Read TAITA BIBLE – Biblia Ilagho Jiboie Kwa Wandu Wose EZEKIELI 16 Bible Online

EZEKIELI 16 - TAITA BIBLE – Biblia Ilagho Jiboie Kwa Wandu Wose bible

EZEKIELI 16

²“Mwana wa mdamu, kughumanyishe muzi ghwa Jerusalemu wuchafu ghwake,

³kughuzere, Ini Bwana MLUNGU naghamba huwu aighu yake, Oho koovailwa isanga ja Kanaani. Ndeyo ni Muamori, na mayo ni Mhiti.

⁴Iji korevaloghe, ndekoredumbuloghe lukuvudi lwako, hata ndekoreoghosheroghe na machi kuele; mndungi nderekuzirieghe na chumbi, angu kukurighiria nguwo ingi.

⁵Mndungi nderekuwonieghe wughoma ghokubonyera ghangi gha agho ghose, ela kodedeghwa a mlambenyi kwa kukaia ndekorekundikieghe ijo ituku korevaloghe.

⁶“Hata iji nereidieghe kaavui na oho, na kukuwona seji kwawuyaghala-ghala a baghenyi kwako, ngakuzera kuko ahoeni baghenyi kwako, ‘Kaia moyo,

⁷kuzoghuo sa muwalwa ghwa mbuwenyi.’ Kukazoghua na kuwuya mwai mlacha ughokie; kukawoka kutiva nyodo, na iridia jako kuzoghua, ela kodeeka duu putu.

⁸“Iji nereidieghe kaavui na oho sena, ngakuzighana na kuwona angu kwameria kuzoghua na kuvika ngelo ekundwa; ngaghorua kidambi cha nguwo yapo, ngakufinikira wuduu ghwako; ee, ngakubonyera ilaghano, na oho kukawuya wapo. Ini Bwana MLUNGU naghamba.

⁹“Niko ngakuoghosha na machi na kuinja bagha rako; ngakushinga mavuda.

¹⁰Ngakurusha nguwo itolelo, na kukungira vadu va mrongo; nerekurushireghe nguwo ra kitani ndicha, na marwao gha zoghori mbaa gha hariri.

¹¹Ngakupamba kwa lulu; ngakurusha bangili mkonunyi kwako, na mkufu singonyi kwako.

¹²Ngakungira pete ya mbua, na vipini madunyi kwako, na kirumbu chighokie chongonyi kwako.

¹³Kwa huwo kukapambwa kwa feza na dhahabu, na marwao ghako ghedeeka gha kitani ndicha, na hariri na nguwo ritolelo. Korejieghe mkate ghwa mufu ghudendere na wuki na mavuda; kukazoghua kughokie loli-loli, kukawuya malkia.

¹⁴Sare ya kughoka kwako ikaera aghadi ya iro mbari ra wandu, kwa kukaia uko kughoka kwako korekoghe kukatie, kunughana na seji nerekuboisireghe. Ini Bwana MLUNGU naghamba.

¹⁵“Ela koretumieghe uko kughoka kwako na sare yako kwa kubonya wumalaya, kukakufunya kwa kula mundu oreidieghe kaavui na oho.

¹⁶Korewusireghe marwao ghamu ghako kukapamba nagho andu kotasira, na kubonya wumalaya aho. Maza sa iro jingi nderebonyeka, hata nderichaabonyeka sena anduangi.

¹⁷Sena korewadieghe ivo vilambo vako viboie va lulu ya dhahabu yapo na feza yapo nerekunekieghe, kukabonya navo milimu ya fwana ra womi, na kubonya naro wumalaya.

¹⁸Kukawada marwao ghako ghitolelo na kurifinikira; kukawika mavuda na marumba ghapo imbiri yaro.

¹⁹Hata na mkate nerekunekieghe ghuboisiro kwa mufu ghudendere, na mavuda, na wuki, eri kupate kuja, koreghuwikieghe imbiri ya iyo milimu ipate kunukilwa nicha. Ini Bwana MLUNGU naghamba.

²⁰“Sena kukawada wana wako wa womi na wa waka korenivaieghe, kukawifunya kizongona kwa iyo milimu. Welee, ugho wumalaya ghwako kunibonyere ndeghukate,

²¹hata kunibwaghie wana wapo na kuwifunyira milimu wikaie kizongona chekora?

²²Na andenyi ya ugho wuchafu ghwako ghose, na wumalaya ghwako, jingi ndekukumbukie matuku gha wanake ghwako, ngelo korekoghe duu putu kukighala-ghala a baghenyi kwako.

