Read TAITA BIBLE – Biblia Ilagho Jiboie Kwa Wandu Wose EZEKIELI 21 Bible Online

EZEKIELI 21 - TAITA BIBLE – Biblia Ilagho Jiboie Kwa Wandu Wose bible

EZEKIELI 21

¹BWANA ukaghora nani ukighamba,

²“Mwana wa mdamu, zighana cha Jerusalemu kuchile aighu ya Andu kwa Wueli na kufunya wulodi aighu ya isanga ja Israeli

³kujizere kukaia ini BWANA nichalwa najo; nichakua lufu lwapo kiwonyi kwaro, nani nicham'bwagha mhachi na mmbiwi.

⁴Kwa kukaia nichabwagha mhachi na mmbiwi kufuma kwako, nichakua lufu lwapo kiwonyi kwaro, na kulwa na wandu.

⁵Na wandu wose wichamanya kukaia ini BWANA nalukua lufu lwapo kufuma kiwonyi kwaro, nalo ndeluchaawunjwa sena.

⁶“Kwa huwo soria ngolo ee mwana wa mdamu; kusorie ngolo kwa kuwawa imbiri kwawo.

⁷Nawo wikakukotia, ‘Kwaki kusoriagha ngolo huwo?’ Kuwizere, ni kwa wundu ghwa maza rawuyacha. Rikacha, kula ngolo ichachulwa ni kiture, na mikonu ichateweleka; roho richadumbuka, na vitemberu vichaselwa ni mbogha. Ola iro maza riacha, naro richakatishwa.”

⁸BWANA ukaghora nani ukighamba,

⁹“Mwana wa mdamu, funya wulodi kughambe, BWANA waghamba huwu: Lufu, lufu lwakalishwa lukazughulwa,

¹⁰lufu lwakalishwa lupate kubwagha, lwazughulwa lupate kung'ala-ng'ala sa luhehia! Kwani dadima kuboilwa? Juda mwanwapo kwamenyere kula ikabo na ifundisho jekukania.

¹¹Kwa huwo, lufu lwafunywa lupate kuzughulwa na kutumilwa; lwakalishwa lukazughulwa lupate kunekwa mundu obwagha.

¹²Kema kudiko ni mbori ee mwana wa mdamu; kwa kukaia ulo lufu ni aighu ya wandu wapo, na aighu ya wabaa wa Israeli; wamerie kufunywa chiaimweri na wandu wapo wibwagho kwa lufu. Kwa huwo kukukabe-kabe bara.

¹³Kwa kukaia si malagho ghangi ghetima; kwani ulo lufu lwabonyagha wada e kuleghie kukanilwa? Ini Bwana MLUNGU naghamba.

¹⁴“Kwa huwo kufunye wulodi ee mwana wa mdamu; kaba chui rako lufu lupate kudema mando awi, ee, hata mando adadu. Lufu ulo ni aighu ya awo ifwane wibwagho, ulo lufu lwawimara chia rose, ni lobwagha wandu wengi.

¹⁵Luchaawibonya wandu wengi kufwa ngolo, na kughwa mbengenyi rawo rose. Naredie lufu luakaa-aka, looka sa luhehia, luzughulo lobwagha wandu.

¹⁶Ndeludeme chia ya mkonu ghwa kiwomi na mkonu ghwa kiwaka; ndeludeme andu uko kose lwaghaluswa.

¹⁷Hata ini moni wori nichakaba chui rapo na kuhoresha lubio lwapo; ini BWANA najighora ilagho ijo.”

¹⁸BWANA ukaghora nani sena ukighamba,

¹⁹“Mwana wa mdamu, wonyera chia iwi, iro mzuri wa Babuloni ucheriagha naro na lufu lwake. Chia rose iwi richazoia isanga jimweri; kubonye vibau vewonyera andu rizoiagha rikighenda cha mzinyi.

²⁰Kuwonyere chia eghenda Raba kwa Waamoni, na eghenda Juda, na ngomenyi ya Jerusalemu; mzuri upate kuida na lufu lwake.

²¹Mzuri wa Babuloni waawuyakaia kimusi mudonyi ghwa chia ra matano, eri ulaghuo. Waawuyasughusa-sughusa mawanu,[6] na kulola njama kwa milimu yake waterafi, na kuzighana idima ja nyamandu yabwaghwa kizongona.

²²Kura ya Jerusalemu eko kwa mkonu ghwake ghwa kiwomi, upate kuwika vilambo vevuchua, na kufunya momu ghobwagha na kukaba ndereri ya wuda, na kuwika vilambo vevuchua mbenge, kuagha andu kojokia na wurigha.

²³Ela wandu wa Jerusalemu wichakaia wikiwona kukaia ni wulaghui ghwa tee; kunughana na mapatano wibonyere. Ela ugho wulaghui ni ghowikumbusa wuwiwi ghwawo, na seji wichaawadwa na kudwalwa wunyika.

²⁴“Kwa huwo ini Bwana MLUNGU naghamba huwu, kwa kukaia kwabonya wuwiwi ghwako ghukumbuko, na angu makosa ghako ghose ghafunukulwa, hata ijo jose kujibonyagha jawoneka, ni huwo koni na oho kuchadwalwa wunyika.

²⁵Na oho ee m'bonyi nguma wa Israeli, mmbiwi kuseelie, ituku jako, ijo ituku ja kutanywa kwako kwa kutua jamerie kuvika.

²⁶Ini Bwana MLUNGU naghamba huwu, Inja kiremba kufunye kirumbu, kwa kukaia maza nderichaakaia seji rerekoghe; kumjose uo orekoghe ndonyi, na kumsera uo orekoghe ighu.

²⁷Kunona, kunona, nichaghunona ugho muzi hata ghusesigharike andu komanyisha wei ghorekoghe, hata wameria kucha mundu waro moni, nani nichamneka ugho muzi.

²⁸“Na oho ee mwana wa mdamu, funya wulodi kughambe, ‘Bwana MLUNGU waghamba huwu aighu ya Waamoni, na aighu ya agho madukano ghawo: Lufu, lufu lwakulwa lupate kubwagha; lwazughulo, lwaawuyaaka-aka na kung'ala-ng'ala sa luhehia.

²⁹Ngelo wimlaghuyagha na kuwona mawono gha tee kwa wundu ghonyu, wichadumbulwa marangi na ulo lufu, kwa wundu ghwa wuwiwi ghuzamie nandighi. Ituku jawo ja kutua jekabwa jameria kuvika.

³⁰Wunja ulo lufu kiwonyi. Nichakutanya oho andu koni koreumbiloghe, na isanga korevailoghe.

³¹Nichakaia na lubio aighu yako nani nichakukaba kwa machu ghapo ghiko sa modo; nichakungira mikonunyi kwa wandu wibwaghagha kwa lung'eto, wiichi kutotesha.

³²Kuchakorwa sa mbande; bagha yako ichadika aghadi ya isanga, ndekuchaakumbukwa sena anduangi; kwa kukaia ini BWANA najighora ilagho iji.’”