusha aghadi ya wandu wapo kwa wundu ghopata shairi ndinieri na vipande va mkate, nenyo mkawibwagha wandu wiserekoghe wefwa, na kuwisigha awo wandu werekoghe wefwa wikaie moyo, kwa chia ya tee renyu kwa wandu wapo, awo wawuyasikira tee renyu.

²⁰“Kwa huwo ini Bwana MLUNGU naghamba huwu, Ola ini narilegha iro mbingu m'bonyeragha naro wandu nguma; nani nicharirashua rifume mikonunyi konyu, na kuwifungua awo wandu wikaie huru sa nyonyi.

²¹Na vitambaa venyu wori nichavirashua, nani nichawikira wandu wapo wisekaie madiwo ghenyu sena; nenyo mchamanya angu Ini ne BWANA.

²²Kwa kukaia mwam'bwaghie ngolo mhachi kwa tee renyu, ini nisem'bwaghie ngolo; na kumkumba ngolo mmbiwi useghaluke na kughusigha wuwiwi ghwake ukire irangi jake.

²³Inyo wori kwa wundu ugho, ndemchaakaia mkiwona mawono gha tee sena, hata kulaghua, ela nichawikira wandu wapo wifume konyu. Niko mchamanya kukaia ini ne BWANA.”