Read TAITA BIBLE – Biblia Ilagho Jiboie Kwa Wandu Wose EZEKIELI 20 Bible Online

EZEKIELI 20 - TAITA BIBLE – Biblia Ilagho Jiboie Kwa Wandu Wose bible

EZEKIELI 20

¹Ituku ja ikumi, mori ghwa kasanu, mwaka ghwa mfungade ghwa kubarishwa kodu; wabaa wamu wa Israeli wikanichea kulola njama kwa BWANA; wikasea kidombo imbiri kwapo.

²Nao BWANA ukaghora nani ukighamba,

³“Mwana wa mdamu, ghora na wabaa wa Israeli kuwizere, Bwana MLUNGU waghamba huwu: Welee, mwaacha kulola njama kwapo? Ola sa iji nikaiagha moyo, sichaamneka wulalo ghokotia njama kwapo. Ini Bwana MLUNGU naghamba.

⁴“Kuchawitanya wandu awa ee mwana wa mdamu? Basi bonya huwo, kuwibonye witambukilo ni wuchafu ghwa weke ndee.

⁵Kuwizere seji Ini Bwana MLUNGU naghamba: Ituku neremsaghueghe Israeli, nerebonyereghe ighemi na kivalwa cha wana wa Jakobo, ngikumanyisha ini moni kwawo andenyi ya isanga ja Misri ngighamba, Ini ne BWANA Mlungu onyu.

⁶Ituku ijo nerewibonyereghe ighemi kukaia nichawifunya isanga ja Misri, niwighenje isanga nerewilolieghe nimoni; isanga jinorie nandighi, sena isanga jighokie kuchumba masanga ghose.

⁷Ngawizera, Kula umu onyu ndede milimu yake, hata msakekulusha mmbeni na iyo milimu ya Misri; ini ne Bwana MLUNGU onyu.

⁸Ela wikanilegha hata ndewerenisikireghe anduangi, mndungi wawo nderedeeghe milimu yake, hata kuisigha milimu ya Misri anduangi. Neregheshereghe ngera kumangu nawikaba kwa machu ghapo aghadi ya isanga ja Misri.

⁹Ela kwa wundu ghwa irina japo serebonyereghe huwo; eri jisechesholelwa na kulushwa imbiri ya mbari ra wandu iro werekaieghe aghadi yawo; awo ini nerekumanyishireghe nimoni kwawo kwa kuwizera Waisraeli nichawifunya isanga ja Misri.

¹⁰“Kwa huwo ngawifunya isanga ja Misri na kuwighenja kireti.

¹¹Ngawineka memu yapo na kuwiwonyera sharia rapo, iro mundu ukariwadia ukaiagha moyo.

¹²Sena ngawineka Sabato rapo wiriwadieghe; ikaie alama aghadi yapo na awo, eri wipate kumanya kukaia ni ini BWANA niwieleshagha.

¹³Ela hata ahoeni kireti, wandu wa Israeli werenileghieghe; wikalemwa ni kuiwadia memu yapo, wikarilegha sharia rapo wori, iro mundu ukariwadia ukaiagha moyo, na Sabato rapo wikarilusha nandighi. Niko ngawona niwikabe ahoeni kireti, na kuwimeria putu.

¹⁴Ela kwa wundu ghwa irina japo, serebonyereghe huwo, eri jisechesholelwa na kulushwa mesonyi kwa iro mbari ra wandu werekaieghe aghadi kwawo; iro ini nerekumanyishireghe nimoni kwa kuwifunya wandu wa Israeli isanga ja Misri.

¹⁵Aighu ya agho, nerewighemieghe ahoeni kireti kukaia, sichaawingira jija isanga nerewinekieghe, isanga jinorie nandighi, jiboie kuchumba masanga ghose,

¹⁶angu wileghie memu yapo, na kuleghaenda kwa sharia rapo; wikarilusha Sabato rapo, kwa kukaia werenughieghe milimu yawo ngolonyi kwawo.

¹⁷“Elaima nerewiwonieghe wughoma, hata serewitoteshereghe angu kuwimeria kireti anduangi.

¹⁸Nani ngawizera wana wawo aho kireti: Msenughe sharia ra weke ndeyo, hata msenughe mafundisho ghawo, sena msakekulusha na milimu yawo.

¹⁹Ini BWANA ne Mlungu onyu; mghende kwa kunugha memu yapo, na kuriwadia sharia rapo nicha.

²⁰Mueleshe Sabato rapo ripate kukaia alama aghadi ya ini na inyo; mpate kumanya angu ini ne BWANA Mlungu onyu.

²¹“Ela hata wana wokoni wikanilegha; ndewereghendieghe kwa kunugha memu yapo, hata ndeweretalieghe kuwadia sharia rapo, iro mundu ukariwadia uchakaia moyo; sena werenonieghe Sabato rapo. Neregheshereghe ngera kumangu nawikaba kwa machu ghapo aho kireti na kuwimeria putu.

²²Ela nereghughirieghe mkonu ghwapo ghusebonye wuwiwi ghungi kwa wundu ghwa irina japo, eri jisechelushwa aghadi ya iro mbari ra wandu, iro ini nerekumanyishireghe nimoni kwa kuwifunya Israeli isanga ja Misri.

²³Aighu ya agho, nerewighemieghe ahoeni kireti kukaia, nichawisaghisa aghadi ya iro mbari ra wandu na kuwisasara masangenyi;

²⁴angu wiserewadieghe mafundisho ghapo, hata kurinugha sharia rapo; wikarilusha Sabato rapo, na kuitasa milimu ya weke ndee.

