Read TAITA BIBLE – Biblia Ilagho Jiboie Kwa Wandu Wose EZEKIELI 26 Bible Online

EZEKIELI 26 - TAITA BIBLE – Biblia Ilagho Jiboie Kwa Wandu Wose bible

EZEKIELI 26

¹Ituku ja imbiri ja mori, mwaka ghwa ikumi na imweri ghwa kubarishwa kodu, BWANA oreghorieghe nani ukighamba,

²“Mwana wa mdamu, angu wandu wa Tiro wawuyaseka wandu wa Jerusalemu wikighamba, ‘Ahaa, mbenge ya wandu wa Jerusalemu yachikanyiro, naaisighilwa iari; idana nasikira nicha, angu wasighwa duu.’

³Kwa wundu ugho, Ini Bwana MLUNGU naghamba huwu: Ola ne m'maiza wako ee Tiro, nani nichareda wandu kufuma kwa mbari nyingi sa mivo-mivo ya bahari, wipate kulwa na oho.

⁴Wichanona mawurigha gha Tiro, na kuchikanya minara yaro; nani nichakokorua ndoe raro hata kuwuye lwala.

⁵Andu aho kuchawuya koanikia nyavu ra wawadi samaki, ghadi na ghadi ya bahari; angu nameria kujighora ilagho ijo. Kuchawuya andu kokailwa ni iro mbari ra wandu.

⁶Na wandu waro wikaiagha isangenyi wichabwaghwa kwa lufu. Niko wichamanya kukaia ini ne BWANA.”

⁷Bwana MLUNGU waghamba huwu, “Ola nichamreda Nebukadnezari mzuri wa Babuloni kufuma cha kaskazinyi, nao ni mzuri aighu ya wazuri, uchelwa na Tiro, nao uchacha na farasi, na magare, na wajoki farasi, ijeshi ja masikari mengi.

⁸Wandu wako wa mizinyi wichabwaghwa kwa lufu, uchabonya wurigha ghokurughaia, na kubonya kitungu cha ndoe chekutangala, na kuwusira ngao rekukinga na oho.

⁹Uchatumia vilambo vake vetika mawurigha ghako, na kuchikanya minara yako kwa masoka.

¹⁰Farasi rake richakaia nyingi, rifukire teri ikufinikire. Mawurigha ghako ghichasughusika ingelo wajoki farasi wakaida na magare, ukingia mbengenyi ra muzi ghwavuchulwa.

¹¹Chia rako rose ra muzi richafashwa ni kochokocho ra farasi rake, uchabwagha wandu wako kwa lufu, na nguro rako mbaa ra muzi richachikanywa na kughushwa andoenyi.

¹²Wichariwada mali rako na biashara rako, wichachikanya mawurigha na nyumba rako righokie; magho, na mbau, na ndoe rose wicharikumba cha baharinyi.

¹³Nichanyamira kubora konyu, na chwaka ra vinubi nderichaasikirika sena anduangi.

¹⁴Nichakubonya kuwuye lwalwa luduu; kuchawuya andu koanikia nyavu ra wawadi samaki; ndekuchaaghwa sena anduangi; ini Bwana MLUNGU naghamba.”

¹⁵Bwana MLUNGU waghamba huwu aighu ya Tiro, “Welee, masanga gha pwani ndeghichaasughusika ghikasikira lwaka lwa kughwa kwako; ingelo wandu washoghonolwa wirumagha, iji wandu wabwaghwa aghadi kwako?

¹⁶Aho niko wabaa wose wa pwani wichaasea kufuma vifumbinyi vawo va nguma, na kuinja marwao ghawo, na kurua nguwo rawo ritolelo. Nawo wichangilwa ni wowa, na kusea kidombo andonyi wikisughusika ngelo rose, na wikikushinikia oho.

¹⁷Nawo wichakulilia wikighamba, ‘Kwasowekie wada oho muzi kukumikie, korekailoghe ni wandu wa baharinyi, oho chiaimweri na wandu wako, koreoboshereghe wandu andu kose isangenyi.

¹⁸Visiwa vose vasughusikie ituku ja kughwa kwako, ee, visiwa vose viko baharinyi viafwa waya kwa wundu ghwa kusoweka kwako.’”

¹⁹Bwana MLUNGU waghamba huwu, “Ngameria kukubonya kuwuye muzi ghusighilo duu, kara kara na mizi isekailwagha ni wandu, iji nareda machi mengi ghikuidagha naighu na kukufinikira,

²⁰aho niko nichakusera nokondenyi chiaimweri na wandu wiseagha cha kinenyi, kuendekanya na wandu wa kala, andenyi ya wurumwengu ghwa isi, andu kunonekie kufuma kala; kuchakaianya na wafu wikaigha aho kinenyi, hata ndekuchaakailwa angu kukaia chiaimweri na wandu wiko moyo anduangi.

²¹Nichabonya kutua kwako kukaie koobosha, na oho ndekuchaakaia, hata ngera kwalolwa, ndekuchaawoneka sena anduangi. Ini Bwana MLUNGU naghamba.”