Read TAITA BIBLE – Biblia Ilagho Jiboie Kwa Wandu Wose EZEKIELI 24 Bible Online

EZEKIELI 24 - TAITA BIBLE – Biblia Ilagho Jiboie Kwa Wandu Wose bible

EZEKIELI 24

¹Ituku ja ikumi, ja mori ghwa ikumi mwaka ghwa ikenda ghwa kubarishwa kodu, BWANA oreghorieghe nani ukighamba,

²“Mwana wa mdamu, andika irina ja iji ituku, ituku iji jeni mzuri wa Babuloni waghumara muzi ghwa Jerusalemu; andika iji ituku jeni iji.

³Deda mfwano ughu kwa wandu welegha kuwizere, Bwana MLUNGU waghamba huwu: Wikiria nyungu modonyi kuichure machi.

⁴Kukumbirie vipande va nyama andenyi, nyama rose riboie, nyama ra bara na kuwoko; kuichure na maindi ghiboie.

⁵Kusaghuo nyama iboie ya ng'ondi kuikumbe, kukore modo nandonyi nyama ridoghode, kudoghose nyama na maindi wori.”

⁶Bwana MLUNGU waghamba huwu, “Ni bugha kwa muzi ghwa wandu wibwagha wandu; ghoofwanana na nyungu iwadilo ni ngama nandenyi, ichue ngama iseoghoshero jingi. Funyenyi nyama kipande kipande kuseko na kusaghua.

⁷Bagha ra wandu wibwaghilo andenyi yaro nderidikie andonyi ridimagha kufinikirwa ni ndoe; reedikia maghonyi.

⁸Eri nikaie na machu ghelipia kisasi, naisigha iyo bagha idikie maghonyi isevisike.”

⁹Bwana MLUNGU waghamba huwu, “Ni bugha kwa muzi ghwa wandu wibwaghagha wandu! Ini wori nichatumbanya kitungu cha mbande.

¹⁰Kumba mbande nyingi, kukore modo kudeke iro nyama nicha, nao kuunguo supu, kusighe maindi ghilunguo.

¹¹Nao kuiwikirie iyo nyungu modonyi iko nduu, ipate kuhia shuu, eri shaba yaro ihie itinike tini wuchafu ghusaghe, na ngama yaro iinjike.

¹²Nabonya kazi nduu, ngama yaro eeka nyingi isedimikagha kuinjwa ni modo.

¹³Ngama yaro ni agho mabonyo ghako ghizamie gha wulaki ee Jerusalemu. Angu kumangu nakueleshere, ela koolema kuela kufumanya na wuchafu ghwako; kwa huwo ndekuchaaeleshwa sena hata nameria kukatisha lubio lwapo aighu yako.

¹⁴Ini BWANA naghamba, agho malagho ghichakatia; nichaghibonya nimoni. Sichaawuya nyuma, hata sichaalekia, angu kughaluka; ela kunughana na chia ra mabonyo ghako, nichakutanya. Ini Bwana MLUNGU naghamba.”

¹⁵Wokoni BWANA ukaghora nani ukighamba,

¹⁶“Mwana wa mdamu, ola nalighisa kumuinja umundu kumkunde kuchumba, ufume kwako kwa ikabo jimweri. Kuselile hata kusekeme; hata kusetonyo ni mbori.

¹⁷Kusorie ngolo mboaeri; kusemlilie uo ufue. Kurighe kiremba chako, kuro vadu vako; kusefinikire momu ghwako, hata kuseje vindo va ifonyi.”

¹⁸Neededanya na wandu nakesho, na luma lwa kenyi, muka wapo ukaafwa. Ituku jinughie, ngabonya sa iji koni nerelaghiriloghe ni BWANA.

¹⁹Nao wandu wikanikotia, “Maza iri kwawuyaribonya aghadi kodu kutambua kwaro niki? Dighorie.”

²⁰Niko ngawitumbulia, “BWANA oreghorieghe nani ukighamba,

²¹‘Kuwizere wandu wa Israeli, ini Bwana MLUNGU naghamba huwu: Ola nichakulusha Andu kwapo kwa Wueli, andu mukukasire nako sa saghi yenyu, andu kumghokiagha na kukukunda ngolonyi konyu; nani nichabonya wana wenyu wa womi na wa waka muwisighie nanyuma, wibwagho kwa lufu.

²²Nenyo mchabonya sa iji nabonya, ndemchaafinikira memu yenyu, hata kuja vindo va ifonyi.

²³Mcharigha viremba venyu vongonyi konyu, na kurwa vadu venyu; ndemchaalila angu kukema mchungu, ela mchataruma kwa wundu ghwa kaung'a renyu, mkisirimikiana mmbeni na mmbeni.

²⁴Na Ezekieli uchakaia fwana konyu; nenyo mchabonya sa iji koni wabonya. Ngelo maza iro richaakatia, niko mchaamanya kukaia ini ne Bwana MLUNGU.’

²⁵“Na oho mwana wa mdamu, ituku nichaawiinjira isuwirio jawo, kuboilwa na wubaa ghwawo ghuwighokiagha, na bea ya ngolo yawo, na wokoni wana wawo wa womi na wa waka,

²⁶ituku ijo, mundu wafufunuka, uchamredia malagho.

²⁷Ituku ijo momu ghwako ghuchafunguka kudedanye na uo mundu, ndekuchaakaia kituri sena. Kwa huwo, kuchawuya alama kwawo, nawo wichamanya kukaia ini ne BWANA.”