Read TAITA BIBLE – Biblia Ilagho Jiboie Kwa Wandu Wose EZEKIELI 23 Bible Online

EZEKIELI 23 - TAITA BIBLE – Biblia Ilagho Jiboie Kwa Wandu Wose bible

EZEKIELI 23

²“Mwana wa mdamu, korekoghe na waka wawi, mundu na mruna kifu chimweri;

³werekoghe wikibonya wumalaya Misri kufuma wanake ghwawo, hata nyodo rawo rikaghwa, na wai ghwawo kunoneka putu.

⁴Uja mwai m'baa orewangwaghwa Ohola, na mruna orewangwagha Oholiba. Ngawilowua wose wawi, nawo wikava wana wa womi na wa waka. Kunughana na marina ghawo, Ohola ni Samaria; na Oholiba ni Jerusalemu.

⁵“Ohola ukazoya kubonya wumalaya dikwanye; ukachulwa ni bea nyingi na wakundwa wake Waashuru;

⁶masikari ghirwae nguwo ra zambarau, chiaimweri na wabaa, na wabaa wa majeshi wose wandu wa irika wewasira bea, na wandu wejoka farasi.

⁷Orebonyereghe wumalaya na awo wandu wose, na wandu wose wikumikie wa Ashuru, ukakulusha moni na milimu ya kula umu wawo orebonyereghe wumalaya nao.

⁸Jingi ndesigha tabia ya wumalaya ghwake oreghuzoeghe matuku orekoghe Misri; kufuma wanake ghwake, womi werekoghe wikilala nao, wikakatisha bea rawo nao.

⁹Kwa huwo neremngirieghe mikonunyi kwa Waashuru, awo werekoghe wakundwa wake werekoghe wikilala nao.

¹⁰Wandu awa weremrueghe nguwo na kumsigha duu, wikawiwada wana wake wa womi na wa waka, na kum'bwagha uo moni kwa lufu; na nyuma ya uko kutanywa kwake, ukawuya lughano kwa waka.

¹¹“Mruna Oholiba orewonieghe agho ghose; ela sena ukanoneka kuchumba, ukabonya wumalaya kuchumba ghuja ghwa mruna.

¹²Ukakundana na Waashuru na kubonya wumalaya na wabaa, na wabaa wa majeshi, masikari ghirwae maswagha ghose, wajoki farasi; wandu wose wa irika wewasira bea ukabonya wumalaya nawo.

¹³Neremmbonieghe wanoneka putu, wose wikanugha ija chia cheni.

¹⁴“Ela ukachuria kughenda imbiri na wumalaya ghwake; ukazoya kukunda fwana ra wabaa wa Babuloni riwikilo awurighenyi, na kushingwa rangi ra ngundu,

¹⁵na kufungwa mikowa viwonunyi kwawo, na viremba viboie vongonyi kwawo. Wose werekoghe wikiwoneka wabaa kwa iro fwana rawo, wabaa na waisanga wa Babuloni.

¹⁶Uendawona fwana ra awo wabaa, ukawikunda na kuduma wadumwa Babuloni.

¹⁷Awa wabaa wikacha kufuma Babuloni na kulala nao. Wikamlusha kwa bea rawo, na nyuma ya kunonwa, ukaghaluka na kuzamilwa ni awo wandu.

¹⁸Nyuma ya uo kubonya wumalaya ghwake worinyi, ukiwonyera wuduu ghwake, ngazamilwa na kumsigha seji neremsighieghe mruna.

¹⁹Ela sena ukachuria kubonya wumalaya ghwake, ukikumbuka matuku gha wanake ghwake, iji orekoghe ukighubonya Misri.

²⁰Ukasaghua womi aho, werekoghe na via sa va punda, na bea mbaa sa ra farasi.”

²¹(Huwo niko korekumbukieghe wulaki ghwa wanake ghwako, ingelo Wamisri werenonieghe wai ghwako na kughusha nyodo rako.)

²²“Kwa huwo ee Oholiba, ini Bwana MLUNGU naghamba huwu: Ola nichawiwusira awo wakundwa wako wawuyakuzamia wilo na oho, nichawireda kufuma kula andu.

²³Wababuloni na Wakalidayo wose, Pekodi na Shoa na Koa chiaimweri na Waashuru wose; wandu wa irika wewasira bea, wabaa, na wabaa wa majeshi wose na masikari ghose ghijokagha farasi.

²⁴Nawo wichacha kufuma kaskazinyi kukukaba, wiko na magare na ijeshi ja wandu. Wichakukaba kwa kula chia, wiko na ngao ndini na mbaa, na kofia ra shaba. Nichawineka nguma retanya, nawo wichakutanya oho karakara na mawoni ghawo.