²³“Ni bugha, ni bugha kwako, kukatishire ugho wuwiwi ghwako ghose! Ini Bwana MLUNGU naghamba.

²⁴Kwakuaghie kumoni vumba vetasira mghondinyi, na kukuzaisira kubonya wumalaya mbai na mbai ya kula chia.

²⁵Kwaaghie andu kotasira kutuonyi kwa kula chia, kukanona kughoka kwako kwa kukufunya kumoni kwa kula mundu uidagha; na huwo kukaghuchuria wumalaya ghwako.

²⁶Sena kwabonyere wumalaya na majirani ghako Wamisri, wichulo ni bea; kukachuria wumalaya ghwako eri kupate kunivavira.

²⁷“Kwa huwo idana zighana, naghorua mkonu ghwapo nipate kukukaba, na kupunguza iwaghio ja ifungu jako, nipate kukufunya kwa Wafilisti, awo wimerie kuzamilwa ni oho kwa wundu ghwa wumalaya ghwako ghwa waya.

²⁸Na wokoni kwabonyere wumalaya na Waashuru, angu kusekatwagha; kwabonyere wumalaya nawo sena kukakaia kusekato.

²⁹Kukachuria kubonya wumalaya ghwako na Wababuloni, iyo mbari ibonyagha biashara; hata huwo saki, ndekorekatoghe.

³⁰“Ni beaki ihi kuko nayo ngolonyi kwako. Ini Bwana MLUNGU naghamba, ngiwona seji kubonyere maza iri rose ra wumalaya kuseko na waya!

³¹Kwaaghie nyumba rako retasira kutuonyi kwa kula chia, na kubonya wumalaya kwa kula chia mbaa; sena ndekorekoghe sa ilaya, kwa kukaia ndekorelombieghe malipo.

³²Muka mlaki oho, kuselagha na waghenyi wulalo ghwa mumi wako!

³³Womi wadanosa malaya, ela oho korewinekieghe wakundwa wako manosi, kukatuwa womi wifumie kula eri wipate kubonya wumalaya na oho.

³⁴Ndekorefwananeghe na waka wazima kwa wumalaya ghwako; ndekuwadie mndungi ukunughie ukikunda kubonya wumalaya na oho, korefunyireghe malipo, ela oho ndekorelipiloghe malipo ghangi; kwa wundu ugho, oho korekoghe wuzima.

³⁵“Kwa huwo idana ee Jerusalemu kuko sa ilaya, sikira ilagho japo.

³⁶Ini Bwana MLUNGU naghamba, kwawonyere bea rako worinyi, na kufunukuya wandu wuduu ghwako kwa wumalaya ghwako kubonyere na wakundwa wako. Kukatasa milimu na kubwagha wana wako kukiwifunya kizongona kwa milimu.

³⁷Ola nichawikwanya chiaimweri awo wakundwa wako wose, awo korekoghe kukiboilwanya nawo, awo wose korewikundieghe, na awo kuserewikundieghe; nichawikwanya aighu yako, kufuma kula andu, nani nichawifunukuya wuduu ghwako ghose wipate kughuwona.

³⁸Nichakutanya kara kara na awo waka wilakagha wiko wilowolo, na kubwagha; kwa wundu ghowadwa ni iriso na kujokwa ni machu ghibirie, nichakutanya kubwagho.

³⁹Nichakungira mikonunyi kwa awo wakundwa wako, nawo wichachikanya nyumba rako retasira, na andu kwako kotasira mighondinyi; wichakurua nguwo rako, na kuwusa lulu rako riboie; nawo wichakusigha duu putu.

⁴⁰“Wichakwanya izungu ja wandu wikulase na magho, na kukudumbua viluponge na chufu.

⁴¹Wichakora nyumba rako na kukutanya imbiri ya waka wengi; nani nichakusighisha ugho wumalaya ghwako, hata ndekuchaafunya malipo ghangi kwa wakundwa wako sena.

⁴²Huwo nichakatisha lubio lwapo aighu yako, na iriso japo jichasia; machu ghapo ghichahoa, hata ndeghichaajoka sena anduangi.

⁴³Kwa kukaia kwaliwie seji nerekubonyereghe matuku gha wanake ghwako, kukanivavira kwa iro maza rose kubonyere, nichalipia kisasi aighu yako; ini Bwana MLUNGU naghamba. Welee, ndekubonyere wulaki aighu ya wuchafu ghwako ghose kubonyere?

