Read TAITA BIBLE – Biblia Ilagho Jiboie Kwa Wandu Wose EZEKIELI 14 Bible Online

EZEKIELI 14 - TAITA BIBLE – Biblia Ilagho Jiboie Kwa Wandu Wose bible

EZEKIELI 14

¹Nao wabaa wamu wa Israeli wikacha na kusea kidombo imbiri kwapo kwa njama.

²Na BWANA ukaghora nani ukighamba,

³“Mwana wa mdamu, awa wandu wangirie milimu yawo ngolonyi kwawo, nayo yaawuyawikuwisha wingie kaung'enyi. Welee wiaghesha nadima kuwisigha wiloleghe malagho kwapo?

⁴“Kwa huwo kuwizere huwu, Mundu uo ose wa wandu wa Israeli uwikagha mlimu ghwake ngolonyi kwake, na kukuwikia moni ikuwisho ja wuwiwi ghwake, ima sena uwuemghendia mlodi, nichamtumbulia nimoni kunughana na wungi ghwa milimu yake;

⁵nipate kurighalua ngolo ra wandu wa Israeli cha kwapo, awo wilaghashiro na kufuma kwapo kwa wundu ghwa iyo milimu yawo.

⁶“Kwa huwo, kuwizere wandu wa Israeli kukaia uo Bwana MLUNGU waghamba huwu, Heenyi mghaluke, mfume kwa milimu yenyu, na kuinjikia ugho wuchafu ghonyu ghose.

⁷Mundu uo ose wa wandu wa Israeli ukutanyagha nani, hata mghenyi ukaiagha aghadi ya wandu wa Israeli ukakutanya nani, na kuwika milimu ngolonyi kwake, na kukuwika moni ikuwisho ja wuwiwi ghwake, sena ii chia ucheghee kwa mlodi kulola njama kwapo, ini BWANA nichamtumbulia.

⁸Mundu uo, nichamzighana kiwiwi na kum'bonya uwuye alama ezighanwa sa kilambo chisefwane; nani nichamuinja aghadi ya wandu wapo, nenyo mchamanya kukaia ini ne BWANA.

⁹“Mlodi ukakalikia, nao ufunye wulodi ghwa tee, mmanye ni ini namkalia; nani nichamkaba na kumuinja aghadi ya wandu wapo Israeli.

¹⁰Na ikabo jawo jichakaia aighu yawo weni. Ikabo ja mlodi na ikabo ja uo mundu oremchieghe kulola njama, jichakaia karakara;

¹¹eri wandu wa Israeli wiselaghasho jingi kufuma kwapo; sena wisekulushe weni kwa makosa ghawo, ela wipate kukaia wandu wapo, na ini nikaie Mlungu wawo. Ini Bwana MLUNGU naghamba.”

¹²Nao BWANA ukaghora nani ukighamba,

¹³“Mwana wa mdamu, isanga jikanibonyera kaung'a na kulemwa ni kukaia mloli kwapo, nao nighoruo mkonu ghwapo kuwiima vindo, na kureda njala aighu ya isanga, na kubwagha wandu na nyamandu.

¹⁴Hata ngera awa wandu wadadu wadakaia aeni, Nuhu, Danieli, na Ayubu, wadadima tu kukira marangi ghawo kwa hachi yawo. Ini Bwana MLUNGU naghamba.

¹⁵Ngalekeria nyamandu ra isakenyi rimare isangenyi, na kujinona hata jikaie iduu na mndungi usedime kuidiria aho kwa wundu ghwa wungi ghwa nyamandu,

¹⁶hata ngera awo wandu wadadu wadakaia aeni, sa iji ini Bwana MLUNGU nikaiagha moyo, naghamba, ndawadimagha kuwikira wana wawo wa womi hata wa waka. Ni awo weni tu widimagha kukia, ela isanga jichasighwa iduu.

¹⁷Na hata iji nareda wuda isangenyi, na kufunya momu waisanga wibwagho, hata wadamu na nyamandu rimerelo,

¹⁸hata ngera awo wandu wadadu wadakaia aeni, sa iji ini Bwana MLUNGU nikaiagha moyo, naghamba, ndawadimagha kuwikira wana wawo wa womi hata wa waka; ela awo weni tu niwo wikiagha.

¹⁹Ngaduma saka izamie isangenyi, na kubwagha wadamu na nyamandu kwa machu ghapo,

²⁰hata ngera Nuhu, na Danieli, na Ayubu wadakaia aho, sa iji ini Bwana MLUNGU nikaiagha moyo, naghamba, ndawadimagha kuwikira wana wawo wa womi hata wa waka; wadadima tu kukira marangi ghawo gheni kwa iyo hachi yawo.”

²¹Bwana MLUNGU waghamba huwu, “Welee, maza rizama saki ngaghudumia muzi ghwa Jerusalemu makabo ghapo ana; wuda ghwa lufu, njala, nyamandu rizamie, na saka izamie, eri nipate kubwagha mdamu na nyamandu!

²²Ela sena wikasigharika wamu wafufunuka na kudwa wana wawo wa womi na wa waka, wikakuchea, nao kuwone tabia rawo na mabonyo ghawo ghizamie, ngolo ichahoa, angu korewawiloghe ni ugho wuwiwi nereghuredieghe Jerusalemu.

²³Ngolo yako ichahoa iji kwawona tabia rawo na mabonyo ghawo ghizamie, na oho kuchamanya kukaia malagho nighibonyere si gha duu anduangi. Ini Bwana MLUNGU naghamba.”