Read TAITA BIBLE – Biblia Ilagho Jiboie Kwa Wandu Wose EZEKIELI 28 Bible Online

EZEKIELI 28 - TAITA BIBLE – Biblia Ilagho Jiboie Kwa Wandu Wose bible

EZEKIELI 28

¹BWANA ukaghora nani ukighamba,

²“Mwana wa mdamu, ghora na m'baa wa Tiro kumzere, Bwana MLUNGU waghamba huwu: Ngolo yako yakusikire, na oho kwaghambie, ‘Ini ne mlungu, nadasea kidombo aighu ya kifumbi cha milungu, ghadi na ghadi ya bahari,’ na sena hoku ko mdamu ndekuko mlungu ungi, hata ngera kwakutala kumoni kukaia na hikima sa mlungu.

³Kuaghesha kedi koko na hikima kuchumba Danieli, na wei ilagho jingi ndejivisikie kwako.

⁴Kwakupatire mali kwa hikima na kumanya kwako; kwatumbanyire dhahabu na feza andenyi ya mali rako.

⁵Kwachurie mali rako kwa hikima yako mbaa ebonya biashara, kukachulwa ni lukaso ngolonyi kwako kwa wundu ghwa iro mali rako.

⁶“Kwa huwo, ini Bwana MLUNGU naghamba huwu: Kwa kukaia kwakutala kumoni kukaia na hikima sa mlungu,

⁷ola, nichareda waghenyi wilo na oho, wandu wizamie kuchumba mbari rose; nawo wichanona mali rose riboie kuritumbanyire kwa hikima rose, wichanona kughoka kwako kose.

⁸Wichakuchunua kinenyi chiko ndenyi, na oho kuchafwa kifwa chizamie, ghadi na ghadi ya bahari.

⁹Welee, kuchachuria kughamba wei ‘Ini ne mlungu,’ iji kuko imbiri ya wabwaghi wako? Oho ko mdamu tu, iji kuko mikonunyi kwa wandu wawuyakushoghonua.

¹⁰Kuchafwa sa koshi, kuchabwaghwa ni waghenyi; angu ini Bwana MLUNGU najighora ilagho ijo.”

¹¹BWANA ukaghora nani sena ukighamba,

¹²“Mwana wa mdamu, lilia mzuri wa Tiro kumzere kukaia ini, Bwana MLUNGU naghamba huwu: Korekoghe fwana iboie, kughokie, kuchue hikima.

¹³Korekoghe Edeni andenyi ya mbuwa ya Mlungu; korekufinikireghe na kula igho ja zoghori mbaa; karneliani, topazi, jaspi, krisolito, berili, oniksi, safire, karbankuli, zumaridi; na michoro yako erekoteroghe na kushingwa dhahabu. Iji koreumbiloghe gherekoghe ghaboiswa.

¹⁴Oho korekoghe kerubi mlindiri ushingilo mavuda, nerekuwikieghe aighu ya mghondi ghwa wueli ghwa Mlungu, kukakaia kukisela aghadi ya magho gha modo.

¹⁵Korekoghe kusewadie ikosa jingi kufuma ngelo ija koreumbiloghe; hata ituku jija wuwiwi ghorewonekieghe andenyi kwako.

¹⁶Kwa wundu ghwa wungi ghwa biashara yako, korengiriloghe ni lung'eto kukabonya kaung'a. Kwa huwo nerekukumbieghe noko sa kilambo chisekundikie, kufuma mghondinyi ghwa Mlungu; na uo malaika mlindiri ukakufunya shighadi, kufuma ghadi na ghadi ya magho ghiakaaka gha zoghori mbaa.

¹⁷Korekukasireghe nandighi, kwa wundu ghwa kughoka kwako; kukainona hikima yako kwa wundu ghwa uko kuboa kwako. Nerekuchunueghe hata andoenyi, ngakufunukua kwa wazuri, wipate kukuzighana na kukufundisha kwako.

¹⁸Korenonieghe malalo ghako gha wueli, kwa wundu ghwa biashara yako isewadie hachi; na kwa wundu ghwa mawiwi ghako mengi; niko ngafunya modo aghadi kwako ghukakukora, ngakuwunja maivu andoenyi mesonyi kwa wose werekuwonieghe.

¹⁹Wandu wose werekumanyireghe waawuyakushinikia, kutua kwako ni koobosha; hata ndekuchaawoneka kwa kala na kala.”

²⁰BWANA ukaghora nani ukighamba,

²¹“Mwana wa mdamu, zighana cha Sidoni, kufunye wulodi aighu yake

²²kughambe kukaia ini, Bwana MLUNGU naghamba huwu: Ola nichalwa na oho ee Sidoni, nani nichawonyera wubaa ghwapo aghadi kwako; na wandu wichamanya kukaia ini ne BWANA, iji nichaareda kutanya aighu yako, na kufunukua wueli ghwapo kwako.

²³Nichareda saka izamie kwako, na wandu wichabwaghwa a chienyi rako; awo wichaabwaghwa wichaghwa aghadi kwako, wichabwaghwa kwa lufu kula andu. Niko aho wichamanya kukaia ini ne BWANA.”

²⁴BWANA ukaghamba, “Wandu wa Israeli ndewichaakaia na wambao wangi sena wewisumbua sa mtaranganga ghowirambua, angu sa munjwa ghowidunga. Nawo wichamanya kukaia ini ne Bwana MLUNGU.”

²⁵Bwana MLUNGU waghamba huwu, “Ngelo nichaawitumbanya wandu wa Israeli kufuma andu kose kwa awo wandu nerekoghe nawisaghisa, na kuwonyera wueli ghwapo aghadi ya iro mbari ra wandu, wichakaia isangenyi jawo jeni, ijo neremnekieghe mdumiki wapo Jakobo.

²⁶Nawo wichakaia banana andenyi ya ijo isanga; wichaagha nyumba na kuwa mizabibu. Wichakaia banana ingelo nichaatanya awo wambao werewikitagha; nawo wichamanya kukaia ini ne Bwana MLUNGU.”