²⁵“Niko ngawineka sharia riseboie, mafundisho ghisewinekagha irangi jingi;

²⁶ngawisigha wikulushe weni kwa kutumia manosi ghawo gheni wighifunyire, ngawibonya wifunye wavalwa wawo wa imbiri kizongona chekora, eri niwioboshe. Nerebonyereghe huwo eri wimanye kukaia ini ne BWANA.

²⁷“Idana ee mwana wa mdamu, dedanya na wandu wa Israeli kuwizere, Bwana MLUNGU waghamba huwu: Hata aha wori weke ndeyo werenisholieghe kwa kunibonyera mikalo.

²⁸Angu iji nerewiredieghe isanga nerewilaghirieghe kuwineka, werezoeghe kufunya vizongona vawo aighu ya kula mghondi wereghuwonieghe, na aisi ya kula mudi m'baa ghukambie, wikawusira machu ghapo wikifukira marumba aho, na kufunya vizongona venywa.

²⁹(Nani ngawikotia, Welee, uko kujoka mghondinyi kutambua kwaro niki? Nao huwo irina jake jadawangwa Bama[5] hata linu.)

³⁰Kwa huwo kuwizere wandu wa Israeli, Ini Bwana MLUNGU naghamba huwu, Welee, muakulusha mmbeni sa weke ndeyo, na kukulaghasha kwa kunugha milimu yawo?

³¹Iji mwaifunyira milimu manosi, na kuwifunya wana wenyu wa womi wikaie vizongona vekora, mwaawuyakulusha mmbeni hata linu. Welee, nadima kurumiria kuchalombwa ni inyo, ee wandu wa Israeli? Sa iji nikaiagha moyo, ini Bwana MLUNGU naghamba, sichaarumiria kulombwa ni inyo.

³²Mwaawuyaghamba wei mwakunde mfwanane na wandu wa mbari zima mtaseghee midi na magho. Agho maghesho muko nagho ndeghichaakaia jingi.

³³“Sa iji ini Bwana MLUNGU nikaiagha moyo, naghamba, kwa loli nicham'bonyera nguma kwa kudima kwapo, na kwa ndighi, na kwa machu ghapo.

³⁴Nichamreda kufuma kwa wandu, na kufuma masanga ghose moresaghisikieghe, kwa kudima kwapo, na kwa ndighi, na kwa machu ghapo;

³⁵nani nichamreda Kireti cha mbari ra wandu, na kumtanya worinyi.

³⁶Sa iji koni nerewitanyireghe weke ndeyo kireti cha isanga ja Misri, ni huwo koni nichaamtanya inyo. Ini Bwana MLUNGU naghamba.

³⁷“Nichamtala mkiida aisi ya zobo yapo, na kum'bonya munisikire; mpate kughenda kwa ilaghano japo.

³⁸Nichawiinja awo wandu wisesikiragha na awo winibonyeragha kaung'a, wifume aghadi konyu; nichawifunya isangenyi iji werejikaieghe kiwughenyi, ela ndewichaangia andenyi ya isanga ja Israeli. Aho niko mchaamanya kukaia ini ne BWANA.

³⁹“Na inyo ee wandu wa Israeli, ini Bwana MLUNGU naghamba huwu: Ngera msekunde kunisikira, kula umu onyu ndeghende kudumikia milimu yake kufuma idana, hata konyuma wori; ela irina japo ijo ndemchaajilusha sena kwa kufunyira milimu yenyu manosi.

⁴⁰Inyo wandu wose wa Israeli, muchanitasa ini aighu ya mghondi ghwa wueli, ugho mghondi ghwapo mlacha ghwa Israeli, ini Bwana MLUNGU naghamba; nenyo mmbose mchanidumikia isangenyi, na aho nichamrumiria na kukaia tayari kuwusa manosi na mafunyo ghenyu gha wueli msaghue kunineka.

⁴¹Nichamrumiria sa marumba ghinukie nicha, ingelo nichaamfunya mfume kwa wandu, na kumtumbanya kufuma agho masanga moresaghisikieghe; nani nichawonyera wueli ghwapo aghadi ya iro mbari ra wandu.

⁴²Nenyo mchamanya kukaia ini ne BWANA, ingelo nichaamreda andenyi ya isanga ja Israeli; ijo isanga nerewighemieghe weke ndeyo kukaia nichawineka.

⁴³Na aho mchakumbuka iro chia renyu mbiwi na mabonyo ghenyu morekunonieghe nagho; nenyo mchakuzamia mmbeni kwa wundu ghwa ugho wuwiwi ghose moreghubonyereghe.

⁴⁴Nenyo mchamanya kukaia ini ne BWANA, ingelo nichaakaia ngim'bonyera agho kwa wundu gholindia ishima ja irina japo, kuseko na kumtalia iro chia renyu mbiwi, na mabonyo ghenyu ghizamie ee wandu wa Israeli. Ini Bwana MLUNGU naghamba.”

⁴⁵BWANA ukaghora nani ukighamba,

⁴⁶“Mwana wa mdamu, zighana cha kusinyi, kuchile aighu ya wandu wa kusinyi na kufunya wulodi aighu ya isanga ja msidunyi jiko Negebu.

⁴⁷Ghuzere msidu ghwa Negebu huwu: Sikira ilagho ja BWANA, Bwana MLUNGU waghamba huwu: Ola nichakora modo kwako, nagho ghuchakora midi mmbishi na midi ya kala iko kwako. Lumu lwaro ndeluchaarima, na mawushu gha wandu wose kufuma kusinyi hata kaskazinyi ghichasikira luvia lwaro.

⁴⁸Na wandu wose wichawona kukaia ni Ini BWANA naghukora, nagho ndeghuchaarima anduangi.”

⁴⁹Niko ngaghamba, “Ai e Bwana MLUNGU! Wadaghora wei nadadeda kwa kukumba ndawi!”