Read TAITA BIBLE – Biblia Ilagho Jiboie Kwa Wandu Wose EZEKIELI 22 Bible Online

EZEKIELI 22 - TAITA BIBLE – Biblia Ilagho Jiboie Kwa Wandu Wose bible

EZEKIELI 22

¹BWANA ukaghora nani sena ukighamba,

²“Mwana wa mdamu, welee, kuchatanya, kuchaghutanya muzi ghwa wabwaghi? Haya, kughumanyishe wuchafu ghwake ghose ughubonyere.

³Kughuzere ugho muzi seji Ini Bwana MLUNGU naghora: Kwa kukaia kwabwaghie wandu wengi aghadi kwako kukadia bagha, na kukulusha kumoni na milimu yako, ngelo yako ekabwa yaawuyacha.

⁴Kwakosere kwa wundu ghwa kubwagha wandu na kwa kukulusha na milimu iyo koreibonyereghe. Ituku jako jamerie kuvika kaavui, na mwaka ghwako ghulaghirilo ghwameria kuvika. Kwa huwo namerie kukubonya kukaie osholelwa ni iro mbari ra wandu, na osekwa ni masanga ghose.

⁵Wandu wiko kaavui, na awo wiko kula na oho, wichakuseka oho mundu wa ndonyi kuchue ndoghoi.

⁶Wabaa wose wa Israeli wiko kwako weekurumiria weni, nawo watumia ndighi rawo kubwagha wandu.

⁷Wavi ndewitalwagha andenyi kwako, waghenyi wadakorongwa aghadi kwako, mwadawikita awo wifuilo ni weke ndee na waka wakiwa.

⁸Mwavimenyere vilambo vapo va wueli, na kurinona Sabato rapo.

⁹Weko wandu kwako wikufunyire kughora tee kwa kubwagha wandu. Wamu wiaja vizongona vifunyiro kwa milimu a mighondinyi, na kubonya maza ra wulaki aghadi konyu.

¹⁰Koko na wandu aghadi konyu wilalagha na weke mka-ndee, na wamu wiatumia ndighi kulala na waka wiseelie wiko merinyi.

¹¹Mndumu uasela na muka wa mmbao na umu ualala na mka-mwanwake, umu ualala na mruna uvalo ni mka-ndee.

¹²Andenyi kwako wandu wamu wadatuwa wibwaghe wandu. Mwadaboilwa kuwivara wambenyu fwaida kwa kuwikoronga, nenyo mwaniliwa ini Bwana MLUNGU.

¹³“Kwa huwo idana, nichakaba chui rapo kwa wundu ghwa inyo kuwusa fwaida isefwanagha, na kwa kudia bagha aghadi konyu.

¹⁴Welee, uko kufunga ndighi konyu kuchadua, angu mikonu yako kukaia na ndighi ingelo nakakubonya maza? Ini Bwana najighora ilagho iji, nani nichajikatisha.

¹⁵Nichamsaghisa aghadi ya iro mbari ra wandu, na kumsasara masangenyi; nani nichaghumeria putu ugho wuchafu ghonyu ghose.

¹⁶Kuchalushwa imbiri ya iro mbari ra wandu, na oho kuchamanya kukaia Ini ne BWANA.”

¹⁷BWANA ukaghora nani ukighamba,

¹⁸“Mwana wa mdamu, wandu wa Israeli waafwanana na wuchafu ghwasigharika ghwa feza, na shaba, na ibamba, na chuma, na risasi nyuma ya kueleshwa na kuinjwa kwa iwiwi ja modo.

¹⁹Kwa huwo, ini Bwana MLUNGU naghamba huwu: Kwa kukaia inyo mmbose moofwanana na wuchafu ghwa feza yaeleshwa, olenyi nichamkwanya andenyi ya muzi ghwa Jerusalemu.

²⁰Na sa iji koni wandu wikwanyagha feza, na shaba, na chuma, na risasi na ibamba na kuvingira iwiwinyi ja modo, na kughupuputa hata visaghe, niko koni nichaamkwanya kwa machu na kwa lubio lwapo nipate kumsaghisa.

²¹Nichamkwanya na kumpuputa kwa modo ghwa machu ghapo, nenyo mchasagha aghadi yaro.

²²Sa iji feza isaghishwagha kwa modo ghubirie, na inyo wori mchasaghishwa andenyi ya muzi ghwa Jerusalemu, nenyo mchamanya machu ghapo aighu yenyu.”

²³BWANA ukaghora nani ukighamba,

²⁴“Mwana wa mdamu, kuwizere wandu wa Israeli kukaia isanga jawo ndejielie, jeeka sa isanga jisepatire vua ngelo jabonyerwa machu.

²⁵Wabaa wa isanga jawo weeka sa shimba irurumagha ikirashua madiwo ghake; wabwaghie wandu na kuwusa mali na vilambo vawo va zoghori mbaa, na kusigha waka wifuilo ni womi wengi isangenyi jawo.

²⁶Wakohani wawo wainona sharia yapo, na kuvilusha vilambo vapo va wueli; walemelo ni kusawua vilambo va wueli, na vilambo vizima, hata ndewifundishire wandu kusasawua iro maza rizamie na iro rielie; ndewiritalie Sabato rapo, na aho ngalushwa aghadi kwawo.

²⁷Wabaa wa ugho muzi weeka sa vikwau virashuagha madiwo ghawo; wibwaghagha, na kutotesha wandu, eri wipate fwaida isefwane.

²⁸Na walodi waro, weevisa agho mawiwi sa kukushinga chokaa naighu, nawo wiawona mawono ghiseko na wuloli, na kulodera wandu tee, wikighamba, ‘Bwana MLUNGU waghamba huwu,’ na BWANA useghambie ilagho jingi.

²⁹Waisanga weekuzaisira kukita na kusoka; wamkorongie mkiwa na uo usena kilambo chingi, na kumkita mghenyi kwa kumsoka hachi yake.

³⁰Neremlolieghe mndungi aghadi kwawo oagha ugho wurigha, nao ukaie kimusi andu kuvuchukie imbiri kwapo, upate kujidederia ijo isanga, eri nisejitoteshe, ela serewonieghe mndungi.

³¹Kwa huwo niko nidirie machu ghapo aighu kwawo, na kuwimeria na modo ghwa lubio lwapo; na wuwiwi ghwa mabonyo ghawo ghuchakaia aighu yawo weni. Ini Bwana MLUNGU naghamba.”