Read TAITA BIBLE – Biblia Ilagho Jiboie Kwa Wandu Wose EZEKIELI 15 Bible Online

EZEKIELI 15 - TAITA BIBLE – Biblia Ilagho Jiboie Kwa Wandu Wose bible

EZEKIELI 15

¹Niko BWANA ukaghora nani ukighamba,

²“Mwana wa mdamu, mudi ghwa mzabibu ghwachumbie mudi mzima ghwa isakenyi naki?

³Welee, longe lwa mzabibu lwadima kubonywa kilambo chingi? Wandu wadima kulusongua wilubonye kikosi chewanika vilambo?

⁴Longe lwaro lwadima tu kutumilwa kwa kukora modo. Ela lukakola lwahia chia rose, na kutasanyika, welee, lwadima kufwana sena kwa kilambo chingi?

⁵Idana zighana, ikakaia luserefwaneghe kwa kilambo chingi ingelo luserekoreloghe, welee, lusowa fwaida saki ingelo lwakorwa lukatasanyika? Lwadima kufwana kwa kilambo chingi sena?

⁶“Kwa huwo ini Bwana MLUNGU naghamba huwu, Sa iji koni nifunyire lumbashu lwa mzabibu aghadi ya midi ya isakenyi lukoro niko koni nichaawifunya wandu wose wikaiagha Jerusalemu.

⁷Nichawizighana kiwiwi, na hata ngera wafufunuka wisehirie, ela sena modo ghuchawimeria, na inyo mchamanya kukaia ini ne BWANA ingelo nawizighana kiwiwi.

⁸Nichajibonya isanga jiwuye iduu, kwa kukaia ndewikaie waloli kwapo. Ini Bwana MLUNGU naghamba.”