⁴⁴“Ola wandu wose widedagha kwa makatanisho wichaghora huwu aighu yako Jerusalemu, ‘Mwai ooka sa mae.’

⁴⁵Oho ko mwai wa muka, uo orezamiloghe ni mumi wake na wana wake; na oho ko mruna wa wanyinyu wa waka werezamiloghe ni womi wawo na wana wawo. Mayo odeeka Mhiti, na ndeyo ni Muamori.

⁴⁶Mwanyinyu wa waka m'baa ni Samaria, uo orekoghe cha kaskazinyi yako na mizi yake; na mwanyinyu wa waka mtini, uo orekoghe cha kusinyi chiaimweri na mizi yake ni Sodoma.

⁴⁷Sena ndekorekatoghe ni uko kubonya sa awo weni, na kusunga maza ra wuchafu ghwawo; ela kapindi katini tu korenonieghe tabia rako rose kuchumba awo weni.

⁴⁸“Sa iji koni ini Bwana MLUNGU nikaiagha moyo, mwanyinyu wa waka Sodoma na mizi yake ndewibonyere seji oho na mizi yako kubonyere.

⁴⁹Ola ughu nigho wuwiwi ghorebonyeroghe ni mwanyinyu wa waka Sodoma chiaimweri na mizi yake: werekukasireghe wikakaia na lwafuo lwa vindo wikija na kunywa na kuhoresha; hata ndeweretalieghe wakiwa, na awo weresowieghe.

⁵⁰Werekukasireghe na kubonya maza ra wuchafu imbiri kwapo; kwa huwo iji nerewonieghe huwo, ngawiinja.

⁵¹Samaria ndeibonyere nusu ya kaung'a rako. Oho kwabonyere wuchafu mungi kumchumba, sena kukawibonya wanyinyu wa waka wiwonekeghe kukaia wahachi wikafwananishwa na oho, kwa ugho wuchafu ghwako mungi kughubonyere.

⁵²Idana kurumaghie masholio ghako kumoni; kwa kukaia iro kaung'a nyingi kubonyere, rashekerie wanyinyu wiwoneke kukaia wandu wa hachi angu wisebonyere sa oho; kwa huwo kufo waya, kurumaghie masholio ghako; angu kuwibonyere wanyinyu wiwoneke kukaia wahachi.

⁵³“Nichaiwunjira Sodoma na mizi yaro mecha ghawo, na Samaria na mizi yaro wori; hata oho muzi ghwa Jerusalemu wori nichakuwunjira mecha ghako;

⁵⁴kupate kurumaghia agho masholio ghako, sena kufo waya kwa wundu ghwa agho kubonyere gha kuwishekeria wikuwone weni kukaia baa.

⁵⁵Mwanyinyu wa waka Sodoma na wana wake wichawuya sa iji koni werekoghe kala; wokoni Samaria na wana wake wichawuya sa iji koni werekoghe kala; na oho chiaimweri na wana wako mchawuya sa iji koni morekoghe kala.

⁵⁶Welee, ndekodeeka kukimseka mwanyinyu Sodoma ingelo korekukasagha

⁵⁷imbiri wuwiwi ghwako ghusefunukukie? Ola idana mwaafwanana; kwaawuyasekwa ni wandu wa Edomu, na wambao wose kaavui na oho, na wandu wa Filistia; awo wose wikumarie chia rose wawuyakumenya.

⁵⁸Kwaawuyaduka waya ghwa wulaki ghwako na mabonyo ghako ghizamie.” Ini BWANA naghamba.

⁵⁹Bwana MLUNGU waghamba huwu, “Nichakubonyera maza sa iji koni korebonyereghe, angu kwajimenyere ighemi na kujichikanya ilaghano;

⁶⁰elaima nichajikumbuka ilaghano japo nerejibonyereghe na oho ngelo ya wanake ghwako; nani nichajimangisha jiwuye ilaghano ja kala na kala.

⁶¹Niko aho kuchaakumbuka mighendo yako na kufwa waya, ingelo nichaawiwada wanyinyu wabaa na watini, na kuwibonya wiwuye wana wako, ela si kunughana na ilaghano nerejibonyereghe na oho anduangi.

⁶²Nichamangisha ilaghano japo na oho, na oho kuchamanya kukaia ini ne BWANA.

⁶³Kuchakumbuka na kufwa waya, hata na jingi kusewuyeghora ilagho jingi kukiwona seji kwafushwa waya ingelo nichaakufuya wughoma makosa ghako ghose koreghibonyereghe. Ini Bwana MLUNGU naghamba.”