²⁵Nani nichawonyera machu ghapo aighu yako, wipate kukukaba kwa kubia. Wichakudumbua mbua na madu ghako; na wandu wako wichaasigharika wichabwaghwa kwa lufu. Wichawada wana wako wa womi na wa waka, na awo wisigharikie, wichamerelwa na modo;

²⁶sena wichakurua nguwo rako, na kuwusa lulu rako righokie.

²⁷Huwo niko nichaameria wulaki ghwako na wumalaya ghwako kughuredie kufuma isanga ja Misri, hata ikaie kusedime kuwiwona angu kuwikumbuka sena.”

²⁸Bwana MLUNGU waghamba huwu: “Ola nichakungira mikonunyi kwa awo wandu wawuyakuzamia, awo kuwimenyere ngolonyi kwako.

²⁹Wichazamilwa na kulwa na oho; wicharinona kazi rako rose kubonyere, wikusighe duu, hata wuduu ghwa wumalaya ghwako ghuwoneke worinyi. Wulaki na wumalaya ghwako

³⁰ghwakushekerie kupatwa ni agho malagho ghose; angu kubonyere wumalaya na iro mbari ra wandu, na kukulusha na milimu yawo.

³¹Kwanughie chia ra mwanyinyu; kwa huwo nichakunyosha kikombe cha ikabo jake.”

³²Bwana MLUNGU waghamba huwu: “Kuchanywa kikombe cha mwanyinyu kibaa chiko ndenyi, kuchasekwa na kumenywa kukichiwadia angu chachua nandighi.

³³Chichakuwongera na kukuchura wasi, Icho kikombe cheobosha chiredagha kunoneka, ni kikombe cha mwanyinyu Samaria;

³⁴kuchachinywa hata kuchiangamire na kuchibara vipande vipande; kucharashua nyodo rako, kwa kukaia najighora ilagho iji, ini Bwana MLUNGU naghamba.”

³⁵Kwa huwo Bwana MLUNGU waghamba huwu, “Kwa kukaia kwanileghie hata kukaniwikia mghongo, kuchaduka msigo ghwa wulaki na wumalaya ghwako.”

³⁶BWANA ukanizera, “Mwana wa mdamu, welee, kuchamtanya Ohola na Oholiba? Basi kuwighorie wuchafu ghawo.

³⁷Wabonyere wulaki na kubwagha; watasire milimu yawo, na kuifunyira vizongona va wana wawo winivaie.

³⁸Aighu ya agho wanibonyere huwu: wakulushire Andu kwapo kwa Wueli, na ngelo iyo cheni wikarilusha Sabato rapo.

³⁹Iji werewifunyagha wana wawo wibwagho kizongona kwa milimu, wedewifunya ngelo ija cheni werengirieghe Andu kwapo kwa Wueli wipate kukulusha. Huwo niko werebonyereghe andenyi ya Hekalu yapo.

⁴⁰“Na kuchumba huwo, wikaduma mundu kuwanga wandu kufuma kula, loli wikacha. Kwa wundu ghwawo wikakuoghosha, na kushinga meso ghawo rangi na kukupamba.

⁴¹Wikasea kidombo aighu ya makochi gha ishima, na kuwika meza ipambilo imbiri kwawo, na kuwikiria marumba ghapo, na mavuda ghapo.

⁴²Ndoghoi ya izungu ja wandu wisetalagha eresikirikieghe kwawo, na wawongeri wereredeloghe kufuma kireti, wikawirusha awo wana wa waka bangili vikotonyi kwawo, na virumbu vighokie vongonyi kwawo.

⁴³Niko ngaghamba, Welee, huwu wandu ndawaawuyalaka na uhu mkeku sa ija ngelo werebonyagha wumalaya nao?

⁴⁴Kwa kukaia womi wawuyangia kwake sa iji koni wighendagha kwa ilaya. Na huwo niko womi werekoghe wikighenda kwa Ohola na Oholiba, wipate kubonya wulaki nawo.

⁴⁵Ela wandu wa hachi wichawitanya awa waka walaki, sena wabwaghi, na uko kutanya koni witanyagha nako walaki na wabwaghi. Kwa kukaia wadalaka na kubwagha.”

⁴⁶Bwana MLUNGU waghamba huwu, “Redenyi ijeshi jipate kulwa nawo, wipate kuwibonya wiwuye kilambo cheshinikilwa, na chedwalwa wunyika.

⁴⁷Na ijo ijeshi jichawilasa na magho, na kuwibwagha kwa lufu; wichawibwagha wana wawo wa womi na wa waka, na kukora nyumba rawo.

⁴⁸Huwo niko nichaaghuinja wulaki isangenyi, eri waka wose wipate kukufundisha wisebonye wulaki sa awo.

⁴⁹Na inyo wana wa waka wawi, mchalipwa malipo gha wulaki ghonyu, na kwa wundu ghwa kaung'a renyu retasa milimu; niko mchaamanya kukaia Ini ne Bwana MLUNGU.”