Read TAITA BIBLE – Biblia Ilagho Jiboie Kwa Wandu Wose EZEKIELI 25 Bible Online

EZEKIELI 25 - TAITA BIBLE – Biblia Ilagho Jiboie Kwa Wandu Wose bible

EZEKIELI 25

¹BWANA ukaghora nani ukighamba,

²“Mwana wa mdamu, zighana cha kwa Waamoni kuwifunyire wulodi.

³Wizere Waamoni wisikire seji ini Bwana MLUNGU nawuyaghamba: Mwawuyaseka, ‘Ahaa!’ aighu ya Andu kwapo kwa Wueli angu korelushiroghe, na aighu ya isanga ja Israeli angu jeresighiloghe iduu, na aighu ya wandu wa Juda angu weredwaloghe wunyika;

⁴kwa wundu ugho nichamngira mikonunyi kwa wandu wa mashariki wimmbuse. Wichabonya kambi na kukaia aghadi konyu; wichaja matunda ghenyu na kunywa mariwa ghenyu.

⁵Nichabonya muzi ghwa Raba ghukaie mlamba gholishira ngamila, na isanga ja Waamoni jiwuye maranu gha mfugho. Aho niko mchaamanya kukaia ini ne BWANA.

⁶“Ini Bwana MLUNGU naghamba huwu: Kwa kukaia morekabieghe chui renyu na kuvina mkiboilwanya na mawiwi gherekoghe aghadi konyu kwa wundu ghwa isanga ja Israeli,

⁷kwa huwo, olenyi naghorua mkonu ghwapo aighu yenyu, nani nichamfunya na kumneka wandu wa iro mbari ra wandu; nichamuinja wandunyi na kumtotesha masangenyi. Aho niko mchaamanya kukaia ini ne BWANA.”

⁸Bwana MLUNGU waghamba huwu, “Kwa kukaia Moabu waghambie wei wandu wa Juda weeka sa mbari zima rose,

⁹nani moni nichailekeria iyo mizi yawo iko mpakenyi ghwawo ikabo; mizi iko mpakenyi iboie kuchumba, iyo Beth-jeshimothi, Baal-meoni, na Kiriathaimu.

¹⁰Nichaifunya iyo mizi chiaimweri na Waamoni, na kuwingira mikonunyi kwa wandu wa mashariki, wiwibonye wikaie wandu wawo, hata wisewuekumbukwa sena aghadi ya iro mbari ra wandu;

¹¹nani nichaitanya Moabu, nawo wichamanya kukaia ini ne BWANA.”

¹²Bwana MLUNGU waghamba huwu, “Kwa kukaia wandu wa Edomu werelipieghe ngenga aighu ya wandu wa Juda, na kwa chia iyo wikangia makosenyi mabaa ghelipia iyo ngenga,

¹³nanimoni nichaghorua mkonu ghwapo nikabe Edomu; nichabwagha mdamu na nyamandu, na kusigha ijo isanga iduu, kufuma Temani hata Dedani, wandu wose wichabwaghwa kwa lufu.

¹⁴Nani nichalipa ngenga aighu ya Edomu kwa kuwitumia wandu wapo Israeli, nawo wichawikaba Waedomu kunughana na machu ghapo, nawo wichamanya ngenga yapo, ini Bwana MLUNGU naghamba.”

¹⁵Bwana MLUNGU waghamba huwu, “Kwa kukaia Wafilisti walipie ngenga kwa kinyanya kibaa cha ngolo, na wumaiza ghototesha ghuseko na kutua,

¹⁶nanimoni ola nichaghorua mkonu ghwapo nikabe Wafilisti; nani nichawibwagha Wakerethi, na kuwitotesha wandu waro wose wa pwani.

¹⁷Nichalipia ngenga mbaa aighu kwawo na kuwineka adhabu kwa machu mabaa; niko wichaamanya kukaia Ini ne BWANA ngelo nakalipia ngenga aighu kwawo.”